Varfërohet tavolina e Vitit të Ri

[Altin111]

Çmenden çmimet. Në treg është e vështirë të gjesh fruta, perime apo zarzavate që të kushtojnë nën 1 mijë lekë të vjetra. Më të preferuarit duket se janë specat, të cilët kushtojnë 2500 lekë, ndërsa edhe kivi, dardhat, por edhe mollët kanë çmim mjaft të lartë në këtë fund viti, krahasuar me një ose dy muaj më parë.
Më një rrogë minimale nuk blen dot asnjë lloj frute. Jo vetëm të tregu i fruta-perimeve pranë sheshit “Avni Rustemi”, por në të gjitha pikat e shitjeve në kryeqytet nuk gjen asnjë lloj frute më pak se 150 lekë për kilogram. Me sa duket, për festat e fundvitit tavolina e Vitit të Ri do të jetë shumë e limituar në ushqime, por mbi të gjitha e varfër. Ka nga ato familje që do të heqin dorë edhe nga tradita e gjelit të detit, pasi nuk ja dalin dot. “Këtë vit nuk do blej gjel deti, janë shumë shtrenjtë. Do marrë më mirë mish qengji ta bëj në furrë. Nuk ja dalim dot, vetëm unë punoj në shtëpinë time, ndërsa burrin e kam pa punë se është invalid, dhe djali është në shkollë”, - kështu ka deklaruar për gazetën Bedria. Jo vetëm ajo, por edhe shumë familje të tjera shqiptarë do të bëjnë pa gjelin e Viti të Ri për shkak të çmimeve të larta, por edhe të të ardhurave të vogla që ata kanë.
Çmimet
Rritja e vlerës së produkteve ushqimore gjatë muajit dhjetor po bën që shumë familje të kenë probleme më të ardhurat e tyre. Kjo gjë nuk ka prekur vetëm kategori të caktuara që kanë të ardhura të pakta në një muaj, si pensionistët, familjet në nevojë. Rritja e çmimeve të menjëhershme të produkteve ushqimore ka prekur edhe familjet me të ardhura mesatare. “Nuk blej dot fruta, sepse vetëm gjatë një dite që bëj pazar më ikin 50 mijë lekë, vetëm me gjera të domosdoshme për të bërë dy apo tre herë gjellë. Duhet të matem dy herë për të blerë një kilogram mollë. Është skandal. Nuk ja dalim dot me këto çmime. Tani për Vit të Ri në vend që të ulen çmimet se të gjithë blejnë, këta i rrisin. Normalisht që në tavolinat tona do mungojë shumë gjëra”, - shprehët një grua. Por më të diskriminuar janë pensionistët, të cilët nuk duhet të maten një herë, por dhjetë herë të blerë një kilogram mollë, pasi kushtojnë 150 lekë. “Kam harruar herën e fundit që kam blerë fruta, por me rastin e festave do detyrohemi të shtrëngohemi që të blejmë ndonjë kilogram, se është e traditës. Me pensionet tona nuk blejmë dot asgjë, jo më fruta, të cilat duhet t`i shohim me dylbi. Me këto çmime që po kapin majën, nuk do arrijmë të blejmë as buke, se dhe ajo po rritet përditë me nga 100 lekë”, - thotë një pensionist për gazetën. Ankesat e pensionistëve janë të shumta në lidhje me rritjen e çmimeve, pasi në krahasim me të ardhurat e tyre mujore çmimet janë 10-fish më të shtrenjta. “Me këto pensione nuk kemi ç’të bëjmë më parë! Të paguajmë ujë e drita, të blejmë ilaçe, pasi jemi dhe në një moshë që nuk rrimë dot pa ilaçe, apo të hamë bukë?!” - shprehet i irrituar plaku. Ndërsa shitësit e ndryshëm që shesin fruta, perime, vezë apo produkte të tjera ushqimore, çmimet e larta i justifikojnë me faktin se edhe ata vetë po i marrin më të shtrenjta se muaj më parë. “I marrim më shtrenjtë këtë muaj produktet që tregtojmë, nuk i kemi rritur kot çmimet. Me këtë punë mbajmë familjet”, -shprehet një tregtar.

[ReniX]

ca do bejne dhe tregetaret, por thuaj qe bie ne koke te konsumatorit, dhe shume nuk e perballojne dot