Thahet Tirana, dy ditë pa ujë.

[Altin111]

Ndërprerja totale nis pasditen e të hënës. Nuk kursehen as spitalet, çerdhet dhe kopshtet. Drejtoria: Do riparojmë Bovillën

Njoftimi më i fundit i Drejtorisë së Ujësjellës-Kanalizimeve është për më shumë se 24 orë "kufizim" të ujit. Këtu nuk bëhet fjalë për "shterim" të Bovillës ose Selitës, por thjesht për një riparim sistemi, i cili për t‘u rehabilituar duhet të ketë rrjet të thatë kanalizimesh. Konkretisht, zona që prek lagjet në Kinostudio, Rruga Bardhyl, Medreseja, "Ali Demi", bulevardi "Zhan D‘Ark", "Bajram Curri", blloku nga materniteti i ri "Koço Glozheni" e deri te blloku "Vasil Shanto", zona e Bathores, Paskuqani, zona e Unazës së Re, lagjet përreth maternitetit "Mbretëresha Geraldinë", si dhe zona të tjera që përfshijnë furnizimin e Bathores, do të mbeten pa ujë. Sipas Drejtorisë së Ujësjellës-Kanalizimeve, nga kufizimi i më shumë se 24 orëve do të preken të gjitha institucionet shtetërore, çerdhet, kopshtet, shkollat, apo qendrat shëndetësore, duke bërë përjashtim vetëm për spitalin universitar "Nënë Tereza". Ndërprerja e ujit do të fillojë nga pasditja e ditës së hënë e deri në orët e vona të së martës. Ky ka qenë parashikimi i ujësjellësit për sa i takon remontit që do të kryhet për sistemin e Bovillës. Sipas ujësjellësit dhe Drejtorisë së Shëndetit Publik, pastërtia e ujit të këtij impianti është garantuar. Ndotja e ujit me mikrogjallesa ndodh vetëm si pasojë e dëmtimit apo amortizimit të rrjetit nga mospastrimi i depozitave, apo nga kryqëzimi i tubacioneve.

Oraret e kufizimit të ujit të pijshëm nuk kanë ndryshuar me fillimin e verës 2007. Pas krizës së ujit që pësoi kryeqyteti, në mënyrë të veçantë nga mbipopullimi dhe kërkesa e lartë për ujë, Drejtoria e Ujësjellësit vendosi se banorët do të vazhdojnë me të njëjtat orare edhe për sezonin vjeshtë-dimër 2008. Aktualisht, në Tiranë Drejtoria e Ujësjellësit furnizon me ujë banorët vetëm 2 herë në ditë, një herë në mëngjes dhe njëherë në darkë. Ndërkohë që marrëveshja e drejtorisë me KESH nuk po gjen zbatim edhe pas 3 muajsh nënshkrimi. Kufizimet në këtë kohë, sipas ujësjellësit, janë në funksion të përmirësimit të rrjetit dhe furnizimit me ujë të qytetarëve.

"Në zbatim të kontratës së DPUK-së me shoqërinë "Liqeni VII" për "Spostimin e linjës 900 mm të marrjes së ujit nga N/H Bovillë" (në zonën shkarëse), si dhe nisur nga kushtet klimaterike, ujësjellësi vendosi që të lejojë shoqërinë "Liqeni VII" të fillojë punimet më datë 19, ora 18:00 deri në orën 06:00 të datës 20. Për shkak të boshatisjes së rrjetit për rreth 22 deri 27 orë, konsumatorët do të ndjejnë problemin e furnizimit me ujë, sidomos në pikat fundore të rrjetit, ku ndërprerja do të ndjehet për një kohë edhe më të gjatë. Institucionet shtetërore, subjektet private, si dhe familjarët, të marrin masa për përballimin e kësaj ndërprerjeje të detyruar të furnizimit me ujë.




Zonat që do të preken


Pjesa e qytetit që përfshin zonën e Kinostudios

Ali Demi

Krahu i djathtë i rrjedhjes së Lanës

Blv. "Zh. D‘Ark" - tek ura e Teknologjikut

Unaza e Re krahu i djathtë

Laprakë

Zona "V. Shanto"

Blv. "B. Curri" nga materniteti i ri

tek ura "V. Shanto" përfshirë burgjet,

maternitetin e ri dhe atë "Mbretëresha Geraldinë",

Spitalin Ushtarak,

poliklinikat,

kopshtet e çerdhet brenda këtij konturi,

Bathorja

Komuna Paskuqan

QSUT-ja do të furnizohet me linjë të posaçme



Ndërprerja e furnizimit me ujë për konsumatorët do të jetë nga ora 21:00, datë 19/11/2007, deri në orën 19:00 të datës 20/11/2007


Punimet fillojnë në datën 19/11/2007, ora 18:00 deri në orën 06:00 të datës 20/11/2007.


Gjatë kryerjes së punimeve, impianti Bovillë do të jetë jashtë pune nga ora 16:00 e datës 19/11/2007, deri në orën 09:00 të datës 20/11/2007