Prokuroria kundër Mediut: Gërdeci, aksident njerëzor

[aurel]

Në seancën e sotme në ngarkim të tragjedisë së Gërdecit, prokuroria ka lexuar kërkesën për gjykim ndaj të akuzuarve për këtë ngjarje.
Sipas akuzës, ngjarja në Gërdec ka ndodhur për arsye të gabimit njerëzor dhe nuk është një sabotazh, ashtu sikurse është deklaruar nga ish-ministri i Mbrojtjes Fatmir Mediu.

Materiali i prokurorisë është i përmbledhur në 140 faqe, ku theksohet se shpërthimi ndodhi si pasojë e kontaktit të shkëndijës nga saldimi i karrocës me barutin.

Ndërkohë, gjykatësit e kësaj çështjeje kanë hedhur poshtë 14 kërkesa të avokatëve mbrojtës për zhvillimin e seancave me dyer të mbyllura. Në këtë proces gjyqësor janë të akuzuar 29 persona, midis tyre edhe ish-ministri i Mbrojtjes Fatmir Mediu.

Midis të akuzuarve janë edhe Mihal Delijorgji, administratori i fabrikës së demontimit të municioneve që shpërtheu, Ylli Pinari, Dritan Minxoli, ish shefi i Shtabit të Përgjithshëm Luan Hoxha dhe ish-funksionarë të tjerë të lartë të ushtrisë dhe Ministrisë së Mbrojtjes.