Tetor i frikshëm në Tiranë, 13 krime në ditë.

[Altin111]

Qetësia e kryeqytetit trazohet nga vrasjet e vetëvrasjet

Çdo ditë tetori, Policia e Tiranës është përballur me 13 krime, duke sjellë një shifër jo të vogël të kriminalitetit. Kjo shifër është publikuar në analizën mujore të Drejtorisë së Policisë së Tiranës, ndërkohë që ka pasur edhe muaj, ku mesatarja ka arritur në 17 krime në ditë. Sipas të dhënave zyrtare, situata kriminale në shkallë qarku paraqitet me 377 krime të evidentuara, ndërkohë që janë zbuluar 300 prej tyre, ose e thënë ndryshe, 80% e gjithë ngjarjeve. "Ndërkohë janë implikuar gjithsej 358 autorë, ku në sajë të masave të marra janë arrestuar 92 autorë të dyshuar, 148 ndiqen në gjendje të lirë. Gjithashtu, janë kapur 50 persona të shpallur në kërkim për vepra të ndryshme penale", detajohet në analizën e policisë.

Krimi i Organizuar

Në analizën mujore, policia deklaroi se organizimi e finalizimi i operacioneve policore për goditjen e aktivitetit kriminal në fusha të ndryshme të krimit të organizuar ka qenë baza themelore e punës së sektorit të luftës kundër krimit të organizuar. Kështu strukturat e këtij sektori, gjatë muajit tetor, kanë intensifikuar punën për goditjen e krimit të organizuar. Ndërkohë, është përmirësuar puna në drejtim të identifikimit dhe goditjes së grupeve kriminale. Ky sektor ka evidencuar 79 vepra penale, ndërsa janë implikuar dhe proceduar penalisht 87 autorë, nga të cilët 31 janë arrestuar në flagrancë dhe 56 ndiqen në gjendje të lirë. Në lidhje me ecurinë e veprimtarisë kriminale dhe luftën ndaj saj nga ana e policisë, specialistët shpjeguan se po të krahasohet me të njëjtën periudhë të vitit të kaluar, janë evidentuar 11 vepra penale më shumë. Pra krimet kanë ardhur në rritje. Megjithatë, në analizën e uniformave blu kryeqytetase vihet re se gjatë muajit tetor janë realizuar tetë operacione të Krimit të Organizuar, duke përfshirë gjithë drejtimet e tij

Droga & krimi ekonomik

Ndërsa Seksioni i Luftës Kundër Drogës ka evidentuar dhe zbuluar 8 raste të shitjes dhe shpërndarjes së lëndëve narkotike me 13 autorë, të cilët janë arrestuar në flagrancë. Kurse seksioni i antikrimit ekonomik për periudhën 1-mujore ka evidentuar 50 vepra penale me 51 autorë, nga të cilët 7 të arrestuar në flagrancë dhe 44 të proceduar në gjendje të lirë. Në lidhje me këtë të fundit, po të krahasojmë me të njëjtën periudhë të vitit të kaluar janë evidentuar 11 vepra penale më tepër si dhe të proceduar 6 autorë më tepër. Po ashtu, seksioni i antitrafikut, gjatë këtij muaji ka evidencuar 21 raste të veprave penale të këtij drejtimi. Në këto vepra penale janë implikuar dhe proceduar 23 autorë, 11 prej të cilëve të arrestuar dhe 12 në gjendje të lirë.

Krimet e Hapura

"Një punë efektive është bërë në luftën për parandalimin e Akteve Terroriste dhe Krimeve të Hapura. Këto struktura për këtë periudhë njëmujore, kanë pasur si prioritet të punës së tyre evidencimin sa më të plotë të veprave penale, ndjekjen, zbulimin, parandalimin e veprimtarisë kriminale, kapjen e autorëve të tyre, si dhe organizimin e një punë sa më racionale e eficente nga ana e punonjësve të kësaj strukture", detajoi policia. Më tej, u shpjegua se nga ky seksion janë evidentuar gjithsej 298 vepra penale dhe janë zbuluar 225 prej tyre ose 76%. Janë arrestuar në kushtet e flagrancës 61 persona, proceduar në gjendje të lirë 192 persona.

Vetëvrasjet & vrasjet

Ndërkohë, gjatë muajit tetor janë shënuar dy vrasje, tashmë të dokumentuara dhe kanë ndodhur pesë plagosje. Po për këtë periudhë vihet re një rritje e vetëvrasjeve, ku janë evidentuar 7 të tilla. "3 janë kryer me helmim, 3 me armë zjarri dhe 2 me mjete të tjera, ndërkohë që janë evidentuar 2 raste vetëvrasjesh të mbetura në tentativë", shtoi policia. Në lidhje me këtë, Policia e Tiranës shpjegoi se ka pasur edhe të arrestuar për shtyrje në vetëvrasje, veprim i cili nuk është evidentuar në muajt paraardhës. Gjithashtu, gjatë muajit tetor janë zbardhur dy vrasje të vjetra.




Statistikat

Salla operative: Rriten denoncimet e qytetarëve


Fluksi i denoncimeve në sallat operative ka ardhur në rritje. Kështu konstatohet nga Policia e Tiranës, e cila deklaron se kjo rritje ka ardhur gjatë muajve të fundit. "Sidomos pas operacioneve të fuqishme që janë kryer nga ana e kësaj drejtorie, qytetarët kanë rritur denoncimet e tyre", tha policia. Sipas Drejtorisë së Policisë së Tiranës, nga seksioni i Emergjencave dhe Sallave Operative, gjatë muajit tetor kanë mbërritur 544 telefonata, ku të ndara sipas zërave janë 336 ose 83% për ndihmë nga publiku, 36 raste ose 9% për shkelje të rregullave të qarkullimit rrugor, 3 raste ose 1% për zhurma në lokale gjatë natës, 19 raste ose 5% për rënie zjarri dhe disa raste ose 3% për ngjarje kriminale. Ndërkohë, seksioni i Policimit në Komunitet ka pranuar 4214 dokumente nga shtetas të ndryshëm, nga këto me prokurë kanë aplikuar 841 shtetas. Kurse seksioni Patrullës së Përgjithshme Speciale, si një strukturë e sapokrijuar, do të shndërrohet në shërbimin policor shqiptar, partnere e denjë përkrah agjencive të tjera euroatlantike në drejtim të zbatimit me rigorozitet të ligjit". Patrullat kanë realizuar 21 kapje në flagrancë. Policia shpjegoi se gjatë muajit tetor janë verifikuar dhe kontrolluar 3275 persona, janë shoqëruar në drejtori dhe në komisariate 545 shtetas. Për identifikimin dhe zgjidhjen e konflikteve me iniciativë, bashkëpunim me sallën operative dhe kërkesës së qytetareve, është ndërhyrë në 9352 raste. Ndërsa shërbimet e Policisë Rrugore janë angazhuar në drejtim të parandalimit, konstatimit dhe ndëshkimin e shkeljeve të qarkullimit rrugor, në veçanti ndaj atyre burim aksidentesh, me qëllim rritjen e sigurisë rrugore. Gjatë muajit tetor kanë ndodhur 39 aksidente me 4 të vdekur, 15 persona të plagosur rëndë dhe me 29 të plagosur lehtë.