Tushemishti :P

[Altin111]

Tushemishti në verë me plazh bashkëkohor dhe luk modern

Vetëm nëse kalon për në Tushemisht befas ndesh me punën e ekskavatorëve që po sistemojnë një sipërfaqe plazh, në një gjatësi prej 2,5 km gjatësi dhe 30 m gjerësi nga bregu, që shtrihet nga rezidenca qeveritare deri në Tushemisht. I gjithë bregu dhe fshati Tushemisht është kthyer në një kantier të madh ndërtimi dhe sistemimi. Ekskavatorët punojnë në breg të liqenit, ndërkohë në fshat kanë filluar puna për sistemimin e trotuareve anësore. Kryetari i komunës Buçimas, Roshi Tollozhina thotë se, megjithëse ka vetëm 6 muaj në krye të komunës Buçimas, po punon që ta mbajë premtimin elektoral gjatë fushatës për t’i shërbyer komunitetit .

“Ajo që e veçon këtë komunë, është një vijë liqenore gati 3 km e gjatë nga Rezidenca Qeveritare deri në fshatin turistik të Tushemishtit, tashmë me shumë emër për pushuesit vendas dhe ata të huaj. Por ajo që e veçon Pogradecin dhe Tushemishtin që e ka komuna jonë është liqeni, ky simbol i turizmit pogradecar. Një liqen i pastër dhe një breg liqenor i bukur, i jep vlera të veçanta komunës sonë. Unë nuk mund të pranoja atë vijë liqenore të padenjë, me një plazh që ngjante me një vendgrumbullim plehrash ,i cili do të zhgënjente dhe do të largonte vizitorët, prandaj unë e nisa që tani punën që sezoni i ri turistik të afrojë pamje të kulturuar”,- thotë Tollozhina.

Falë këmbënguljes së kryetarit të komunës Ministria e Bujqësisë solli ekskavatorët, ndërsa ministri i Financave siguroi lëvrimin e fondit prej 50 milionë lekësh, duke shpresuar se këtë plazh prej 2,5 km gjatësi dhe 35 m gjerësi, do ta kishte zili edhe bregdeti.

***

Tollozhina thotë se koncepti për turizmin nuk nënkupton vetëm pushues që vijnë për të shijuar freskun e liqenit dhe bukuritë që kanë ujërat nëntokësore të Tushemishtit apo parkun e Drilonit. “Ne duhet të arrijmë që të thithim edhe turistët që vijnë tek vendi fqinjë apo manastiri i Shën Naumit, pasi distanca nga Tushemishti është vetëm 2-3 km larg. Por kjo do të arrihet pasi ne të kemi sistemuar burimet e ujit në qendër të fshatit, të rishtrohen rrugët e fshatit më kalldrëm. Në shtëpitë karakteristike tushemishtare të gjesh butet e verës, kazanët e rakisë të prodhuara në mënyrë artizanale, tavat e koranit”.

Në Tushemisht, artistja e popullit Violeta Manushi ka fituar nderimin për përjetësimin në celuloid, që i bëri fshatit me filmat “Zonja nga qyteti” dhe “Shoqja nga fshati”, ndaj banorët kanë vendosur të ngrenë në qendër të fshatit monumentin e Violeta Manushit. Ndërkohë ka filluar ndërtimi i trotuareve në të dyja anët e rrugës nga Driloni në Tushemisht, që do të ketë ndriçim të veçantë vende për parkim, gjelbërim dhe parcela lulesh. Kur të vijnë vizitorët në Tushemisht, do të kenë mundësi të zbulojnë të gjitha të fshehtat e Tushemishtit, me kishat e vjetra, atë të Pandelimonit dhe kishat e Najzamës, në breg të liqenit, që ka Tushemishti.

Komuna ka menduar edhe për turizmin ndër-rajonal, për ta shndërruar zonën e Tushemishtit me fshatrat turistike të Maqedonisë dhe Shën Naumin në një rreth turistik pa kufij, ku Tushemishti duhet të ketë vendin e vet të rëndësishëm. Për të ndaluar degradimin e mjedisit, është bllokuar edhe një gurore që ishte në kodrat e fshatit, pa leje, e cila ka dëmtuar kurorën e gjelbër të fshatit Tushemisht. Kryetari i komunës shpreson se të gjitha kodrat do të ripyllëzohen, pasi kjo është e përcaktuar edhe me Vendimin Nr.8744, datë 22.02.2001 dhe betohet se nuk do të njohë asnjë lejë tjetër, as nga Ministria e Mjedisit apo Drejtoria e Pyjeve, për të ngritur gurore mbi fshatin Tushemisht.