2.8 milionë euro për pastrimin e minave në Shqipëri

[aurel]

2.8 milionë euro do t’i dhurohen Shqipërisë për pastrimin e minave. Në një deklaratë zyrtare të Ambasadës gjermane në Tiranë bëhet e ditur se kjo ndihmë është kontribut i Gjermanisë në 10 vitet e fundit.
Gjatë konfliktit të Kosovës në vitin 1999, vë në dukje deklarata, zona e kufirit me Kosovën në verilindje të Shqipërisë ishte e kontaminuar me mina të ish-Republikës Federative të Jugosllavisë, si dhe me municion të pashpërthyer të NATO-s në një brez me gjatësi prej 120 km dhe gjerësi 20 km.

Në harkun kohor të 10 viteve kanë humbur jetën 34 vetë dhe kanë mbetur të plagosur 238 të tjerë gjatë shpërthimit të tyre, shifra që flasin për rrezikshmërinë e brezit të minuar kufitar.

Kontributi i Gjermanisë është shumë i rëndësishëm në suksesin e programit "Aksioni i Veprimit ndaj Minave" në bashkëpunim me KFOR- in dhe një organizatë daneze.

Deklarata e ambasadës gjermane vë ne dukje se është pastruar nga minat një sipërfaqe prej 3.680 metër katrorë, janë asgjësuar 8501 mina anti-njeri, 41 mina anti-tank dhe 1400 copë municione të pashpërthyera.

Republika Federale e Gjermanisë ka mbështetur edhe largimin e predhave të pashpërthyera gjate tragjedisë se Gërdecit me një kontribut prej 44.000 eurosh, përfundon deklarata e Ambasadës gjermane në Tiranë.