Operacionet pa thikë, ja spitali i luksit me çmime të ulëta

[vaaldr1n]

Kur në vitin 1991 Mehmet Ali Aydinlar themeloi një klinikë private shëndeti, shndërrimi i saj në rrjetin më të madh spitalor në Euroazi brenda dy dekadave duket si rrëfim i marrë borxh nga përrallat. Por ACIBADEM Healthcare Group’s është një përrallë më vete, me personazhe reale. Me 16 spitale në gjithë Turqinë (8 vetëm në Stamboll), një tjetër në Maqedoni dhe me ambicien për të hapur 5 të rinj, për ACIBADEM kontribuojnë 2 100 doktorë, 3 900 infermierë, 7 500 administratorë e menaxherë, 11 000 anëtarë stafi etj., ndërsa numri i të punësuarve shtohet çdo ditë. Janë spitale luksi me sipërfaqe gjigante (totali 285 mijë km katrorë), ku në holet e pritjes mund të gjesh piano për çlodhje të pacientëve apo të të afërmve të tyre, kënde lojërash për fëmijë, restorante, parukeri, ekspozita artistike, ndërsa në vend të ambulancës përdoren helikopterët. Aty mund të takosh emrat më të famshëm të personazheve ndërkombëtare që paguajnë për shëndetin e tyre me karta të arta krediti, por edhe njerëz të zakonshëm me rrogë mujore. Sepse ACIBADEM shpesh dhuron shëndet, në vend që ta shesë atë. Njeh siguracionin e jetës së pacientëve që shkojnë për t’u kuruar nga shtetet e tjera, përfshirë Shqipërinë, ndërsa çmimet janë 40 për qind më lirë se kudo. Për këto arsye, por edhe shumë të tjera, ACIBADEM Healthcare Group është kthyer në lider ndërkombëtar të shëndetit privat, duke u akredituar nga “Joint Commission International” (vetëm 26 spitale në botë janë akredituar prej tij).

Shëndet me sa më pak dhimbje, ose pa dhimbje fare. Nëse do të rendisnim shërbimet që ofron ACIBADEM, do të duhej të përfshinim të gjithë enciklopedinë e sëmundjeve, ndaj po ndalemi vetëm te kurimet me anë të teknologjisë së avancuar, që shënojnë revolucion në shëndetësi. Sidomos në onkologji, ku rastet e të sëmurëve me kancer shtohen për çdo vit nëpër botë. Gamma Knife, Cyber Knife, akseleratorin linear Hi-tech, kirurgjia me anë të robotit “Da Vinci” janë disa nga pajisjet moderne, me të cilat nuk është më e nevojshme prerja e pacientit për të hequr tumoret. Për shembull, Gamma Knife është standardi i artë në trajtimin e tumoreve të trurit. “Me këtë metodë trajtohen tumoret e trurit më të vegjël se 3.5 cm, pa qenë e nevojshme për ndërhyrje kirurgjikale të rrezikshme. Bëhet në mënyrë të shpejtë, pa dhimbje dhe në një seancë të vetme”, shpjegon për gazetën “Panorama” prof. dr. Selçuk Peker, neurokirurg në spitalin “Acibadem Kozyatagi”.

Në fakt, fjala “Knife” në anglisht ka kuptimin “thikë”, por Gamma Knife nuk është aspak thikë. Në vend të saj, zona e sëmurë trajtohet me rreze gama dhe jo me ndërhyrje kirurgjikale (jo me bisturi). Neurokirurgu Peker jep disa të dhëna që ngjajnë si të pabesueshme: “Bëhet vetëm anestezi lokale në kokë, pacienti bie në gjumë dhe futet te mjeti Gamma Knife. I gjithë procesi i trajtimit me rreze zgjat nga 10 minuta, maksimumi në një orë. Më pas, pacienti zgjohet pa dhimbje dhe mund të zhvillojë çfarëdo aktiviteti që dëshiron; të kërcejë, të punojë, të fluturojë me avion etj”. E njëjta gjë ndodh edhe me pacientët që kurohen në Cyberknife. Kjo pajisje përdoret në tumoret e trurit, mushkërive, prostatës, pankreasit dhe metastazave të vështira për t’u trajtuar, tumoreve të lëvizshme të mushkërive, mëlçisë, si dhe tumoreve të përsëritura në zonat që kanë marrë radioterapi më parë. Prof. dr. Enis Özyar, specialist i radioterapi-onkologjisë pranë spitalit “ACIBADEM Maslak”, thotë se kjo metodë si alternativë e kirurgjisë mund të largojë tumoret malinj në kufij të sigurt. “CyberKnife, i cili është programuar për trajtimin e tumoreve të të gjithë trupit me një saktësi milimetrike, është sistemi i parë dhe i vetëm për radiokirurgjinë robotike. CyberKnife është një shpresë për pacientë me tumor, që nuk mund të trajtohen me radioterapinë klasike, që kanë nevojë për operacion kompleks ose ku operacioni nuk është i mundur”, sqaron doktor Özyar për gazetën “Panorama”, e cila në fund jep edhe udhëzime për shqiptarët se si mund të shkojnë e të kurohen në këto spitale.

Para se të niseni të dëshpëruar për shëndetin tuaj, kuturu, me një biletë avioni drejt Turqisë, duhet të keni parasysh dy gjëra. E para, bëni shumë mirë që niseni, sepse ACIBADEM Healthcare Group ka treguar histori suksesi me shumicën e pacientëve që spitalet e tjera i kanë konsideruar të pashpresë. E dyta, kursejini vetes kohë dhe energji, duke u lidhur me koordinatoren e këtij rrjeti spitalor në Shqipëri, Flora Manuka. Një e-mail në adresën spitaliacibadem.albania @yahoo.com, ose duke iu bashkuar faqes së profilit të http://www.facebook.com/acibademalbania. Aty janë edhe numrat e telefonit të koordinatores Manuka, e cila mund t’jua bëjë shumë më të lehtë udhëtimin, takimet me doktorët, si dhe plot këshilla të tjera. Pritet që gjiganti “ACIBADEM” të jetë prezent me investime edhe në Shqipëri, por aktualisht rruga e vetme për të pasur shërbimet spitalore mbetet Turqia. Iu rekomandojmë sidomos atyre që kanë probleme me fëmijët, në onkologji, transplantim të veshkave, fizioterapi, kirurgji estetike etj. ACIBADEM Healthecare Group, me president Mehmet Ali Aydinlar, njihet edhe për disa shërbime të tjera, si: Universiteti i Mjekësisë, kompani private të sigurimeve, sipërmarrje hotelerie për ushqim dhe mirëmbajtje.


Burimi: Koha.net