Flenë në arkivol që 23 vjet

**labja** · 18-08-2011, 06:53 PM

Braziliani Zeli Ferreira Rossi (60 vjeçar) ka një shprehi të çuditshme e cila ka tërhequr vëmendjen e banorëve të Santa Terpesinhut. Çdo të premte ai shkon në dhomën e tij dhe flenë në arkivol të cilin ia kishte dhuruar një mik, shkruan Globo.
Rutinën e përsërit prej vdekjes së mikut të tij para 23 vitesh. “Miku im mendoi se kam vdekur para 28 vitesh. Pas një fatkeqësie të rëndë komunikacioni përfundova në spital ku qëndrova katër muaj. Ishim marrë vesh se ai i cili mbijeton, tjetrit t’ia blejë një arkivol.

Duke menduar se kam vdekur, ai ma bleu arkivolin dhe ma dërgoi në shtëpi,” tha Rossi të cilin e quajnë edhe Arkivoli Joe. Pas fatkeqësisë ai qëndroi për një vit në karrocë invalidësh, ndërsa tri vite eci me paterica.

Askush nuk e shfrytëzoi arkivolin për pesë vjet. “Shoku im ishte plaçkitës. E vranë një të premte. I hëngri 14 plumba. Ma dhuroi arkivolin, por vdiq para meje”, tha Rossi i cili, natyrisht ia bleu mikut të tij një arkivol.

Bashkëshortja e Rossit, Cleusa (58 vjeçare) e cila është e martuar me të që 41 vite, nuk ka asgjë kundër kësaj shprehie të pazakontë. Bile ajo me mahi thotë se një ditë e ka ndërmend t’i bashkohet bashkëshortit të saj. Rossi thotë se nuk ka vend për dy veta. Rossi në mesnatë mbyllë kapakun, ndërsa zgjohet rreth orës gjashtë të mëngjesit. Ai thotë se kurrë nuk ka mbetur pa ajër.

“Një të premte nuk isha në qytet dhe nuk munda të shtrihem në arkivol. Nuk më zinte gjumi. Ishte gjë e tmerrshme”, rrëfen Rossi.