Parada, ushtria shqiptare tregon "muskujt" para NA

[Altin111]

Topi: Forcat tona të Armatosura po operojnë që tani si pjesë e Aleancës Atlantike

Ushtria shqiptare ka demonstruar dje në bulevardin "Dëshmorët e Kombit" arsenalin e saj luftarak dhe disiplinën e saj, në përkujtim të 95-vjetorit të krijimit të armatës së parë shqiptare pas shpalljes së pavarësisë në vitin 1912. Të pranishëm në këtë ceremoni ishin Presidenti i Republikës, njëkohësisht Komandant i Përgjithshëm i Forcave të Armatosura, Bamir Topi, Kryeministri Sali Berisha, Kryetarja e Kuvendit, Jozefina Topalli, anëtarë të kabinetit qeveritar dhe ushtarakë të lartë të FA-ve, përfaqësues të trupit diplomatik dhe atashe ushtarakë të akredituar në vend, ish-kryeministra e drejtues të lartë të Ministrisë së Mbrojtjes dhe ushtrisë, përfaqësues të forcave politike etj. Ceremonia nisi me ekzekutimin e Himnit Kombëtar dhe, më pas, me paraqitjen e forcës nga shefi i Shtabit të Përgjithshëm të Forcave të Armatosura, gjenerallejtënant Luan Hoxha, te Komandanti i Përgjithshëm i Forcave të Armatosura, Presidenti Topi. Në fjalën e tij përshëndetëse, Presidenti Topi vlerësoi përparimin e Forcave të Armatosura, duke e cilësuar atë të dukshëm. "Po t‘u referohem vlerësimeve të aleatëve, Forcat e Armatosura të Shqipërisë e kanë fituar tashmë statusin e të qenit anëtar të Aleancës, duke u sjellë e operuar si pjesë e saj", theksoi Presidenti Topi. Në paradë parakaluan të gjitha njësitë e Forcave të Armatosura shqiptare, ku çdo kuadrat përfaqësonte një strukturë të caktuar, si dhe gjithë mjetet ushtarake, të specifikuara sipas funksionit të njësive ushtarake. Për herë të parë në historinë e paradave të Forcave të Armatosura Shqiptare, parakaluan edhe ushtarakë të vendeve partnere të NATO-s. Në këtë paradë, parakaluan 29 kuadrate, me rreth 2500 pjesëmarrës, 50 mjete të Komandës së Mbështetjes, 28 mjete operacionale dhe 5 helikopterë të Komandës së Forcës së Bashkuar. Përkrah trupave të Forcave tona të Armatosura ishin të pranishëm në paradë dhe përfaqësues ushtarakë të vendeve të NATO-s dhe atyre të A 3, të cilët parakaluan duke mbajtur flamujt e vendeve të tyre. Kështu, parakaluan përfaqësuesit e SHBA, aleatit më strategjik të Shqipërisë, të Francës, Turqisë, Greqisë, si dhe të Kroacisë dhe Maqedonisë. Gjatë paradës u mbajtën 26 flamuj kombëtarë të vendeve anëtare të NATO-s. Kuadrati i parë ishte ai i veteranëve, ku parakaluan 80 pjesëmarrës. Ndërkohë, në paradë parakaluan dhe mjete luftarake të operacionit dhe mbështetëse. Kështu, parakaluan mjete luftarake të Komandës së Forcës së Bashkuar, një njësi e motorizuar të Brigadës së Reagimit të Shpejtë, mjete të transportit të Reagimit të Shpejtë, por dhe mjete të Regjimentit Komando, autoambulanca. Mjetet e blinduara, mjete me trupa të mbështetjes në shërbime dhe logjistikës, mjete të Policisë Ushtarake, mjete të qendrave të ndërlidhjes, mjete të transportit të trupave në operacione të ndryshme, në shërbim të komunitetit dhe në stërvitje, mjete të transportit logjistik parakaluan më pas para tribunës me të pranishmit. Helikopterët e Brigadës Ajrore, shqiponjat e ajrit, parakaluan më tej në paradë, duke ua lënë vendin mjeteve speciale të ushtrisë. Parada e parë e Forcave të Armatosura është zhvilluar në vitin 1927.


Aleatët

Për herë të parë në historinë e paradave të Forcave të Armatosura shqiptare, parakaluan edhe ushtarakë të vendeve partnere të NATO-s. Në këtë paradë, parakaluan 29 kuadrate, me rreth 2500 pjesëmarrës, 50 mjete të Komandës së Mbështetjes, 28 mjete operacionale dhe 5 helikopterë të Komandës së Forcës së Bashkuar