Liberalizimi i vizave, Basha pret reporterët e KE-së

[aurel]

Ministri i Brendshëm i Shqipërisë, Lulzim Basha priti të mërkurën në një takim raporterët e Asamblesë Parlamentare të Këshillit të Evropës David Wilshire dhe Jaako Laakso, me të cilët ka diskutuar për përmbushjen e kritereve për liberalizimin e vizave.
“Sistemi i aplikimit dhe shpërndarjes së dokumenteve të identitetit, letërnjoftimeve elektronike dhe pasaportave biometrike, është i sigurt, nga më modernët në Evropë dhe njëkohësisht ofron shpejtësinë optimale të shërbimit ndaj qytetarëve. Deri më tani numërohen 245 mijë aplikime për pasaporta biometrike, 234 mijë prej të cilave janë prodhuar”, u shpreh ministri Basha.

Përsa i takon një kushti tjetër të rëndësishëm për liberalimin e vizave, që është siguria e kufijve, Basha informoi raporterët se është përmbyllur instalimi i sistemit TIMS në të 26 pikat e kalimit kufitar, në këto pika është mundësuar lidhja e drejtpërdrejtë me bazën e të dhënave të INTERPOL-it, e po kështu lidhja me sistemin e analizës së informacionit kriminal MEMEX.

Ndërkohë po punohet për unifikimin e sistemit të kontrollit në pikat e kalimit kufitar në modelin “one stop shop” që do të përfshijë jo vetëm kontrollin e dokumentacionit, por edhe kontrollin doganor, fitosanitar etj. Në të njëjtën mënyrë në bazë të vendimit të qeverisë po punohet për funksionimin e Qendrës Operacionale Detare për kontrollin e kufirit detar.

Gjatë takimit me raporterët Wilshire dhe Laakso, Ministri Basha informoi edhe për luftën e vazhdueshme me tolerancë zero kundër krimit të organizuar dhe trafiqeve të paligjshme.

Raporterët e Asamblesë Parlamentare të Këshillit të Evropës David Wilshire dhe. Jaako Laakso vlerësuan progresin e arritur në fushën e përmbushjes së kritereve për liberalizimin e vizave të Shqipërisë me BE duke e cilësuar punën e kryer deri më tani si mjaft efektive dhe të suksesshme.