Vrau burrin, dënohet me 11 vjet burg

[kuklla]

Klodiana Lala

Kini mëshirë për mua! Për hatër të shtatë fëmijëve të mi që nuk kanë as bukë të hanë. U kërkoj ndjesë familjarëve për dhimbjet që u kam shkaktuar, por nuk duroja dot më. Jeta ime ishte një skëterrë e vërtetë. Burri im ishte kthyer në një përbindësh, ndaj e vrava. Më ishte sosur durimi". Vetëm pak minuta përpara se të dëgjonte vendimin e gjykatës, Aishe Pojana, e cila vrau dhe më pas groposi bashkëshortin e saj, Hasan Pojana, u përgjërua përpara trupit gjykues. E thinjur dhe rrudhur nga hallet e shumta dhe fatkeqësitë e mëdha, gruaja 46-vjeçare shpjegoi arsyet që e shtynë të kryente krimin makabër. "Burri më keqtrajtonte. U kam kërkuar ndihmë të gjithë njerëzve të tij dhe asnjeri nuk e ktheu kokën nga unë, për të parë se çfarë po ndodhte. Fëmijët e mi nuk ngopeshin as me bukë. Tani kanë mbetur në mëshirë të fatit", - tha gruaja, duke kërkuar të bindte gjykatën për t'i dhënë një dënim të lehtë. Por fjalët e saj nuk e prekën sa duhet trupin gjykues, i cili e dënoi Aishe Pojanën me 11 vjet burg, për "vrasjen me dashje" të bashkëshortit të saj Hasan Pojana.
Vendimi
E veshur me të zeza, me flokët e thinjura të kapura me një lidhëse, Aishe Pojanës i janë mbushur sytë me lot kur gjykata e dënoi me 11 vjet burg për vrasjen e bashkëshortit të saj, Hasan Pojana, në mars të vitit 2007. Më shumë sesa ditët e qëndrimit në qelitë e burgut, duket se 46-vjeçaren e trondiste fakti se shtatë fëmijët e saj nuk do të mund të mbijetojnë. Megjithëse u mundua ta bindte gjykatën për një masë të lehtë dënimi, Aishe Pojana nuk ia doli mbanë. Gjykata nuk mori parasysh as kërkesën e mbrojtjes për ndryshimin e cilësimit të veprës penale nga "vrasje me dashje", në "vrasje në kushtet e tronditjes së rëndë psikike". Në vendimin përfundimtar, togat e zeza e cilësuan fajtore të pandehurën Aishe Pojana, për vrasjen me dashje të bashkëshortit të saj Hasan Pojana, duke hedhur poshtë pretendimet e saj se e kishte kryer krimin në kushtet e tronditjes psikike. Vetëm një seancë më parë, prokuroria kishte kërkuar dënimin e Pojanës me 12 vjet burg.
Historia
Zbulimi i një kufome të seksit mashkull në një përrua në fshatin Baldushk, vuri në lëvizje tërë policinë. Nga hetimet rezultoi se viktima ishte Hasan Pojana, baba i shtatë fëmijëve. Sipas ekspertëve, viktima ishte goditur me sende të forta në kokë, ku kishte gjetur dhe vdekjen dhe më pas ishte groposur. Dyshimet për vrasjen ranë mbi bashkëshorten e tij, Aishe Pojana, e cila përfundoi në pranga. Menjëherë, gruaja pohoi se burrin e saj Hasan Pojana, e kishte vrarë më 11 mars 2007 brenda në shtëpinë e tyre. Më pas, me ndihmën e fëmijëve të mitur, gruaja e kishte transportuar trupin e pajetë të të shoqit me gomar dhe e kishte groposur afër një përroi, jo larg shtëpisë. Në një kohë kur familjarëve të viktimës u kishte thënë se ai kishte shkuar emigrant në Greqi, dhe që prej asaj kohe nuk kishte pasur kontakte me të. Pas arrestimit, nëna e shtatë fëmijëve pranoi autorësinë e krimit makabër dhe pohoi se e kishte vrarë bashkëshortin, pasi ai në mënyrë sistematike ushtronte dhunë fizike dhe psikologjike ndaj saj dhe fëmijëve. Madje, sipas të pandehurës, bashkëshorti e akuzonte dhe për tradhti.