Shqipëria insiston që Kosovës t'i jepet udhërrëfyesi për heqjen e vizave

[Erinaa]

Prishtinë, 23 nëntor - Ministri i Brendshëm i Shqipërisë, Lulzim Basha tha se heqja e vizave për Kosovën është shumë e rëndësishme jo vetëm për shtetasit e Kosovës, por edhe për paqen dhe stabilitetin ballkanik. “Kosova nuk duhet të anashkalohet në zhvillimet rajonale, përfshirë edhe lëvizjen e lirë”, tha Basha në intervistën ekskluzive për Radio Kosovën.

Lëvizjen e lirë të shqiptarëve në përvjetorin e pavarësisë së Shqipërisë Lulzim Basha e ka quajtur “një lajm jashtëzakonisht i mirë”. Mendoj se shqiptarët janë të gëzuar dhe kanë arsye të jenë krenarë në dy fronte, shtoi Basha. Së pari, sepse kemi arritur të kthejmë në realitet një ëndërr, një aspiratë, një dëshirë, që siç e thatë edhe ju diçka, për të cilën janë sakrifikuar deri në sakrificat më sublime si humbja e jetës dhjetëra e dhjetëra gjenerata shqiptarësh dhe së dyti, sepse ky vendim në vetvete i rikthen dinjitetin Shqipërisë dhe shqiptarëve kudo që jetojnë. Është në radhë të parë provë e besimit që vendet e Bashkimit Europian kanë te Shqipëria, te kapacitetet e Shqipërisë dhe së dyti është një rikthim i dinjitetit europian të njërit prej popujve dhe qytetërimeve më të vjetra të Europës.
Ministri i Brendshëm i Shqipërisë i tha Radio Kosovës se Shqipëria ka insistuar dhe vazhdon të insistojë në çdo rast që Kosovës duhet menjëherë t''i jepet ”Udhërrëfyesi” për heqjen e vizave. Është e një rëndësie të jashtëzakonshme jo vetëm për lëvizjen e lirë të qytetarëve të Ksoovës, por edhe për vetë paqen dhe stabilitetin ballkanik që Kosova të mos anashkalohet në zhvillimet rajonale, përfshi këtu edhe lëvizjen e lirë si një zhvillim jashtëzakonisht i rëndësishëm për rajonin tonë dhe shumë domethënës përsa i përket perspektivës së prekshme europiane të të gjithë banorëve, të të gjithë qytetarëve të rajonit tonë. Në këtë kuadër, përveç përsëritjes me insistim në çdo rast që kemi me partnerët europianë të këndvështrimit tonë se Kosovës menjëherë duhet do t''i ofrohet e njëjta perspektivë i njëjti proces, ne jemi angazhuar së bashku me autoritetet kosovare për t''i ndihmuar ata dhe për t''i ofruar gjithçka që kemi në dispozicion që procesi të jetë sa më i shpejtë dhe sa më efikas, duke filluar nga modelet tona të gjendjes civile, të cilat mbështeten në praktika të avancuara europiane, dokumentet tona biometrike, praktikat tona të kufirit dhe natyrisht bashkëpunimin në luftën kundër krimit të organizuar dhe trafiqeve transkufitare, ku policia shqiptare dhe ajo e Kosovës kanë një bashkëpunim shumë të mirë”.
I pyetur nëse Qeveria e Shqipërisë druan nga mundësia e rritjes së kërkesave për shtetësinë shqiptare nga shtetasit e Kosovës Basha tha se për të përfituar shtetësinë shqiptare, ligji shqiptar mbi shtetësinë ka kritere të qarta. Ky ligj është një nga hallkat që janë inspektuar nga Komisioni Europian dhe është gjetur në përputhje të plotë, jo vetëm me procesin e heqjes së vizave, por edhe me procesin tjetër të integrimit europian të vendit. Natyrisht, që askujt nuk do t’i mohohet dhënia e shtetësisë mbi bazën e këtij ligji dhe përmbushjes së kritereve të këtij ligji, por përgjigja e vërtetë, e qëndrueshme dhe afatgjatë për qytetarët e Kosovës, është procesi i heqjes së vizave për qytetarët e Kosovës, proces në të cilin qeveria e Shqipërisë, ministria e Brendshme, kanë angazhimin e plotë të mbështesë autoritetet e Kosovës.
Për mundësinë e kontrollit të përbashkët policor të kalimit të kufirit ndërmjet Kosovës e Shqipërisë, Basha tha se janë marrë të gjitha masat që kalimet kufitare të jenë sa më të lehta dhe sa më të pamundimshme për qytetarët e të dy vendeve, të Shqipërisë dhe të Kosovës. Regjimet që lehtësojnë lëvizjet në kufi do të kthehen në lëvizje permanente, në mënyrë që ajo që është arritur tashmë të mos njohë zmbrapsje, por vetëm përparim, pra një kufi sa më miqësor, sa më joekzistent për përdoruesit e tij, por në të njëjtën kohë edhe një kufi sa më të fortë dhe të papenetrueshëm për krimin transkufitar