Ja si i vjedh shteti grek emigrantët shqiptarë.

[Altin111]

Shteti grek ka disa muaj që tashmë kërkon vetëm nga emigrantët shqiptarë një procedurë krejtësisht të jashtëligjshme, të paprecedentë, jo vetëm në kundërshtim të plotë me Kushtetutën greke, por edhe me marrëveshjet dhe ligjet ndërkombëtare.
Shteti grek u kërkon vetëm emigrantëve shqiptarë, që t’u legalizojë certifikatën familjare në shumë shërbime të emigrantit me administratën greke, të vulosin këtë certifikatë, kundrejt një pagesë mjaft të shtrenjtë (2.800 lekë të reja), në konsullatat greke në Tiranë, Gjirokastër dhe Korçë.
Pra, një certifikatë familjare e dhënë nga autoritetet shqiptare, duhet të vuloset për “verifikim” edhe nga misionet diplomatike greke në Shqipëri! Deri më sot, asnjë shtet në botë nuk kërkon, sepse kjo është plotësisht në kundërshtim me çdo të drejtë ligjore ndërkombëtare, që të vërtetojnë për vërtetësi misionet e tyre diplomatike një pasuri që i përket vetëm një shteti tjetër. Certifikata familjare e shqiptarëve e lëshuar nga autoritetet shqiptare është pronë ligjore vetëm e shtetit shqiptar.
Që të legalizohet dhe të njihet vlefshmëria e certifikatës të një shtetasi të huaj në një shtet tjetër, është e drejtë e shtetit tjetër, që ta përkthejnë autoritetet e saj. Por, kurrsesi nuk mund ta vërtetojnë nga ana ligjore misionet diplomatike të shtetit tjetër. Veç shkeljeve ligjore ndërkombëtare, si edhe Kushtetutës të shtetit grek në rastin e lartpërmendur, vula diplomatike e konsullatave greke në certifikatat familjare të emigrantëve shqiptarë, veç në kundërshtim me ligjin dhe kushtetutën, është edhe një praktikë e spiunazhit diplomatik.
Ja pse është praktikë e spiunazhit diplomatik.
Lind pyetja: Ligjërisht, a mundet që një konsullatë e huaj në Shqipëri të vërtetojë sa e vlefshme është një dokument pasurie e shtetit shqiptar, sikurse është certifikata familjare? Kurrë, sepse, veç burimeve të spiunazhit, asnjë mision diplomatik, qoftë edhe konsullatat greke, nuk mund të jenë të gjendje të vërtetojnë sa e vlefshme, është certifikata familjare e dhënë nga gjendjet civile në Shqipëri. Shqipëria, kurrë nuk ka dhënë konsullatave greke regjistrat themeltarë të gjendjes civile. Por edhe bashkëpunimi i Shqipërisë dhe i Greqisë për të vërtetuar konsullatat greke në Shqipëri certifikatat shqiptare nuk ekziston. Po të ndodhte, shteti shqiptar do të shkelte kushtetutën e tij. Nga ambasada shqiptare në Athinë, (diplomati shqiptar nuk kërkon të identifikohet) na thonë se kërkesa që konsullatat greke në Shqipëri të vulosin (kundrejt pagesës mjaft të shtrenjtë) certifikatat e emigrantëve shqiptarë është vetëm që Greqia të vjedhë ekonomikisht të ardhura, dhe veprimi i Greqisë është i njëanshëm, pasi nuk është kërkuar as mendimi dhe as bashkëpunimi me palën shqiptare. Përkundrazi, shteti shqiptar është kundër, po nuk ka asnjë mundësi praktike ta pengojë Greqinë në procedurën pa precedent të vulosjes të certifikatave familjare të emigrantëve nga konsullatat greke në Shqipëri.
Avokati grek Janis Cidhimbidhis, na u përgjigj prerë për këtë procedurë pa precedent të shtetit grek për të vulosur njëanshmërisht certifikatat e emigrantëve shqiptarë: “Ligjërisht, me vulosjen e certifikatës shqiptare nga ana e konsullatave greke në Shqipëri, shteti grek është në kundërshtim edhe me Kushtetutën tonë. Asnjë nen i Kushtetutës greke, asnjë nen i ligjshmërisë civile dhe penale nuk kërkon që shteti grek të vulosë certifikata familjare të shtetasve të huaj. Kurrsesi, Greqia nuk mund të vlerësojë ligjërisht vlerën e një dokumenti të shtetit tjetër, vetëm me vulat e shtetit të vet”.
Por, vulosja e certifikatës shqiptare nga konsullatat greke ka edhe odisenë e saj.
I interesuari, që është emigrant në Greqi, dhe për shkaqe të njohura, si mosdhënia e leje qëndrimit nga administrata greke për shkak (të paktën) të burokracisë e ka të pamundur të paraqitet vetë në konsullatat greke në Shqipëri. Praktikat zbatuese të ligjit të Emigracionit në Greqi i ndalojnë emigrantit të qarkullojë i lirë jashtë Greqisë (për në Shqipëri), në çdo kohë.
Por, konsullata kërkon vetëm të interesuarin, ose një person me të njëjtën mbiemër. Për çdo rast, duhet mbyllur takimi me anë të telefonit të shërbimit konsullor grek 0900404404. Një telefon që paguhet shumë shtrenjtë. Një tjetër mënyrë kjo e vjedhjes ekonomike që konsullatat greke veprojnë kundër emigrantëve shqiptarë.
Asnjë emigranti, me shtetësi tjetër, Greqia nuk i kërkon që konsullatat e saj në atë shtet të vulosin certifikatat familjare. Pra, është e qartë, që Greqia i vjedh ekonomikisht vetëm emigrantët shqiptarë. Shteti shqiptar është i pamundur të reagojë, të mbrojë emigrantët nga një vjedhje kundërligjore e Greqisë ndaj shtetasve të vet emigrantë.
Rasti i dytë dëshmon për një tjetër vjedhje. Bashkia e Athinës, jashtë çdo ligji grek, si edhe në kundërshtim edhe me ligjin e Emigracionit 3386/2005, muajt e fundit shet shpresa të vdekura, për emigrantët e paligjshëm në Greqi, kundrejt një pagese 150 euro.
Bashkia e Athinës, u shet emigrantëve të paligjshëm një copë letër “Vërtetimi i bardhë”, njëfarë dëshmie që emigranti ka paguar 150 euro në bashki dhe kjo dëshmi, dikur, mund të përdoret si një vërtetim që emigranti ka qenë i ...pranishëm në Greqi ...dikur....
Sipas ligjit grek të Emigracionit, emigrantëve u jepen “Vërtetimi” blu , ku vërtetohet që ka dorëzuar dokumentet për ligjësim dhe riligjësim. “Vërtetimi” rozë (nuk ka lidhje me PS-n në Shqipëri...) që emigranti ka mungesa në dokumente. Për “Vërtetim” të bardhë nuk bëhet fjalë. Është mënyra më e re vetëm e bashkisë së Athinës për të vjedhë ekonomikisht emigrantët e paligjshëm.
Për të ballafaquar të vërtetën, po shkruaj fjalë për fjalë dialogun me punonjësen e zyrës të emigracionit në bashkinë e Athinës.
-Zonjë, duke paguar sot emigranti i paligjshëm 150 euro, dhe me “Vërtetimin e bardhë” që i jepni ju si bashki, a mund të ligjësohet sipas ligjit të Emigracionit 3386/2005?
- Jo, ne nuk kemi ndonjë udhëzim qeveritar që me këtë “Vërtetim të bardhë” që u japim sot emigrantëve të paligjshëm, do të ligjësohen.
-Atëherë, ju përse u jepni? Përse emigranti duhet të paguajë 150 euro?
-Mund të shërbejë ndonjëherë si dëshmi që ka qenë në Greqi. Eurot duhet ti paguajë për shpenzimet e bashkisë.
-Ju keni ndonjë udhëzim qeveritar që u jepni emigrantëve të paligjshëm “Vërtetim të bardhë” me pagesë 150 euro?
-Jo, këtë e bëjmë ne si bashki. Kush të dojë paguan, ne nuk detyrojmë asnjë emigrant.
-Derisa nuk është me ligjin e Emigracionit, ju përse i shisni emigrantëve shpresa të vdekura?
-Nuk shesim shpresa. Ne ndihmojmë emigrantët , që nesër të vërtetojnë që kanë qenë në Greqi.
-Me pagesën e 150 eurove në bashkinë tuaj?
- Ik, ankohu ku të duash. (dhe thërret policin e bashkisë për shqetësimin e interesimit tonë).
-Zonjë, asnjë bashki tjetër në Greqi nuk shet “Vërtetime” me 150 euro emigrantëve të paligjshëm. Vetëm ju, si bashki e Athinës. Ju a nuk jeni ju, bashkia e Athinës, kundër ligjit grek?
Po nuk morëm ndonjë përgjigje, pasi polici i bashkisë, me dhunë na largon nga zyra e emigracionit të bashkisë të Athinës.