Arrestohet Guvernatori Fullani, në pranga dhe kryeinspektorja (video)

[vaaldr1n]

TIRANE - Arrestim i bujshem. Njeriu me i perfolur gjate kesaj vere rreth skandalit ne Banken e Shqiperise, drejtuesi i institucionit më të lartë financiar në vend, Guvernatori Ardian Fullani është vënë mbrëmjen e kësaj të Premteje në prangat e Policisë, nën akuzën se nuk ka ushtruar kompetencat e tij duke i krijuar kështu kushtet e favorshme vjedhjes së 713 milionë lekëve të rinj nga thesari i shtetit. Njëherësh me Fullanin, por disa minuta më vonë është ndaluar dhe Inspektorja e Pergjithshme e Bankes se Shqiperise Elivar Golemi. Ajo është paraqitur vetë në polici, ndërkohë që në muajin gusht gazeta “Shqiptarja.com” denoncoi e para shkeljet e rënda të inspektores Elivar Golemi, gjithashtu e përfolur së fundi në media për refuzimin e njëpasnjëshëm që i bëri Kuvendit për të dhënë shpjegime në lidhje me këtë skandal.

Në një deklaratë për mediat, Prokuroria e Përgjithshme konfirmoi zyrtarisht arrestimet duke radhitur dhe shkeljet e konstatuara nga hetimet që bëjnë përgjegjës Fullanin dhe Golemin.

Sipas Prokurorise, Ardian Fullani ka shkelur detyrën e tij të guvernatorit të paktën në 5 pika konkrete, duke lënë terren për abuzime që sollën deri në vjedhjen e shumës prej 713 milion dollarëve nga Thesari i Bankës së Shqipërisë. Hetimi ka provuar se një rregullore e Departamentit te Emisioni nuk ka ekzistuar për një kohë të gjatë. Ndërkohë që për sa i përket inspektores së Përgjithshme Elivar Golemi, kjo e fundit nuk ka ushtruar asnjë audit konform ligjit të Bankës së Shqipërisë, s’ka kryer kontrolle periodike dhe ska bërë verifikime për vitin 2012, 2013 dhe 2014.

Fullani ka zgjedhur një mbrojtje të fortë duke marrë avokat, kreun e Dhomës së Avokatisë, Maks Haxhinë, i cili është takuar me Guvernatorin në ambjentet e paraburgimit në Drejtorinë e Policisë. Duke e vlerësuar të paligjshëm arrestimin e Guvernatorit të Bankës së Shqipërisë, Haxhia tha se do të kundërshtojë këtë vendim të Gjykatës

Arrestime të tjera mësohet të jenë bërë gjatë kësaj dite, por ende nuk bëhen të ditur emrat e personave të vënë në pranga.Sakaq, të Shtunën, guvernatori i Bankës së Shqipërisë Ardian Fullani do të dalë para Gjykatës për t’iu komunikuar masa e sigurisë e dhënë në mungesë ndaj tij.

Me arrestimin e dy njerëzive kryesorë të Bankës, Ardian Fullanin dhe Elivar Golemin, numri i të ndaluarve për këtë çështje ka shkuar në 19 persona.

Fullani arrestohet me vendim gjykate ne zyren e tij, reziton: "Me lini se shkoj vete ne Prokurori"...Golemi vedorezohet ne polici
Ka qenë ora 19:45 kur Ardian Fullani ka dalë nga zyra e tij e Bankës së Shqipërisë që ndodhet tek sheshi “Avni Rustemi” dhe menjëherë është ndaluar nga forcat policore.

Atij i kanë komunikuar urdhrin e arrestimit të lëshuar nga njësia hetimore Task-Forcë, e cila kishte marrë spunto nga një vendim i gjykatës së Tiranës që caktonte masën e “arrestit në burg” ndaj Fullanit. Fillimisht Fullani ka kundërshtuar të shoqërohet nga forcat policore, duke pretenduar se ishte i gatshëm dhe në dispozicion të prokurorisë dhe se do paraqitej vetë në këtë institucion. Por ky pretendim nuk është miratuar nga punonjësit e policisë të cilët e kanë transportuar në drejtim të dhomave të shoqërimit në drejtorinë e Policisë së Tiranës.

Kërkesa për arrestimin e guvernatorit Fullani, është dorëzuar në orën 16:00, ndërsa arrestimi i tij është bërë në orën 19:45. Ndërkaq, kryeinspektorja Golemi është vetëdorëzuar gjatë orëve të mbrëmjes në Drejtorinë e Përgjithshme të Policisë. Ardian Fullani dhe Elivar Golemi ndodhen ne drejtorine e policise, ne dy biruca te veçanta. Mesohet se te arrestuarit s'kanë pasur kërkesa te veçanta, vetëm Fullani ka kërkuar ilaçet e tensionit.

Teksa në gjykatën e Tiranës zhvillohej masa e sigurisë ku Ardian Fullani dhe Elivar Golemi të mbylleshin në burg, Fullani ndodhej në zyrën e tij ndërsa Golemi sipas dëshmitarëve ndodhej në kafene. Vendimi i gjykatës, është dërguar nga prokuroria në policinë e kryeqytetit, duke kërkuar arrestimin e menjëhershëm të Golemit dhe guvernatorit Fullani.



Foto eksluzive A1 REPORT: Arrestimi i guvernatorit Fullani

Gjyqtarja Blerina Muca dha vendimin e arrestit për Fullanin e Golemin
Pas një urdhri arresti të kërkuar nga prokurori Ramadan Troci dhe të lëshuar në fshehtësi të plotë nga gjykatësja Blerina Muça në Gjykatën e Tiranës rreth orës 19:45 skuadra e operacioneve speciale e policisë së Tiranës ka arrestuar në zyrën e tij në sheshin “Avni Rustemi” në Tiranë, Guvernatorin e Tiranës, Ardian Fullani.



Në foto gjykatësja Blerina Muca. qe dha vendimin e arrestit me burg per Guvernatorin Fullani dhe Kryeinspektoren Golemi)

Urdhër arrestet dy muaj nga nisja e hetimeve per vjedhjen e thesarit....pas deshmise se 2 anetareve te Keshillit Mikeqyres
Pas dy muashj nga nisja e hetimit për skandalin e vjedhjes së Bankës së Shqipërisë, njësia hetimore Task-Forcë dje në mbrëmje ka konkretizuar hetimet, duke arrestuar dy njerëzit kryesorë të Bankës, Ardian Fullanin dhe Elivar Golemin. Arrestimi i tyre vjen pikërisht në ditën kur dy anëtarët e Këshillit Mbikqyrës të BSH-së Ermelinda Meksi dhe Ela Golemi si dhe ish-inspektorja e Përgjithshme Teuta Baleta dëshmuan në prokurori.

Pas përfundimit të dëshmisë së tyre, siç duket grupi hetimor i përbërë nga kryeprokurori Petrit Fusha, prokurori Ramadan Troci dhe oficeri Elidon Hysenaj, ka arritur në konkluzionin që të kërkonin menjëherë arrestimin e Fullanit dhe Golemit, pasi këta të fundit kishin shkelur një sërë rregulloresh njëherësh dhe ligjin për funksionimin dhe organizimin e BSH. Kërkesa për caktimin e masës së “arrestit në burg” për akuzën e “Shpërdorimit të detyrës”, është depozituar dje në gjykatën e Tiranës, ku gjyqtarja Blerina Muça, ka miratuar kërkesën e akuzës duke vendosur të caktojë masën e “arrestit në burg” për Fullanin dhe Elivar Golemin.

Zbulohen shkeljet e Fullanit. Prokuroria: Nuk propozoi zv/guvernatorin. S’miratoi rregullohet e Emisionit, caktoi dy herë të njëjtin person për inventarizimet…dhe nuk interesohej për mbarëvajtjen e veprimtarisë së përditshme të Bankës
Në një deklaratë për mediat, Këshilltarja e Prokurorit Fjorida Ballauri, tha se nga hetimet e filluara nga korriku 2014 për vjedhjen e BSh, Prokuroria ka arritur në përfundimin se për shkak të mosveprimit të tyre Fullanit dhe Golemit, janë siguruar kushtet që të cenohet siguria e parave në thesar.

Sipas organit të akuzës, fakti që Fullani nuk i ka propozuar Këshillit Mbikëqyrës, zëvendësguvernatorin e dytë të Bankës së Shqipërisë, ka krijuar mangësi në mbikëqyrjen e përdorimit të mjeteve financiare. Fullani gjithashtu, sipas Prokurorisë, si kryetar i Këshillit Mbikëqyrës nuk ka propozuar dhe miratuar rregulloren e Departamentit të Emisioni, duke sjellë kështu cënimin e parave. Po ashtu, në cilësinë e drejtorit të përgjithshëm ekzekutiv të Bankës së Shqipërisë, Fullani nuk ka marrë masat e nevojshme ligjore për zbatimin e vendimeve dhe rregulloreve të Këshillit Mbikqyrës.

Por sipas hetimeve të Prokurorisë, guvernatori Fullani duket se nuk ka kryer as funksionin elementar në krye të këtij institucioni, “mbarëvajtjen e veprimtarisë së përditshme të Bankës së Shqipërisë”. Hetimet e deritanishme kanë evidentuar gjithashtu faktin se Fullani në komisionet e ngritura për kryerjen e inventarizimit të detyrueshëm periodik të vlerave monetare në Bankën e Shqipërisë ka caktuar dy herë të njëjtin person. Ky person, aktualisht është në hetim për “shpërdorim detyre” në kuadër të këtij procedimi penal.



Deklarata e Prokurorisë së Përgjithshme
Me kërkesë të Prokurorisë së Rrethit Gjyqësor Tiranë, gjykata ka vendosur masën e “arrestit me burg” për shtetasin Adrian Fullani, me detyrë Guvernator i Bankës së Shqipërisë, si edhe për shtetasen Elivar Golemi, me funksion Inspektor i Përgjithshëm në Bankën e Shqipërisë, të dyshuar për veprën penale “shpërdorim detyre”, parashikuar nga neni 248 i Kodit Penal. Vendimi i gjykatës është ekzekutuar nga forcat e Drejtorisë së Policisë së Qarkut Tiranë pasditen e së Premtes, dt. 05.09.2014.

Në vijim të hetimeve për vjedhjen e një shumë të konsiderueshme parash në Bankën e Shqipërisë, të filluar në muajin Korrik 2014, Prokuroria e Tiranës ka arritur në përfundimin se dy zyrtarët e lartë të këtij institucioni, për shkak të mosveprime të tyre, kanë krijuar kushtet që të cënohet siguria e parave në administrim të Bankës së Shqipërisë.

Në mënyrë të përmbledhur, nga hetimet e deritanishme, rezulton se, shtetasi Adrian Fullani, në cilësinë e Guvernatorit të Bankës së Shqipërisë, i cili është njëkohësisht Kryetar i Këshillit Mbikqyrës dhe Drejtor i Përgjithshëm Ekzekutiv i saj, ka shkelur ligjin si më poshtë:

Së pari: Nuk i ka propozuar Këshillit Mbikqyrës, zëvendësguvernatorin e dytë të Bankës së Shqipërisë, duke krijuar një boshllëk në përmbushjen e detyrimeve të këtij funksioni. Duhet theksuar se ky funksion i munguar duhet të trajtonte drejtëpërdrejtë administrimin, mbikqyrjen dhe zbatimin e akteve proceduriale për përdorimin e mjeteve financiare.

Së dyti: Në cilësinë e kryetarit të Këshillit Mbikqyrës, nuk ka ushtruar kompetencat e tij për propozimin e nismave juridike të funksionimit të Bankës së Shqipërisë, si detyrim që buron nga vendimi i Këshillit Mbikqyrës Nr.13 datë 22.02.2006. Pra me nisjen e funksionimit të departamentit të Emisionit, ku ka ndodhur edhe vjedhja, Këshilli Mbikqyrës duhej të propozonte e miratonte rregulloret përkatëse për funksionimin e këtij departamenti. Nga hetimi ka rezultuar se këto rregullore nuk kanë ekzistuar për një kohë shumë të gjatë, gjë e cila ka sjellë cënimin e parave.

Së treti: Në cilësinë e drejtorit të përgjithshëm ekzekutiv të Bankës së Shqipërisë, nuk ka marrë masat e nevojshme ligjore për zbatimin e vendimeve dhe rregulloreve të Këshillit Mbikqyrës. Ndër to, mund të përmendet zbatimi i politikave të miratuara nga Këshilli Mbikqyrës, për mbarëvajtjen e veprimtarisë së përditshme për administrimin e procedurave ekzekutive, si dhe për qeverisjen e punëve administrative të veprimtarisë së Bankës së Shqipërisë.

Së katërti: Guvernatori është i ngarkuar me mbarëvajtjen e veprimtarisë së përditshme të Bankës së Shqipërisë, përgjegjësi të cilën nga analiza e hetimit në kuadër të procedimit penal, rezulton që nuk e ka ushtruar.

Së pesti: Në kundërshtim me nenin 8 të rregullores “Mbi inventarizimin e vlerave materiale e monetare në Bankën e Shqipërisë”, Guvernatori i Bankës së Shqipërisë, në komisionet e ngritura për kryerjen e inventarizimit të detyrueshëm periodik të vlerave monetare në Bankën e Shqipërisë ka caktuar dy herë të njëjtin person. Ky person, aktualisht është person në hetim për “shpërdorim detyre” në kuadër të këtij procedimi penal.


vazhdon...

[vaaldr1n]

Po ashtu, në mënyrë të përmbledhur, nga hetimet e deritanishme, rezulton se shtetasja Elivar Golemi, me funksion Inspektor i Përgjithshëm i Bankës së Shqipërisë, ka shkelur ligjin si më poshtë:

Së pari: Nuk ka ushtruar auditim konform ligjit për Bankën e Shqipërisë dhe rregullores se departamentit të kontrollit, proces i cili është përgjegjësi e drejtëpërdrejtë e Inspektorit të Përgjithshëm.

Së dyti: Ka vepruar në kundërshtim me kuadrin ligjor përkatës, sa i takon ushtrimit kontroll kontabël të brendshëm, si edhe kontrolle të brendshme periodike për administrimin dhe operacionet e Bankës së Shqipërisë, me qëllim që të sigurojnë mbarëvajtjen e zbatimit të ligjeve dhe të akteve nënligjore në Bankën e Shqipërisë. Duke mos realizuar kontrolle periodike, nuk i ka dorëzuar Këshillit Mbikqyrës raporte e rekomandime për llogaritë dhe regjistrat, si dhe për procedurat buxhetore kontabël dhe kontrollet e Bankës së Shqipërisë.

Së treti: Është përgjegjësi e drejtëpërdrejtë e Inspektorit të Përgjithshëm të Bankës së Shqipërisë që Departamenti i Kontrollit nuk ka ushtruar auditim finaciar periodik në Departamentin e Emisionit për vitet 2012, 2013 dhe 2014, pikërisht në vendin dhe gjatë periudhës kohore ku dyshohet se është kryer vjedhja.

Së katërti: Në bazë të komunikimit shkresor, në kuadër të këtij procedimi penal, rezulton se Inspektori i Përgjithshëm nuk i ka ushtruar funksionet e tij, pasi veç raportit të vitit 2011 dhe projekt-raportit të vitit 2014, nuk ka mbajtur asnjë raport apo audit në arkën për veprim dhe në arkën stok, pikërisht në arkat ku i dyshuari kryesor për vjedhjen ka deklaruar se ka marrë shumën e madhë të parave.

Prokuroria e Rrethit Gjyqësor Tiranë po vijon me hetimin e kësaj çështje, ku fokusi kryesor vijon të mbetet destinacioni i shumës së vjedhur.

Aktualisht, 19 të ndaluar për vjedhjen në Bankën e Shqipërisë
Deri në këto momente numri i të ndaluarve arrin në 19, edhe pse për 5 prej tyre është dhënë masa e sigurisë “arrest shtëpie”. Në grupin e parë të të arrestuarve bënin pjesë edhe punonjësit e Bankës së Shqipërisë Ardian Bitraj e Mimoza Bruzia, dy të akuzuarit kryesore për vjedhjen e kryer në Bankën e Shqipërisë, ndërsa në grupin e dytë bënin pjesë inventarizuesit. Ish-përgjegjësi i arkës stok në dëshmitë e tij ka deklaruar se e ka kryer i vetëm vjedhjen e 713 milionë lekëve të rinj, brenda një periudhe 4-vjeçare

Haxhia: Do kundërshtojmë vendimin, arrestim i paligjshëm
Pas takimit në Polici, avokati Maks Haxhia thotë se ai dhe klienti i tij Ardian Fullani do të kundërshtojnë vendimin e Gjykatës, me argumentin se ky vendim nuk ka të bëjë me këtë rast. Avokati Haxhia tha para kamerave se “ndalimi i Fullanit është i paligjshëm”.

Manjani: Politika të heshtë për këtë rast, drejtësia të veprojë
Zëvendësministri i Transporteve Ylli Manjani duke folur për “A1 Report” tha se politika duhet të qëndrojnë jashtë kësaj çështje, duke e lejuar drejtësinë të bëjë punën e saj. Duke e quajtur arrestimin e Guvernatorit Fullani një ngjarje të madhe, Manjani tha se prokuroria në këtë rast ka treguar vendosmëri.

“Arrestimi i Fullanit është nj ngjarje e rëndësishme. Prokuroria ka treguar vendosmëri dhe për këtë duhet përgëzuar. Nuk mendoj se kjo është një çështje politike. Parlamenti shqiptar duke qenë institucion që monitorin dhe mbikëqyr BSH duhet të ndërhynte dhe të ndërhyjë për të zgjidhur me mirë të ardhmen e bankës. Mendoj se partitë politike duhet të heshtin për këtë rast. Secili duhet të ketë kurajo të përballet me drejtësinë. Këshilli ende në detyrë i BSH duhet të tregojë vendosmërinë e duhur për të siguruar drejtimin e bankës deri në zgjidhjen e kësaj çështje. Komentimi i rastit në Angjelit është alibi e një grupi të PD. Askush nuk ka tentuar të kontrollojë institucione si Banka e Shtetit. Pavarësia e BSh është një standard i domosdoshëm, pasi ka përgjegjësi të jashtëzakonshme”, tha Ylli Manjani, zv/ministër i Transporteve.



Lutaj: Çdo njëri që shkel ligjet e këtij vendi duhet të ndëshkohet
Anëtari i komisionit të Sigurisë, Pirro Lutaj tha arrestimi i guvernatorit Fullani është një reagim normal në një shtet normal. Lutaj tha për “A1 Report: se “Çdo njëri që shkel ligjet e këtij vendi duhet të ndëshkohet”.



Nard Ndoka: Arrestimi i Fullanit, funksionoi drejtësia
Kryetar i PDK, Nard Ndoka tha për “A1 Report” arrestimi i Guvernatorit Ardian Fullani, tregon për funksionim të drejtësisë. Sipas Ndokës është me rëndësi që të mbështetet nga të gjithë sistemi i drejtësisë dhe Prokuroria.

“Mendoj se është një reagim i institucioneve të drejtësisë, dhe kjo është diçka e mirë. Arrestimi i Fullanit tregoi se funksionoi drejtësia. Është e rëndësishme që në të mbështetim sistemin tonë të drejtësisë dhe prokurorinë. Një veprim i tillë nuk është i vonuar, pasi ka ndodhur atëherë kur janë plotësuar provat, dhe pasi hetimi ka vijuar”, tha Ndoka.



Ngjela për “A1 Report”: Nuk e prisja arrestimin e Fullanit
Avokati Spartak Ngjela tha për “A1 Report” se krimi i ndodhur në Bankën e Shqipërisë është shumë i madh, ndërsa u shpreh se nuk e priste arrestimin e Guvernatorit Fullani. Duke u ndalur tek kërkesa e prokurorisë për arrestimin e Fullanit dhe të kryeinspektores Golemi, Ngjela thotë se me këtë veprim “Prokuroria u shkëput nga një praktikë shëmtuar”

“Nuk e prisja arrestimin e Fullanit. Krimi në BSh është shumë i madh, por mendoj se vjedhja është shumë më e madhe. Prokuroria u shkëput nga një praktikë e shëmtuar. Ai që u arrestua në fillim si hajdut i pari, mendoj se do jetë i fundit. Ai në fillim tha se paratë i shpenzoi në bixhoz, e s’e dimë nëse është alibia e tij apo e dikujt tjetër”, tha Ngjela.

Avokati Haxhia: S'më lejojnë ta takoj. Policia: S'ka prokurë
Pas arrestimit të Guvernatorit të Bankës së Shqipërisë Ardian Fullani, në drejtorinë e Policisë ka mbërritur edhe avokati i tij Maks Haxhia. Duke folur për mediat, avokati Haxhia thotë se ende nuk ka asnjë informacion lidhur me mënyrën sesi është ndaluar klienti i tij. Ndërsa mendon se arrestimi i klientit të tij nuk është i drejtë, pasi sipas tij një vendim gjykatë lëshohet në rastet kur i akuzuari i shmanget drejtësisë. Haxhia thotë se ka ardhur të takojë klientin e tij, por nuk është lejuar duke e cilësuar këtë një veprim të padrejtë. Ndërsa sipas policisë, avokati Maks Haxhia nuk disponon një prokurë për të përfaqësuar juridikisht Fullanin.

“Unë u paraqita, prezantova kartën e identitetit, dhe kërkova që të takohem, më thanë që do më njoftojnë. Është një shkelje e kushtetues. Në momentin qe ndalohet një perosn i lind e drejta për t’u takuar me avokatin e tij. Jkam të drejtë të takohem me të të konsulton. Kur ma bëjnë mua që jam kryetari i avokatëve, imagjino çfarë i bëjnë kolegëve të mi.
Për sa kohë ai është aty ose është ndaluar për ty pyetur, por nga mënyra si është ndaluar nuk mund të them se është një mënyrë delikate. Ose mund të jetë një vendim i marrë nga gjykata por edhe kjo më surprizon, pasi një vendim gjykate jepet në ato raste kemi të bëjmë vetëm me një person që i shmanget drejtësisë”, tha avokati Maks Haxhia.



RD: Arrestohet Fullani, Anastas Angjeli drejt Bankës
Pas arrestimit të Guvernatorit të Bankës së Shqipërisë Ardian Fullani, ka reaguar në profilin në “Facebook”, e përditshmja “Rilindja Demokratike”, duke e komentuar këtë arrestim si marrje në kontroll politik dhe financiar i Ramës ndaj Bankës. Sipas RD-së është Anastas Angjeli që po shkon drejt Bankës. “Arrestohet Guvernatori Fullani, Anastas Angjeli drejt Bankës. Rama drejt marrjes në kontroll politik dhe financiar të Bankës”, është shkruar në “Facebook”.



19 personat e ndaluar per vjedhjen e thesarit te shtetit. LISTA

1.Ardian Fullani- Guvernator i Bankës së Shqipëris.
2. Elivar Golemi- Kryeinspektorja e Bankës së Shqipërisë
3.Ardian Bitraj-Pergjegjës i zyrës së stokut të Thesarit.
4.Mimoza Bruzia- punonjëse në Departamentin e Emisionit.
5.Petrit Ramohitaj- Përgjegjës i arkës në veprim, në Departamentin e Emisionit në Bankën e Shqipërisë
6. Liljana Tusha - Specialiste e arkës në veprim, në Deprtamentin e Emisionit në Bankën e Shqipërisë
7.Lavdim Cani- Specialist i arkës stok(tranzit) pranë Deprtamentit të Emisionit në Bankën e Shqipërisë
8.Myzejen Belba- Specialiste e arkës stok(tranzit) pranë Deprtamentit të Emisionit në Bankën e Shqipërisë
9.Dhimiter Davidi- Vëzhgues-operator pranë departamentit në sigurimin dhe mbrojtjes ne Banken e Shqiperisë
10.Klevis Bejtja- nipi i Ardian Bitrajt, jo punonjës i Bankës.
11.Bashkim Xhilaga- Shef i arkës stok dhe në veprim.
12.Dorian Çollaku- Drejtor i Thesarit
13.Gentian Jahja
14. Ilir Dedja
15.Emiljano Lamçe
16.Mehdi Marku
17.Bahri Allushi
18.Mehdi Molla
19.Fatbardha Gurthi

Ngjarja në 1994 Fullani, dëshmitar në gjyqin e guvernatorit Hoti
Prangosja e Ardian Fullanit, nuk është e vetmja në historinë e Bankës së Shqipërisë. Në vitin 1994 një tjetër guvernator i Bankës së Shqipërisë është arrestuar dhe ai quhet Ilir Hoti. Ky i fundit u arrestua nga prokuroria për çështjen e njohur “ARSIDI”. Në gjyqin kundër tij Fullani ka dëshmuar në gjykatë kundër Ilir Hotit. Ndërsa tashmë 20 vjet më pas për ironi të fatit vetë Ardjan Fullani arrestohet për “shpërdorim detyre”.


Burimi: Shqiptarja.com