Masakra, rrefehet nena e vrasesit.

[Altin111]

MASAKRA E BERATIT

Nëna e fqinjët rrëfejnë si u rrit fëmija që më pas u kthye në vrasës. "Shikonte të atin qëmë rrihte mua e ashtu u bë edhe ai"

Rrëfimi i nënës: Përse u bë vrasës djali im 13- vjeçar

BERAT- "Djali im 13- vjeçar është bërë i dhunshëm duke parë të atin që më rrihte mua. Nuk kam se çfarë t'i bëj pasi ai nuk më dëgjon mua për asgjë. Ka frikë vetëm të atin por ai është në Greqi dhe tashmë nuk ka kush ta mbajë". Pohimi tragjik është bërë dje nga nëna e 13- vjeçarit që ka vrarë në mënyrë makabre një 47- vjeçare vetëm për t'i marrë 13 mijë lekë të vjetra. Nxënësi i klasës së 7-të ka dhënë edhe më parë shenja dhune kur është kthyer në tmerrin e të gjithë lagjes së tij por ankesat e shumta të fqinjëve janë anashkaluar nga të gjithë. Dhe u desh që ky fëmijë me probleme të shumta dhe i rritur në një ambient ku dhuna është zgjidhja e gjithçkaje të vriste një njeri që shteti të kujtohej se ai ishte një rrezik për të gjithë. Mungesa e trajtimit social dhe e kujdesit familjar e ka kthyer këtë fëmijë nga një nxënës të përkushtuar tek shkolla ku mësonte në një njeri agresiv dhe të rrezikshëm për të gjithë komunitetin. Madje edhe dje ai ka kërcënuar se do të vriste një polic, i cili i kishte rënë në qafë, nëse do të rifitonte lirinë. "Do të vras edhe policin që nuk më linte të vidhja. Është një polic që më kap gjithmonë dhe unë kam vendosur që të marr hak",- tha dje në spital 13- vjeçari.

Nëna

Mamaja e 13- vjeçarit vrasës qendronte dje në dyert e komisariatit të policisë. I biri ka vrarë një grua 47- vjeçare dhe ajo nuk di ende që të shpjegojë plotësisht se cilat janë shkaqet që e kanë shtyrë atë drejt një veprimi kaq makabër. "Shikonte të atin që më rrihte mua dhe ashtu u bë edhe ai. Më doli nga kontrolli dhe kishte frikë vetëm të atin por ai nuk ndodhet këtu tani". Kjo është përgjigjja e parë që jep nëna e 13- vjeçarit vrasës. Ajo vetë vuan nga një sëmundje e lehtë mendore dhe asnjë herë nuk ka mundur që të kontrollojë të birin e saj, i cili i bindej vetëm të atit. Ajo shpjegon se në formimin negativ e të dhunshëm të djalit të saj ka ndikuar edhe ambienti jashtë shtëpisë dhe shkollës. "Djali im rrinte gjithmonë me shokë jo të mirë dhe më të mëdhenj se vetja e tij. Ndoshta këta e kanë mësuar të kryente veprime të pahijshme apo të vidhte. Shpesh herë, në shtëpi, më vinin ankesa nga komshinjtë dhe moshatarët e tij. Kur unë i kërkoja llogari ai më kthehej dhe tregohej shumë agresiv",- tregon nëna e tij. Fillimisht ajo nuk e ka besuar se djali i saj mund të kishte kryer vrasjen por ku ka dëgjuar nga goja e tij rrëfimin e asaj që kishte ndodhur është dorëzuar dhe ka pranuar gjithçka në heshtje.

Fqinja

Një nga fqinjet e familjes Hoda tregon se 13- vjeçari ishte bërë shumë herë problem por të vetmit që kishin tentuar t'i jepnin një lloj ndihme ishin gjyshërit e tij. Edhe fqinjët e tyre mendojnë se shkaku që djali i vogël është kthyer në një vrasës të pamëshirshëm janë kushtet familjare. "Shpesh herë ai bëhej i dhunshëm dhe rrinte fëmijët e tjerë. Unë e njoh shumë mirë familjen e tij por 13- vjeçari shpesh herë rrihte djalin tij (janë moshatarë). Unë shkoja të ankohesha tek prindërit et ij por duket se edhe ata nuk kishin se çfarë t'i bënin. Duket se problemet madhore që kishte çifti, reflektoheshin edhe tek ky fëmijë. Të vetmit në familje që ishin të rregullt ishin gjyshja dhe gjyshi i tij, të cilit sapo ne ankoheshim për rrëmujën që bënte 13- vjeçari, ata jo vetëm të kërkonin falje por edhe i flisnin djalit",- thotë një nga fqinjet. Sipas saj, familjarët e dërgonin fëmijën të shiste bajame nëpër qytet duke e shfrytëzuar në maksimum. "Edhe i ati i tij është pak nevrik, apo më mirë të them njeri që nxehet shpejt, por fajin më të madh që djali i tyre arriti deri në vrasje e kanë familjarët e tij. Prindërit e tij janë sjellë keq në familje, ata ziheshin shumë herë në sy të fëmijës dhe babai i tij ushtronte dhunë në familje", -tregon fqinja. Sulo Gozhina

Fëmija vrasës "mbyllet" në spitalin e Beratit

Mosha e mitur e fëmijës që ka kryer vrasjen por edhe sjellja e tij kanë tronditur policinë e Beratit. Ata janë vënë në dilemë për vendin se ku do të mbahet fëmija vrasës dhe në fund kanë vendosur që ta shpien atë në një dhomë të veçantë të spitalit të qytetit. Ai do të ruhet gjatë të gjithë kohës nga policët që do të qëndrojnë tek dera por edhe do të jetë nën kujdesin e mjekëve psikiatër. Këta të fundit do të kujdesen për fëmijën deri sa të vendosë gjykata për fatin e tij. Prania e policëve në derën e njërës prej dhomave të spitalit ka bërë që shumë shpejt të përhapet lajmi e të gjithë të mësojnë se aty është shtruar fëmija që ka vrarë 47- vjeçaren e sëmurë mendore. Ndonëse në dhomën e tij nuk lejohet të hyjnë persona të tjerë veç policisë dhe personelit, njerëz të ndryshëm nuk e lënë pa humbur rastin për t'i hedhur një sy fëmijës vrasës. Mjekët thonë që ka nga ata pacientë që kanë shkuar edhe dy ose tre herë në dhomën e tij për ta parë se cili është autori i vrasjes makabre. Por kjo situatë nuk ka ndikuar aspak tek fëmija. Ai ka qendruar i qetë dhe ka ngrënë gjithçka që i kanë vënë përpara. S.G

Shkolla

Shokët e shkollës tregojnë se 13- vjeçari ishte një fëmijë problematik për të gjithë. Ai ka kaluar klasat "për inertësi" që mësuesit të mos merreshin sërish me të. Vetë shokët e klasës së tij shpesh herë ankoheshin për dhunën që ushtronte tek ta. R.H. kishte shfaqur edhe më parë shenja agresiviteti duke u grindur me shokët e tij dhe për këtë arsye ishte përjashtuar nga shkolla në klasën e 6-të. Prindërit i ndërruan shkollë por sërish u shfaqën problemet e dhunës.

Kufoma

Familjarëve të viktimës nga një fshat i rrethit të Beratit, u janë dashur katër ditë që të marrin trupin e 47- vjeçares nga morgu i qytetit. Të afërmit e 47- vjeçares nga fshati Skrevan i komunës Poshnje thanë se familja e Luftar Sinjarit jetonte në një varfëri të thellë dhe se mundësitë e kësaj familjeje për të bërë ceremoninë e varrimit ishin të pa mundura. Kanë qenë kushërinjtë e tyre ata që kanë marrë trupin nga spitali dhe kanë zhvilluar ceremoninë mortore.

Gjyshi

"Nipi ka vjedhur edhe paratë e gjyshes së tij"

Gjyshi i 13- vjeçarit ka rrëfyer dje se ai e ka rritur vetë fëmijën . "Deri në moshën 5 vjeç e kemi rritur ne pasi nëna e tij nuk e mbante dot. Ne nuk na është dukur e përshtatshme që ta rriste nusja pasi ajo është e sëmurë mendore. Djalin e kemi dërguar tek prindrit kur është regjistruar në klasën e parë. Në fillim ai ka mësuar, ndërsa më pas ka shfaqur shenja agresiviteti dhe vese të tjera të këqija. Madje ai ka vjedhur edhe gjyshen e tij duke i marrë 50 mijë lekë të vjetra",- tha dje gjyshi i tij. Sipas tij, djali ishte mësuar me shumë lekë dhe për këtë arsye ai u sulej dhe u merrte lekët që kishin me vete. "Por edhe pse mendohet se ai i ka bërë këto veprime unë them se janë të tjerët ata që mund ta kenë futur në këtë rrugë pa krye. Ndoshta janë djem më të mëdhenj që e përdorin",- thotë gjyshi i tij.

Për këtë ngjarje ai është akuzuar për vjedhje, dhunim dhe tentativë vrasjeje por ka shpëtuar për shkak të moshës

Policia: Fëmija ka tentuar të vrasë një 63- vjeçare

Policia e Beratit ka pohuar dje se 13- vjeçari ishte prej kohësh kontigjent për vjedhje me dhunë por mosha e vogël e kishte mbajtur larg qelisë. "Për vetë moshën e mitur ne nuk kishim se çfarë t'i bënim, pasi sipas ligjeve nuk mundet të merreshin masa shtrënguese për të. Ne nuk kemi një shkollë riedukimi për mbajtjen e fëmijëve të tillë",- thanë dje burimet e policisë. Sipas tyre, kohë më parë djali ka sulmuar një 63- vjeçare në afërsi të Urës Vajgurore. Ai e ka rrahur të moshuarën dhe i ka marrë paratë. Gruaja ka qendruar më shumë se dy javë në spital dhe për pak sa nuk ka vdekur. Për këtë ngjarje ai është akuzuar për vjedhje, dhunim dhe tentativë vrasjeje por mosha e ka shpëtuar sërish. Një rast tjetër dhune i dokumentuar nga ana e policisë së Beratit për 13- vjeçarin me inicialet R. H ka qenë edhe dhuna e ushtruar ndaj dy të miturave me të meta mendore. Vajzat ishin në një lagje me të dhe 13- vjeçari i ka rrahur disa herë ato. Sipas hetuesve, R.H është edhe autori i vjedhjes së parave të disa lypësve të mitur në qytetin e Beratit por në të gjitha rastet ka shpëtuar nga izolimi për shkak të mangësirave të ligjit dhe mungesës së një shkolle riedukimi.

Rrëfimi

Si mbyta me rripin e pantallonave gruan 47- vjeçare

I mituri ka treguar se ngjarja ndodhi mesditën e së hënës, në 12 nëntor. Sipas tij, rreth orës 12.30 minuta ai ishte takuar me gruan në fshatin Poshnje, para një lokali. «Gruaja ishte e ulur në gjunjë para lokalit dhe unë iu afrova dhe hyra në muhabet me të»- ka nisur rrëfimin ai. Sipas tij, në fillim, 47-vjeçarja nuk ka dashur të flasë, por ai i ka thënë se është jetim dhe i pangrënë. Pas kësaj, gruas i është dhimbsur dhe i ka premtuar ta marrë me vete në shtëpinë e saj, në fshatin Skrevan. «U nisëm në këmbë për në shtëpinë e saj dhe u ngjitëm në kodrën e Goricës»- ka vazhduar më tej rrëfimin autori. Sapo kanë mbërriturtek gropa e madhe mbi fshatin Pashalli, sipas djalit, nisi një shi i madh dhe ata iu afruan një bunkeri ku gruaja ndezi një zjarr për t'u ngrohur. Sipas dëshmisë, në momentin që ajo u ul të ndizte shkarpat, 13-vjeçari e ka mbytur me rripin e pantallonave. Madje ka treguar se për të qenë i sigurt, e ka tërhequr rripin duke e mbajtur në sup. Kur ka parë se gruaja kishte vdekur i ka bërë kontroll për paratë. Pas kontrollit ka gjetur në rrobat e saj vetëm 13 mijë lekë të vjetra. Më pas i mituri e ka hedhur viktimën në kanalin në hyrje të bunkerit dhe është larguar në shtëpi. Pyetjes së nënës për baltën që kishte në rroba, i është përgjigjur qetë: Po luaja me shokët!