Autori: Drejtësia më detyroi të bëhem vrasës

[Altin111]

Hakmarrja, gjashtë plumba kunatit për vrasjen e dy fëmijëve

Mos më arrestoni se vetëm vendosa drejtësinë që shteti nuk e realizoi dot. I mora jetën atij që më vrau dy fëmijët. Këto kanë qenë fjalët e 62-vjeçarit, Hasan Onuzi, në momentet e arrestimit, i cili sapo kishte ekzekutuar Jeart Dokun. Ngjarja tragjike ka ndodhur mesditën e djeshme në kryqëzimin e Rrugës së Dibrës me Unazën në Tiranë, kur Onuzi ka vënë re rrugës, personin për të cilin dyshonte se i kishte trafikuar e më pas vrarë vajzën. "Veç kësaj, më ka vrarë edhe djalin", është shprehur 62-vjeçari para oficerit të policisë gjyqësore.

I moshuari Onuzi ka qenë duke dalë nga tregu i madh, në afërsi të Farmacisë nr. 10, kur pak më tutje ka vënë re Jeart Dokun, i cili shoqërohej nga një person tjetër dhe në dorë kishte një kanaçe me pije freskuese. Për momentin ka mbetur i shtangur, pasi mendonte se 47-vjeçari Doku ndodhej në burg. E ka ndjekur nga pas dhe teksa po hapej semafori për të kaluar në anën tjetër të rrugës, i moshuari ka kapur për krahu Jeart Dokun dhe i ka kërkuar që të ndalojë. Ky i fundit i ka dhënë një të shtyrë Hasan Onuzit dhe ka nisur rrugën e tij. Por, pa kaluar as mesin e rrugës, Onuzi ka nxjerrë një pistoletë dhe e ka qëlluar nga këmbët Dokun. Ky i fundit ka rënë në asfalt dhe ka tentuar që dhe i plagosur të largohet. Ndërsa policia, që ndodhej pak metra larg vendit të ngjarjes, është nisur për të ndërhyrë. Por, edhe reagimi i Onuzit ka qenë i shpejtë. 62-vjeçari i është afruar të plagosurit, i cili zvarritej në rrugë dhe e ka qëlluar edhe pesë herë të tjera në kurriz, ku plumbat kanë depërtuar në kraharor e në zemër, duke i sjellë vdekjen e menjëhershme. Me qetësi, 62-vjeçari ka hequr një karikator pistolete dhe ka tentuar të fusë tjetrin. Në këtë kohë, uniformat blu kanë mundur të ndërhyjnë dhe i kanë hequr pistoletën e mbushur nga dora. Por, ai, duke mos pasur të ngopur për këtë vrasje, duke ulëritur është shprehur; "Më lëshoni se po vendos drejtësinë që shteti nuk e vendosi dot. Ai më shkatërroi familjen. Më vrau vajzën. Më vrau djalin. Nuk e meriton të jetojë".

Megjithatë, policia ka bërë arrestimin e autorit, ndërkohë që viktima ka ndërruar jetë menjëherë nga plagët e marra. Sipas policisë, i arrestuari është dërguar në qelitë e Komisariatit nr. 4 dhe menjëherë ka nisur puna për hetimin e kësaj çështjeje. Sipas të dhënave paraprake, ngjarja e ka zanafillën rreth 13 vite më parë. Në vitin 1994, vajza e Hasan Onuzit, Albana 19-vjeçare, ishte larguar në Itali me të afërmit e saj. Që nga ajo kohë, familja e vajzës nuk kishte komunikuar më me të. Pas disa kohësh, 19-vjeçarja ishte shpallur e zhdukur dhe familjarët kishin njoftuar policinë, por nuk e kishin gjetur në Itali. Në këto kushte, vëllai i vajzës Jetmir Onuzi, 23 vjeç, kishte kaluar detin në kërkim të motrës së tij, e cila kishte humbur pa gjurmë. Por edhe ai nuk kishte mundur të gjente gjurmët e motrës së tij në Itali. Pas disa kohësh, edhe ai ka vdekur. Trupi i tij është sjellë i pajetë në Shqipëri, ku është varrosur. Pas gjithë këtyre ngjarjeve, Hasan Onuzi ka akuzuar kunatin e tij, si autorin e zhdukjes së vajzës dhe djalit të tij.

Fati i Albana Onuzit nuk dihet që në vitin 1994, kur ajo u nis drejt Italisë. Hasan Onuzi, duke besuar te kunati i tij, Jeart Doku, e nisi vajzën në shtetin fqinj, për një jetë më të mirë. Por, ajo humbi kontaktet shumë shpejt dhe Doku nuk dha ndonjë përgjigje për fatin e saj. Kjo e detyroi vëllain e së humburës të shkonte në Itali për ta kërkuar, por u gjet i vrarë. Në vitin 2007, Hasan Onuzi, i cili ishte shitës ambulant në qendrën spitalore universitare "Nënë Tereza" dhe këtë punë e kryente prej disa vitesh, bën disa denoncime në polici, por për mungesë provash, kunati i tij, nuk mund të arrestohej. Kështu, ai i drejtohet televizioneve private për ta ndihmuar për gjetjen e vajzës, ku edhe vazhdon të trajtohet kjo çështje. Megjithatë, asgjë nuk doli në dritë. Nga dyshimet e policisë së shtetit fqinj mësohet se Doku mund të ketë shfrytëzuar 19-vjeçaren për prostitutë dhe më pas e ka vrarë. Por, kjo akuzë nuk u vërtetua asnjëherë. Por, nga të dhënat policore rezulton se Jeart Shefqet Doku, 47 vjeç, banues në Tiranë ishte i skeduar me precedentë penal, brenda dhe jashtë kufijve të Shqipërisë.

[kuklla]

ja dhe keta te pjerdhurit nga truri, i marin jeten tjetrit.