Sarandë, të miturit mbyllen e torturohen në një "shkoll

[kuklla]

SARANDË- Një denoncim i çuditshëm që ka mbërritur dje në policinë e Sarandës ka tronditur të gjithë opinionin lokal. Prindi i një fëmije tetëvjeçar, i shoqëruar nga djali i tij dhe drejtori i shkollës, kanë denoncuar dje tortura fizike e psikologjike të ushtruara mbi fëmijë të ndryshëm nga disa persona që hiqeshin si mësues privatë. Fëmijët mblidheshin në një godinë jo shumë larg shkollës 9- vjeçare dhe iu merreshin të gjitha paratë që kishin. Sipas denoncimit, torturat kishin arritur deri aty sa fëmijëve u janë vendosur në trup minj të ndryshëm. Ky denoncim është marrë me përparësi nga policia e Sarandës, e cila është ende në fazën e verifikimit të tij. Ende nuk është ndërmarrë ndonjë veprim ndaj personave të akuzuar nga fëmijët për tortura ndërsa policia është duke marrë fillimisht dëshmitë e fëmijëve të vegjël.

Zbulimi

Skandali është denoncuar nga prindi i një fëmije, i cili ka zbuluar krejt rastësisht dhunën fizike, psikologjike ndaj fëmijëve. Ka qenë gjendja tepër depresive dhe shëndeti që po keqësohej përditë i fëmijës M. Sinani, nxënës në klasën e tretë të shkollës "9 tetori", që kanë shtyrë të atin, S. Sinani , të shkojë tek mësuesi i kësaj klase, Neron Shehu. Prindi ka shkuar që t'i kërkojë mësuesit shkaqet e mundshme të rënies në peshë dhe përskuqjes së vazhdueshme në fytyre të djalit tetëvjeçar por aty ka mësuar se djali i tij prej shumë ditësh nuk shkonte në mësim. Mësues Neroni me qetësi i ka thënë se djali prej më se 20 ditësh, nga data 12 tetor, nuk paraqitej në klasë. "Ne, kemi kujtuar se ishte sëmurë, ndaj edhe nuk jemi preokupuar më shumë",- i ka thënë mësuesi prindit të fëmijës. Pas kësaj, prindi, drejtori i shkollës, Lefter Gjini dhe mësuesi Neron Shehu vendosën të bisedojnë me fëmijën dhe ai i frikësuar i ka treguar të gjithë ngjarjen .

Rrëfimi i fëmijës

Një grua me flokë të verdhe, tek dera e shkollës, vrojtonte fëmijët e klasave të fillores, që po luanin në oborrin e shkollës. Ajo i afrohet tetëvjeçarit M . Sinani, e kap për dore duke i thënë sedo të shkonte me të në një shkollë tjetër të zgjedhur këtu afër. Kështu ka treguar dje fëmija tetëvjeçar. "U mundova të çlirohesha por ajo nuk më lejonte të largohesha. U futëm në njërën prej portave të lyera me bojë në atë shtëpinë atje. Arritëm në oborrin e rrethuar me mur të lartë dhe të mbuluar me hardhi, nga dyert e hapura dukej një dhomë me ca stola dhe tavolina. Në to ishin ulur fëmijë të tjerë. Sa hyri gruaja pushuan zërat e fëmijëve. Nga dhoma doli një burrë zeshkan, i cili më vonë do më merrte çdo ditë tek porta e shkollës dhe do më shpinte aty",- ka treguar fëmija. Sipas tij, nga dhomat e tjera të shtëpisë dëgjoheshin zëra fëmijësh. "Sa futeshim në oborr, çdo ditë, gruaja na mblidhte lekët që na jepnin prindërit për të blerë ndonjë gjë për pushim të madh. Pastaj na ulte në stola dhe na detyronte të mësonim mësimet e klasës së parë e të dytë, të cilat ne i dinim. Një zhurmë të vogël të dëgjonte na bërtiste, ulëriste dhe na torturonte, duke na hedhur në fytyrë minj që i mbante në disa kafaze në dhomën ngjitur. Rrinim të mbyllur aty rreth 4-5 orë. Na lejonte të largoheshim pasi kishte mbaruar ora e fundit në shkollën tonë. Tek porta e daljes nuk harronte të na porosiste se po të tregonim çfarë kishim parë dhe ç'kishim provuar do ta kishim pisk",- ka përfunduar rrëfimin e tij fëmija tetëvjeçar. Luan Sejdini

Denoncimi

Fëmijët të tmerruar nga ajo që ka ndodhur

Drejtori i shkollës, Lefter Gjini, me të dëgjuar rrëfimin e fëmijës ka njoftuar policinë, e cila ka nisur hetimet e para. Së bashku me fëmijën denoncues, të atin, mësuesin dhe drejtorin e shkollës, hetuesit kanë shkuar në shtëpinë përdhese ku ishte improvizuar "shkolla". I mituri i ka treguar hetuesve të gjitha mjediset dhe çfarë kishte parë gjatë 20 ditëve. Personat e përfshirë në skandal, sipas të babait të fëmijës, Sulo Sinani, u morën në pyetje nga policia. "Njëri prej fëmijëve, fqinjë me djalin tonë, ende edhe sot është i tmerruar. Ai kur kujton këtë gjë flet duke u dridhur",- thotë babai i fëmijës. Ndërkohë banorët përreth shtëpisë flasin për fëmijët që dërgoheshin aty me motor nga një 30vjeçar. Ata kanë parë edhe një grua brenda shtëpisë por nuk dinin gjë tjetër.

REAGIMI

Babai: Policia të zbardhë ngjarjen ose do ketë vetëgjyqësi

Sulo Sinani, babai i fëmijës së tmerruar e të dhunuar shpreson se hetuesit do të zbulojnë të vërtetën e kësaj çështjeje por në rast të kundërt ai pohon se do të arrijë deri tek vetëgjyqësia. Sipas tij, u bë një javë që hetuesit e vonojnë këtë çështje duke u justifikuar se janënë pritje të mbërritjes së një psikologu. " Unë sot kam identifikuar përmes djalit njeriun që e ka marrë atë në shkollë. E njohu vetë djali. Ai e pa atë njeri tek porta e shkollës. Kam mësuar se emrin e ka Koli, ndërsa për gruan që i torturonte ma tregoi në dyqanin afër shkollës",- thotë babai i fëmijës. Sipas tij, të gjitha këto janë denoncuar në polici por ende nuk është marrë asnjë masë. "Mos presin që fëmijët t'i gjejmë bunkerëve të masakruar, si rasti i Dibrës, apo të shitur, pastaj policia të veprojë? Nëse nuk do të veprojë policia për të zbardhur ngjarjen unë do të bëj vetëgjyqësi dhe për këtë nuk ndihem fajtor, se do të ve në vend padrejtësinë që i është bërë fëmijës tim",- tha dje Sulo Sinani. Ai ka kërkuar nga shteti që të gjejë të vërtetën e asaj që ka ndodhur në mënyrë që të parandalohet ndonjë tragjedi.

E-mail * Print

[anna]

te isha ne vendin e ketij prindi do te kisha reaguar shume ashper. por faj kane edhe mesuesit qe nuk interesohen te shpia e nxenesit qe ka munguar prej kohesh ne shkolle. ketu te ne nje dite mos te vesh ne shkolle, te marrin ne tel prinderit brenda dites dhe e paralajmerojne se femija e tyre nuk eshte paraqitur ne shkolle.