Shqipëri: Konfirmohen tre raste te reja me AH1N1

[aurel]

Konfirmohen edhe tre raste të prekur nga AH1N1. Numri i të infektuarve nga gripi i derrit në Shqipëri shkon në 34 persona.
Analizat janë konfirmuar dje nga Laboratori i Referencës në Rumani, ndërkohë që Instituti i Shëndetit Publik pret kampionë të tjerë analizash nga Bukureshti.

Pacientet e konfirmuar kane marrë mjekimin e nevojshëm dhe nuk konsiderohen të jenë prekur nga format e rënda të gripit të derrit. Ata janë trajtuar me tamiflu, është përdorur protokolli përkatës i mjekimit dhe janë kontrolluar periodikisht në spital, sikundërse duhet të trajtohen të gjitha rastet e dyshuara.

Sipas Institutit të Shëndetit Publik pacientët tashmë janë të shëruar nga gripi. Pacientet e infektuar i përkasin moshës nga 19 deri në 51 vjeç. Asnjëri prej tyre nuk ndodhet në spital ndërkohë që analizat e monitorimit të situatës vazhdojnë të kryhen çdo ditë pranë ISHP-së.

Në muajin tetor mendohet se rastet e virozëve të renda do të ekzaminohen pranë ISHP-së, menjëherë pas përfundimit të rikonstruksionit të Laboratorit të Virologjisë.

Instalimi i aparaturës së nevojshme do të mundësojë kryerjen e analizave në Shqipëri dhe përfundimin e marrëveshjes me laboratorin e referencës në Rumani, për kryerjen e analizave të pacientëve të dyshuar në Shqipëri.