Borë në Tiranë

**PinkPrincess** · 31-01-2012, 05:32 PM

Moti tepër i ftohtë me temperatura nën zero do të mbizotërojë në vend gjatë gjithë javës, kurse në Tiranë, bora e parë për këtë stinë dimri do të trokasë të mërkurën pasdite. Parashikimi i motit në BalkanWeb bën të ditur se, ditët që vijojnë do të jenë ekstremisht të ftohta në mbarë vendin, nuk pritet asnje permiresim, por duke nisur nga e mërkura dhe deri në fund të javës temperaturat do të bien ndjeshëm.

Në të dhënat më të fundit që disponon Shërbimi Meteroligjik Ushtarak konstatohet një përkeqësim i kushteve të motit, i cili në orët e pasdites do pasohet edhe me reshje bore në të gjithë territorin e vendit.

Temperaturat do pësojnë një zbritje të ndjeshme deri në 3 gradë më poshtë se dita e sotme, për të shënuar vlerën më të ulët në Peshkopi me -16 gradë celcius, në Kukës me -12 gradë, në Korcë me -10 gradë dhe në Tiranë me -1 gradë celcius.

Reshjet e borës sipas sinoptikanes Mimoza Demiri nga Shërbimi Meterologjik Ushtarak do të vijojnë përgjatë pasdites dhe natës së nesërme deri në mesditen e datës 2 shkurt.

Sipas të njëjtit burim në datën 3 shkurt pritet një rritje e lehtë e temperaturave, kurse kushtet e motit përgjatë kësaj periudhë do vazhdojnë të jenë të paqëndrueshme me reshje shiu dhe borë. Në datën 8 shkurt sinoptikanët parashikojnë një tjetër përkeqësim të ndjeshëm të motit, madje me vlera temperaturash shumë më të ulëta se sa ato që priten ditën e nesërme.

EVROPE
U duk se dimri këtë vit ishte më i butë se zakonisht, por nuk ndodhi kështu. Ulja e menjëhershme e temperaturave i ka gjetur shumë njerëz të papërgatitur.

Dhjetëra persona kanë humbur jetën nga të ftohtët në Evropën Qendrore dhe Lindore. Tridhjetë persona raportohet të kenë vdekur në Ukrainë, vetëm në pesë ditët e kaluara.

Policia në Poloni ka bërë të ditur për pesë viktima të reja të martën - duke çuar në 27 numrin total të të vdekurve gjatë janarit - pasi temperaturat gjatë natës kanë arritur në -30 gradë Celsius.

Dy njerëz kanë ngrirë në Rumani, tre në Serbi dhe një në Bullgari.

Tetëmbëdhjetë qytete bullgare, përfshirë dhe kryeqytetin Sofje, kanë regjistruar 31 janarin më të ftohtë, krahasuar me 100 vjet më parë. Temperatura sot ka shënuar -29 gradë celsius.

gazeta shqiptare