Sëmundjet e zemrës, mbi 8 mijë të vdekur në vit

[Altin111]

Sipas specialistëve të Shëndetësisë, sëmundjet e zemrës shkaktojnë 50% të vdekjeve. Ja programi i ISHP-së për depistimin

Sëmundjet e zemrës po vrasin çdo ditë e më shumë shqiptarët. Madje gjysma e vdekjeve, në çdo vit, kanë në bazë një shkak të lidhur me sistemin e qarkullimit të gjakut. Kështu, specialistët e Ministrisë së Shëndetësisë bëjnë të ditur se, çdo vit në vendin tonë vdesin rreth 8 mijë persona nga sëmundjet e zemrës. Por ajo çka e bën situatën tragjike është fakti se mjekët nuk i kushtojnë vëmendje faktorëve të riskut, kur pacienti paraqitet për vizitë. Të ndodhur përpara kësaj situate Instituti i Shëndetit Publik ka përgatitur një model të ri shërbimesh pranë Mjekut të Familjes, me qëllim kapjen e hershme të shkaqeve të mundshme të sëmundjeve kardiovaskulare dhe trajtimin në kohë të tyre.

Vdekshmëria

Sëmundjet kardiovaskulare janë shkaku kryesor i vdekjeve në Shqipëri dhe gjysma e vdekjeve në vend kanë lidhje me sistemin e qarkullimit të gjakut. Kështu shprehen specialistët e Ministrisë së Shëndetësisë, sipas të cilëve, këto vdekje vazhdojnë të rriten si pasojë e ndryshimeve moshore dhe të mënyrës së jetesës. "Nëse në fillim të viteve '90 kishim rreth 6000 vdekje në vit, nga sëmundjet kardiovaskulare, sot ky numër është mbi 8000",- pohojnë specialistët. Sipas tyre, sëmundjet kardiovaskulare nuk janë një fatalitet, pra ato nuk ndodhin thjesht sepse është e shkruar në gjenet tona. Por mjekët shpjegojnë se ka një sërë faktorësh të lidhur me mënyrën e jetesës dhe me kontrollin e disa treguesve biologjike të organizmit. "Informimi i duhur dhe krijimi i kushteve për një jete të shëndetshme nga ana e shtetit, do të ndihmonte që të prekeshim më pak nga këto sëmundje dhe të kishim një jetë më të gjatë e më të shëndetshme",- pohojnë specialistët.

Programi

Instituti i Shëndetit Publik ka përgatitur një model të ri shërbimesh pranë Mjekut të Familjes me qëllim kapjen e hershme të shkaqeve të mundshme të sëmundjeve kardiovaskulare dhe trajtimin në kohë të tyre (këshillim dhe trajtim i natyrave të tjera). Kështu u shprehen specialistët e Ministrisë së Shëndetësisë duke shtuar se synimi i këtij programi është të nxisë kapjen e hershme dhe trajtimin e përshtatshme me këshilla apo trajtim të faktorëve risk për sëmundjet koronare dhe ato cerebrovaskulare, me qëllim final parandalimin e pasojave shëndetësore në popullatë. "Në qendër të programit është një udhëzues i përgatitur për t'u ardhur në ndihmë mjekëve",- bëhet e ditur nga specialistët duke shtuar se në udhëzues janë përfshirë veç të tjerash, në mënyrë skematike edhe standardet e klasifikimit dhe të këshillimit të individëve për secilin prej 8 faktorëve të ndryshueshme, madhore dhe minore të sëmundjeve kardiovaskulare.

6000 vdekje në vit nga sëmundjet kardiovaskulare kishte para viteve '90

8000 vdekje në vit nga sëmundjet kardiovaskulare ka pas viteve '90

Sipas studimit të ISHP-së, mjekët i vlerësojnë faktorët e riskut vetëm kur pacientët shfaqin shenjat klinike

ISHP: Mbi 60% e mjekëve nuk masin faktorët e riskut

Sëmundjet e zemrës shkaktojnë situata alarmante për shkak të numrit të lartë të vdekjeve që shënohen çdo vit. E ndërsa këto sëmundje po gjejnë terren gjithnjë e më shumë specialistët theksojnë se në sistemin shëndetësor të Shqipërisë bëhet ende pak, lidhur me kapjen e hershme të problemeve dhe trajtimin në kohë të tyre. Gjithashtu, këshillimit të individëve në risk u kushtohet pak rëndësi. "Në një studim të viti të kaluar, të kryer nga Instituti i Shëndetit Publik, vetëm 40 për qind e mjekëve të përgjithshëm e kryejnë vlerësimin e tensionit të gjakut në formën e një depistimi rutinë tek personat në dukje të shëndetshëm",- pohojnë specialistët duke shtuar se një situatë e ngjashme vërehet edhe për vlerësimin e duhanpirjes tek pacientet. Rezultatet në lidhje me matjen e faktorëve të tjerë të riskut për sëmundjet kardiovaskulare, sipas studimit, janë akoma më të ulëta. Mjekët vlerësojnë nivelin e glicemisë (sheqeri në gjak), indeksin e masës trupore (mbipeshën) mënyrën e ushqyerjes, konsumin e alkoolit dhe nivelin e stresit vetëm në prani të shenjave klinike apo ankesave nga pacientët. Nga ana tjetër kanë munguar udhëzuesit e duhur për këtë qëllim. "Reforma financiare në shërbimet e mjekut të familjes në vendin tonë vërtetë pritet të përmirësojë administrimin e këtij sistemi dhe cilësinë e shërbimeve për pacientët, por rrezikon shërbimet e parandalimit",- pohojnë specialistët.

Faktorët e riskut

-konsumimi i alkoolit

-tensioni i gjakut

-duhanpirja

-niveli i glicemisë (sheqeri në gjak)

-indeksin e masës trupore (mbipesha)

-mënyra e ushqyerjes

-niveli i stresit