BE shtrëngon liberalizimin për Kosovën

[vaaldr1n]

Me gjithë dëshirën për të thënë se “detyrat e shtëpisë” për liberalizimin e vizave për Kosovën do të jenë të njëjta me vendet e tjera të Ballkanit Perëndimor, versioni fillestar i “Udhërrëfyesit” të vendit tonë ka nxjerrë në shesh një të vërtetë krejt tjetër.

Një analizë e bërë nga qeveria e Kosovës e siguruar nga “Zëri” numëron jo pak dallime mes “udhërrëfyesve” që i kanë pasur vendet e rajonit dhe atij që po diskutohet momentalisht mes Komisionit Evropian dhe vendeve anëtare të BE-së.

Qysh në ballinën e analizës qeveritare të emërtuar “Dallimet dhe risitë në draftudhërrëfyesin e 14 shkurtit 2012”, vlerësohet se dallimet janë substanciale me udhërrëfyesit e vendeve të tjera, por edhe me atë që e kanë hartuar vetë institucionet e Kosovës disa vjet më parë.

“Për dallim nga udhërrëfyesit për Liberalizimin e Vizave (ULV) të shteteve të tjera të Ballkanit Perëndimor, drafti i 14 shkurtit ka dallime substanciale si në qasje ashtu edhe në përmbajtje, të cilat do t’i elaborojmë më poshtë”, është vlerësimi i bërë nga zyrtarët qeveritarë që e kanë analizuar draftdokumentin evropian.

Analiza shtatëfaqeshe e qeverisë ndër të tjera përmend edhe atë që është nënvizuar edhe nga “Zëri” në raportin e së enjtes, është blloku numër tre që flet për luftën kundër korrupsionit.

Draft “Udhërrëfyesi” i Komisionit Evropian i kërkon Kosovës të hartojë një mori ligjesh, ndërsa ajo që bie në sy më shumë është kërkesa evropiane për hetimin e pasurisë së pashpjegueshme dhe ndërtimin e një sistemi të fuqishëm që do të merret me parandalimin dhe luftimin e krimit të organizuar.

Ndërkaq, analiza qeveritare e pranon se me kërkesat e bëra në kapitullin e “Rendit Publik dhe Sigurisë”, ku hyn edhe lufta kundër krimit të organizuar dhe korrupsionit vërehet qasje e re e cila nuk ka ekzistuar më herët. Në faqen 4 të analizës së bërë nga qeveria e Kosovës thuhet se “derisa vendeve të rajonit u është kërkuar vetëm ndërtimi i strategjive për të luftuar këto dukuri, në rastin e Kosovës (BE) e kanë ngritur rëndësinë e këtyre sfidave në nivel të legjislacionit”.

Me këtë kërkesë, duket sikur Bashkimi Evropian e ka humbur besimin se dukuritë e rënda të krimit të organizuar dhe korrupsionit mund të luftohen vetëm me strategji, ashtu siç e kanë bërë vendet e rajonit.

Kosova do të raportojë shumë shpesh

Në fakt, Qeveria e Kosovës ka vërejtur dallime substanciale që në hyrje të draft “udhërrëfyesit” të liberalizimit të vizave, duke vënë theksin e veçantë te implementimi sa më i duhur i procesit të riatdhesimit dhe riintegrimit. Mirëpo ajo që bën dallim të madh në krahasim me vendet e tjera të rajonit është te pjesa e monitorimit dhe raportimit, thuhet në analizën e qeverisë së Kosovës.

“Monitorimi do të jetë shumë më i shpeshtë dhe më rigoroz, ku përpos Komisionit Evropian do t’i raportohet edhe shteteve anëtare të BE-së gjithmonë duke u bazuar në vlerësimet e ekspertëve të shteteve anëtare të BE-së”, thotë analiza e qeverisë së Kosovës për versionin e parë të “Udhërrëfyesit” të vizave.

Në këtë pjesë, zyrtarë të qeverisë së Kosovës jozyrtarisht thonë se një atu e mirë për Kosovën është prania e EULEX-it, e cila do të ndihmojë jo pak në këtë drejtim. Dokumenti qeveritar që e ka analizuar në hollësi atë evropian flet me shqetësim edhe për atë që “Zëri” dje e ka raportuar, telashet që po i shkakton Franca dhe vendet e Beneluksit. Analiza qeveritare e Kosovës flet për një “qasje të dyfishtë” që është propozuar në veçanti nga Franca dhe vendet e Beneluksit, qasje kjo që tashmë thuhet në dokumentin e qeverisë, “vetëm ka filluar të marrë formë”.

Në përgjithësi versionin e parë të “listës së detyrave” të Komisionit Evropian për qeverinë e Kosovës “është shumë më teknik dhe më i detajuar, apo më mirë të themi derisa për shtetet e tjera kriteret kanë qenë më të përgjithësuara, në rastin e Kosovës janë zbërthyer në detaje më të vogla”.

Qeveria (nuk) shqetësohet nga dallimet substanciale

Pavarësisht dallimeve thelbësore me kushtet që KE duket se do i vendos për Kosovën, qeveria kosovare vlerëson se këto kushte nuk janë të pamundshme për t’u realizuar.

Dokumenti që e ka siguruar “Zëri” ka tetë rekomandime se çfarë duhet bërë për të arritur patjetër sukses, ndërsa në mesin e këtyre rekomandimeve është edhe hartimi i planeve të trajnimit për stafin relevant kundër korrupsionit, si dhe zhvillimi i fushatave për vetëdijesim kundër migrimit ilegal, si dhe informimin e qytetarëve rreth obligimeve që dalin nga vizat.

Gazeta “Zëri” ka provuar që të marrë një prononcim nga zyra e komisioneres evropiane për çështje të brendshme, Cecilia Malmstrom, e cila është përgjegjëse për dialogun e vizave, mirëpo kjo gjë ka qenë e pamundur. Zëdhënësi Michele Cercone ka qenë i zënë, ndërsa zyra për informim ka thënë se Komisioni Evropian nuk pranon të komentojë dokumentet që kanë “rrjedhur” jozyrtarisht nëpër medie.

Malmstrom ka qenë në Kosovë më 19 dhe 20 janar, ndërsa gjatë vizitës e ka nisur zyrtarisht dialogun me Kosovën për vizat, pa e pasur të gatshëm “Udhërrëfyesin” për vizat. Kjo do të jetë e gatshme në pranverë, ka thënë atëkohë Malmstrom.

Burimi:

ZERI.info