Vazhdon beteja e patentave, radhën e ka Motorola për të paditur

[vaaldr1n]

Motorola ka bërë të ditur gjatë kësaj jave se ka vendosur tri padi ndaj Apple, për shkak të pretendimeve për shkelje të patentave në pajisjet e saja të popullarizuara pa tela dhe mobile.

Paditë theksojnë se produktet e popullarizuara të Apple si iPhone, iPad, iPod Touch dhe disa produkte tjera , shkelin patenta të Motorola në fushë të dizajnimit të antenave dhe teknologjive tjera për celularë të mençur. Sipas Motorola, Apple ka shkelur saktësisht 18 patenta.

“Pas hyrjes së fundit të Apple në tregun e komunikimit, ne kemi bërë negociata të gjata rreth kësaj çështjeje, por Apple ka refuzuar të marrë një licencë” tha Kirk Dailey, zëvendës president i korporatës për pronë intelektuale pranë Motorola Mobility. “Ne nuk kemi pasur asnjë mundësi pos të vendosim këto padi për të ndaluar shkeljet e vazhdueshme të Apple. Motorola do të vazhdojë të bëjë të gjithë hapat e nevojshëm për të mbrojtur R&D e saj dhe pronën intelektuale, që janë kritike për biznesin e kompanisë”.

Sipas Motorla, kompania ka kërkuar nga Komisioni Tregtar Ndërkombëtar që të veprojë në ndalimin e Apple për të importuar, shitur, reklamuar apo ruajtur këto produkte në fjalë.

Në fakt me padi nuk po merret vetëm Motorola, por edhe të tjerët. Microsoft të premten e kaluar ka paditur Motorola-në, duke thënë se prodhuesi i celularëve ka shkelur në nëntë patenta të Microsoft, në pajisjet e saja të bazuara në Android.

Në mars Apple ka paditur HTC-në, duke thënë se ka shkelur në 20 patenta të Apple të lidhura me ndërfaqen e iPhone, me arkitekturën dhe harduerin e tij. Dhe në gusht Oracle ka paditur Google për atë që thuhet se ka bërë shkelje në patenta të softuerit, përkatësisht për sistemin operativ mobil Android. /pcworld.al