Stiv Xhobs & Stiv Bozhnjak Shpikës dhe biznesmenë

[Lirenti]

Siç duket 1955-a ishte një vit i rëndësishëm për fushën e teknologjisë, përderisa pikërisht në këtë vit lindën dy nga personalitetet më të mëdha të saj, të cilët, fare rastësisht, u pagëzuan me të njëjtin emër. Stiv Xhobs dhe Stiv Bozhnjak, duke themeluar "Apple Computer Corporation" realizuan një revolucion të vërtetë në fushën e kompjuterave personalë, me krijimin e të parëve kompjutera "Apple" dhe në vazhdim, të të "tmerrshmit" Mac. Ata ishin të parët që arritën ta bënin këtë teknologji të re jo vetëm të pranueshme por edhe shumë të kërkuar në treg e sidomos nga biznese të ndryshme. Por nga ana tjetër është mëse i qenësishëm fakti se për të arritur deri në këtë stad nuk kishte qenë e lehtë; historia e jetës së tyre përbën një skenar "best seller" i aftë për t'u mishëruar në një film kinematografik. Në marrëdhënien e tyre mund të gjesh zbatimin e plotë të rregullit fizik se të kundërtat tërhiqen...
Bozhnjakun që në moshë shumë të vogël e vetmja gjë që e interesonte dhe që mbushte jetën e tij ishte krijimi i mekanizmave dhe aparaturave elek-tronike të llojeve të ndryshme. Gati të gjithë ditën e kalonte në shoqërinë e veglave dhe qarqeve elektronike.E vetmja gjë që e preokuponte ishte krijimi dhe zhvillimi i teknologjive të reja.
Nga ana tjetër, Xhobs dallohej për dhunti të mahnitshme në fushën e marketingut dhe menaxhimit. Gjithashtu, aftësia fantastike e komunikimit që gëzonte Xhobs, "dashuria" e tij e fuqishme për marketingun, së bashku me gjenialitetin dhe aftësitë e mrekullueshme të Bozhnjakut, e udhëhoqën Koorporatën Apple në krye dhe që të dy djemtë, megjithëse nuk kishin mbushur ende të 30-at, u përfshinë në listën e milionerëve. Por ndërsa ndodhej në majë të karrierës dhe të lavdisë së tij, Xhobs, i detyruar nga bashkaksionistët e tjerë të "Apple", në një moment gjendet pa rrugëdalje dhe si rrjedhim largohet nga koorporata dhe vazhdon individualisht të merret (dhe njëkohësisht të rreziko-jë) me teknologji të reja. Më 1997-ën, pesëmbëdhjetë vjet pas largimit të tij të detyruar, aksionerët e "Apple" i kërkojnë të kthehet, me qëllim që të shpëtojë koorporatën nga shkatërrimi përfundimtar. Xhobs, duke parë se krijesa e tij rrezikonte të zhdukej nga harta industriale, i lë pas të gjitha mosmarrëveshjet dhe mëritë e kthehet menjëherë. Në sajë të tij, koorporata arrin të kapërcejë fazën e shlyerjes së borxheve në të cilat ishte zhytur dhe brenda tre vjetëve shndërrohet përsëri në një firmë të llogaritshme në fushën e kompjuterave
Ndërsa Bozhnjak nga ana e tij, zgjodhi një rrugë tjetër, përderisa më 1985 braktisi edhe ai Koorporatën "Apple"; hoqi dorë nga pjesëmarrja në çdo lloj biznesi dhe nisi të merrej me aktivitete bamirësie.
Më i njohur dhe i rëndësishëm është fondacioni i ngritur prej tij, i cili ndihmon të rinjtë, akoma edhe fëmijët, që dëshirojnë të merren me informatikën. Vetë ai, vazhdoi dhe do të vazhdojë të krijojë programe të ndryshme duke u përpjekur që t'a drejtojë teknologjinë në forma dhe nivele të reja. Por Bozhnjak vazhdon gjithnjë të besojë se mënyra me të cilën funksionojnë sot shoqëritë e ndryshme teklonogjike nuk i përshtatet atij.
Po kështu, ai beson se shoqëritë teknologjike do të duhet të kenë si qëllim bazë kërkimin dhe krijimin e kushteve të përshtatshme, me qëllim që të gjithë ata që dëshirojnë, të kenë mundësi të merren me kërkimin dhe krijimin, pavarësisht nga komercialiteti i produktit. Por kjo natyrisht, sipas Bozhnjak, nuk realizohet në praktikë nga askush, duke e detyruar vetë atë të qëndrojë në anë (jashtë kësaj "loje"), në shoqëri me shpikjet dhe aktivitetet e tij humane.