Mister vetëvrasja e 21-vjeçares në Kamëz

[Altin111]

Vajza e vetme e familjes gega u gjet e varur në një çarçaf në shtëpinë e saj në periferi të kryeqytetit. Policia: Nuk dihen motivet

I vëllai: U ndamë pak orë para vetëvrasjes dhe ishte e qetë. Më përshëndeti me dorë dhe më tha mirupafshim

Mbeten mister motivet që e kanë shtyrë një 21-vjeçare t'i japë fund jetës, duke u vetëvarur me çarçaf në shtëpinë e saj.Sajmira Gega 21-vjeçe është gjetur rreth orës 14:00 të ditës së djeshme e vetvarur në banesën e saj, që ndodhet në zonën e quajtur "Frutkultur' në Kamëz të Tiranës. Trupi i pa jetë i vajzës u gjet nga babai i saj, i varur me çarçaf në trarët e njërës prej dhomave të shtëpisë. Kryefamiljari ka dhënë menjëherë alarmin, ndërsa brenda pak minutash në banesën e tij mbërriti policia. Efektivat e komisariatit të policisë Nr.5, pohuan se kanë nisur hetimet për të zbardhur shkaqet që detyruan vajzën t'i japë fund jetës dhe sipas tyre nuk ka asnjë dyshim që kemi të bëjmë me një vetëvrasje. Familjarët e viktimës të kontaktuar nga gazeta, kanë bërë të ditur se nuk e dinin cilat ishin motivet e vetëvarjes dhe e njëjta gjë është pohuar edhe nga policia e cila tha se motivet e këtij vetëflijimi ishin ende të paqarta.

Ngjarja

Sajmira Gega ishte vajza e vetme e familjes. Ditën e djeshme ajo ka pritur që prindërit dhe vëllai i saj të shkojnë në punë, për të kryer veprimin fatal. Pasi lau të gjitha rrobat e saj, 21-vjeçarja me një çarçaf të përdredhur si litar e lidhi në trarët e tavanit të dhomës, me të cilin vari veten. "Sajmirën e lashë të qetë në shtëpi. Ajo më kërkoi të hanim drekë bashkë në shtëpi, por unë isha vonë për në punë dhe kështu u largova" tregoi për gazetën "Shekulli" vëllai i 21-vjeçares, katër vjet më i madh se e vetëvarura. "Vetëm pak orë më pas më telefonojnë të afërmit dhe më tregojnë se diçka nuk shkonte në familjen time. U nisa menjëherë pasi fillimisht dyshova mos i kishte ndodhur gjë babait, por kur mbërrita në shtëpi mësova se Sajmira ishte varur dhe kishte vdekur. Ende nuk më besohet veprimi i saj dhe që ajo ka vdekur" shtoi më tej 25-vjeçari. E reja punonte në një firmë private që prodhon trikotazhe. Por ditën e djeshme ajo e kishte pushim, dhe ka qëndruar e vetme në shtëpi. Familja Gega prej 11 vitesh kishin ardhur nga Puka, për të jetuar në periferi të Tiranës. Katër vjet më parë ata nisën të ndërtonin një shtëpi në zonën "Frutikulturë" e cila ende nuk është përfunduar për shkak të gjendjes jo të mirë ekonomike.

Motivet

Të shokuar, familjarët nuk dinë të thonë shkakun që e detyroi vajzën të dënojë veten me varje.

"Sajmira dukej e qetë, nuk kishte shfaqur shqetësime. Ajo ishte tip i qetë dhe e urtë. Nuk e di se çfarë e shtyu atë të vriste veten" tregoi vëllai i Sajmira Gegas, duke mos gjetur ndonjë problem cili do të justifikonte sadopak veprimin fatal të saj. "Pak orë para se të varej, ajo dukej shumë e qetë. Vëllaçko mirupafshim,ishin fjalët e fundit që dëgjova prej saj, pak orë para se të vdiste" shtoi më tej 25-vjeçari. Sajmira Gega ka mundur të fshehë mirë problemin e saj i cili e çoi në vetvarje, duke mos i rënë në "sy" prindërve dhe vëllait. Ndërkohë që deri në orët e mbrëmjes edhe policia nuk mundi të zbardhte shkakun e këtij vetëflijimi. Trupi i pa jetë i së resë iu nënshtruar ekspertizës mjeko-ligjore ndërsa iu dorëzua familjarëve rreth orës 19:00. Nën dritën e qiririt, familjarët e viktimës, me mundim dallonin njerëzit të cilët mbërrinin për ngushëllim. Sot në orën 15:00 trupi i pajetë i 21-vjeçares do të përcillet për në banesën e fundit.