Rama: Gati të ulem në tryezë nëse e thërret Topi

[aurel]

Kryetari i Partisë Socialiste, Edi Rama deklaroi tw premten se është gati të ulet në një tryezë politike nëse e thërret presidenti Topi për të shmangur krizën politike në vend. Por, ai nënvizoi se nuk ka asnjë dialog pa një marrëveshje të negociuar për hetimin e zgjedhjeve.
Rama, duke ndarë të njëjtin qëndrim me rezolutën e miratuar dje nga Asambleja Parlamentare e KE-së në Strasburg, pranoi se bojkoti i opozitës nuk është diçka e mirë për krizën në të cilën ndodhet vendi. Nga selia rozë ai akuzoi kundërshtarin politik, Sali Berisha si përgjegjës, dhe si i vetmi njeri që ka në dorë fundin e këtij bojkoti.

“Shqipëria është në krizë dhe sot nuk e themi vetëm ne por dhe ndërkombëtarët nëpërmjet zërit të KE. Kriza politike është e thellë dhe po thellohet përditë. Dhe po paralizon jetën e vendit. Është një krizë e shtrirë në shtetin shqiptar, në ekonomi, në demokracinë e vendit tonë”, tha Rama.

Kryetari socialist përsëriti më shumë se dy herë faktin se bojkoti është e vetmja rrugë për ti dhënë mundësi legjitimitetin parlamentit duke hetuar zgjedhjet e 28 qershorit.