Miliona kompjuterë “të mbrojtur” me anti-viruse të rrejshme

[Kliton]

Një numër i theksuar i kompjuterëve janë të pajisur me zgjidhje softuerike të sigurisë të cilat pa pagesë apo me një pagesë simbolike vet përdoruesit i kanë instaluar në kompjuterët e tyre, mirëpo, siç tërheq vëmendjen Symantec, një pjesë e madhe e softuerit të tillë paraqet rrezik më të madh për kompjuterët sesa që i mbron nga sulmet e ndryshme.

Cyber-kriminelët përdorin metoda të ndryshme për shpërndarjen e aplikacioneve të tyre dashakeqe, e një prej tyre është ofrimi i dritareve të cilat hapen (pop-up) ku përdoruesit gjatë vizitimit të faqeve të caktuara u thuhet se nuk janë të mbrojtur nga sulmet e mundshme. Natyrisht, atyre u ofrohet mbrojtje e plotë, dhe atë pa pagesë apo me një shumë të caktuar të vogël, kryesisht simbolike.

Në shumicën e rasteve të tilla, në vend të mbrojtjes së kompjuterit nga sulmet dashakeqe, përdoruesve u ofrohet një softuer për t’ua marrë përsipër kompjuterin nga largësia apo thjesht për t’ua vjedhur të dhënat personale si numrat e kartelave bankare e të ngjashme, tërheq vërejtjen kompania për siguri kompjuterike - Symantec.

Ekspertët e taborit kundër viruseve Symantec kanë gjetur 250 variante të ndryshme të softuerit të “sigurisë” me emra të cilët tingëllojnë bukur besueshëm, si Antivirus 2010 apo SpywareGuard 2008, gjersa të njëjtit janë shkarkuar rreth 43 milionë herë gjatë një viti.