Disa përdorues të Hotmailit mbesin pa e-mail

[vaaldr1n]

Shërbimi gjigant MSN i kompanisë Microsoft është përballë me një varg ankesash të përdoruesve të tij të cilët thonë se u janë fshirë llogaritë e tyre të e-mailave në Hotmail, shkruan gazeta britanike Daily Mail.

Një numër i madh i përdoruesve në forume kanë vendosur të zbrazin frustrimet e tyre për shkak të inboxit të zbrazët, e tani për tani nuk dihet nëse kjo është punë e Microsoftit, i cili e ka MSN-in nën pronësi, apo bëhet fjalë për një vepër të hakerëve.

“Ju lutem të më ndihmoni t’i kthejë. Të gjitha informatat mbi fëmijët e mi dhe fotografitë janë aty”, ka shkruar të shtunën një përdorues me emrin Zacgore.

Tjerët ankohen se shumica e e-mailave nga inboxet e tyre janë dërguar në dosjen për porosi të shlyera. Ende nuk dihet se sa ky problem është i shpërndarë, e vlen të theksohet se e-mailin e Hotmail e shfrytëzojnë rreth 360 milionë njerëz. Teknikët përgjegjës për mbështetje në këtë shërbim theksojnë se janë të vetëdijshëm për problemin dhe se janë duke punuar në rregullimin e tij.

Nga Microsoft theksojnë se me gjasë bëhet fjalë për një prishje të kufizuar, dhe u kanë kërkuar falje përdoruesve të këtij shërbimi. Në forumin e tyre ankesat janë shkruar 476 faqe ankesa në lidhje me këtë problem, e ato datojnë qysh nga fillimi i nëntorit të vitit të kaluar.