Balonat gjigante të cilat do të bartin ndërtesa

[vaaldr1n]

Kompania australiane “Skylifter” ka shpikur fluturaken e cila mund të bart peshën deri në 150 tonë dhe deri në 2.000 kilometra largësi. Nga kompania theksojnë se fluturaket e tyre një ditë do të mund të bartin edhe objekte të plota nga njëri vend në tjetrin.

Fluturakja është e dizajnuar në formë të diskut, sepse siç theksojnë ekspertët, shumë më lehtë është të udhëhiqet me një të tillë, sesa me fluturake e cila ka formë standarde.

Sipas detajeve të publikuara, fluturakja do të vihet në lëvizje me ndihmën e helikave të cilat mund të lëvizin për të ndryshuar kahje, e pesha e cila bartet do të kapet në mes në mënyrë që fluturakja të jetë stabile dhe e baraspeshuar.

“Skylifter” tanimë ka prodhuar prototipin e quajtur Betty, i cili është tri metra i gjerë dhe mund të bart afër gjysmë kilogrami peshë. Po ashtu, është dizajnuar edhe prototipi i balonës prej 18 metrash, por pa motorë, raporton gazeta britanike “Daily Mail”.

Kompania planifikon që brenda tre muajve të ardhshëm të prodhoj prototipin e plotë, i cili do të jetë 45 metra i gjerë.

Udhëheqësit e kompanisë shpresojnë se një ditë balonat gjigante do të mund të bartin spitale dhe ndërtesa tjera të rëndësishme nga zonat e goditura nga katastrofat.