Microsoft paraqet celularët e rinj me Windows Phone 7

[vaaldr1n]

Microsoft të hënën ka shpalosur versionin final të sistemit operativ mobil të shumëpritur Windows Phone 7, për të cilin shpreson se do të ketë një prezencë më të madhe në tregun e celularëve të mençur që po zgjerohet çdo ditë e më shumë.

Softueri u shpalos në një konferencë për media në qytetin e Nju Jorkut dhe u prezantua nga vet shefi ekzekutiv i Microsoft, Steve Ballmer. Ai tha se sistemi i ri operativ do të ofrohet për nënë pajisje që do të paraqiten në treg gjatë muajit të ardhshëm dhe do të jenë prej prodhuesve të ndryshëm duke përfshirë LG, Samsung, HTC dhe Dell. Disa prej celularëve do të kenë edhe tastiera dhe disa të tjerë sipas Ballmer do të jenë ekskluzivisht me ekran të ndejshëm në prekje.

Celularët e rinj do të ofrohen për operatorin mobile AT&T duke filluar prej datës 8 nëntor dhe më vonë gjatë vitit do të ofrohen edhe për T-Mobile. Verizon dhe Sprint do të jenë ofrues të celularëve me Windows Phone 7 në vitin 2011. AT&T pritet të ofrojë tre celularë me kontratë dy vjeçare, duke filluar me një çmim prej 200 dollarë për secilin.

Microsoft pritet që të godet shumëkënd prej konkurrencës me softuerin e ri. Gjatë viteve të fundit, tregu i celularëve të mençur është rritur vazhdimisht, dhe duhet theksuar se Apple iPhone, Google Android dhe RIM BlackBerry janë tre liderët që kanë grabitur një udhëheqje në këtë treg.

Microsoft që nuk ka pasur ndonjë celularë konkurrues të kualitetit të lartë si konkurrenca, ka mbetur prapa. Por me sistemin e ri ajo po shpreson të rikthehet në skenë.

Në fjalimin e tij, z.Ballmer theksoi se veçoritë në celularët e rinj do të lejojnë që njerëzit t’i kthejnë pajisjet ashtu si kanë dëshirë për t’i shfrytëzuar. “Ne jemi të fokusuar në atë sesi njerëzit real vërtetë dëshirojnë të përdorin celularin e tyre gjatë rrugës” tha ai, duke shtuar se aftësia e konsumatorit për të konfiguruar sipas dëshirës celularin është ajo që e dallon produktin e kompanisë së tij nga të tjerët.

Zëvendës Presidenti i korporatës së Microsoft, Joe Belfiore dhe menaxheri i programit së platformës Windows Phone 7, demonstroi sistemin e ri operativ në kuadër të konferencës për media. Ai shfaqi pamjen në ekranin kryesor në celularë që mund të konfigurohet sipas dëshirës për secilin përdorues, e gjithashtu tregoi se mund të integrohen rrjetet sociale, mesazhet dhe madje edhe Xbox Live.

z.Belfiore tregoi edhe veçori tjera unike, duke përfshirë edhe softuerin Microsoft Power Point për prezantim të sllajdeve dhe kërkim të integruar thellë në sistem për kërkime në detaje. Një veçori tjetër është edhe Office Hub, që ofron integrim pa pagesë me softuerin One Note të Microsoft, duke e bërë më të lehtë editimin dhe shkëmbimin e dokumenteve mes një celulari me Windows dhe një versioni të softuerit të përshtatur me ueb. Konsumatorët gjithashtu mund të lidhin celularin me produktet e tjera të Microsoft, duke përfshirë Xbox Live për lojëra, Zune për muzikë dhe video, e Bing për kërkime. /pcworld.al