Greqi, fillon dhënia e nënshtetësisë kolektive

[kuklla]

• Tedi Blushi

Athina zyrtare iu jep nënshtetësinë greke në mënyrë kolektive, 1106 shqiptarëve që kanë siguruar Kartën e Homogjenit. Në urimin e mirëseardhjes në familjen greke, ka qenë ministri i Brendshëm, Prokopis Pavlopulos, ai që ua ka dorëzuar personalisht pasaportat greke shtetasve shqiptarë. Ceremonia është organizuar në 29 shkurt, në stadiumin e sporteve në Athinë, me pjesëmarrjen e kryetarit të Bashkisë, Nikitas Kaklamanis, prefektit Janis Zguros si edhe kreut të Bashkisë së Himarës, Vasil Bollano. Duke iu drejtuar “vorio-epirotasve”, sikundër i cilësoi shtetasit e Jugut të Shqipërisë të cilët morën nënshtetësinë greke, ministri i Brendshëm, Pavlopulos tha mes të tjerash se “për vite me radhë shteti ynë ka qenë borxhli ndaj jush, por sot po u kthejmë një borxh të madh. Tani merrni fuqitë, bashkohuni me ne për të ecur të gjithë bashkë në rrugën drejt së ardhmes demokratike të Greqisë, duke mos harruar historinë e kombit tonë. Zoti qoftë me ne!” Referuar sajtit zyrtar në internet të zyrës së shpërndarjes së pasaportave në Ministrinë e Brendshme greke: 48 për qind e këtyre shqiptarëve që kanë fituar nënshtetësinë janë femra dhe 52 për qind meshkuj. Saktësohet se prej tyre, 99 për qind i takojnë besimit ortodoks, pesë janë katolikë dhe vetëm dy të besimit mysliman. Ndërkaq që të gjithë, referuar të njëjtit burim, kanë qenë banorë të Jugut të Shqipërisë, ose sipas terminologjisë së përdorur në këtë ceremoni, “shtetas të Vorio-Epirit”.
Muaji prill
Muajin e ardhshëm, nënshtetësinë greke do ta fitojnë në mënyrë kolektive edhe 600 minoritarë dhe shqiptarë të tjerë që gjithashtu kanë siguruar Kartën e Homogjenit. Lajmi është bërë publik në këtë ceremoni nga vetë ministri i Brendshëm, Pavlopulos.
Kosova
Diskutantët e ndryshëm që morën fjalën në këtë ceremoni, referuar agjencive greke të lajmeve, kanë theksuar se kjo që po bën Athina zyrtare nuk është aspak më shumë se sa ajo që ka bërë dhe po bën Shqipëria me shtetasit shqiptarë të Kosovës. “Çdo muaj, shqiptarët e Kosovës marrin pasaporta e nënshtetësi shqiptare. Madje, zyrtarë të lartë demonstrojnë publikisht vullnetin e qeverisë për të ndihmuar financiarisht dhe për t’i dhënë një suport politik ndërkombëtar Kosovës”, citojmë nga diskutimi i një prej përfaqësuesve të këshillit bashkiak të Athinës.
Vorio-Epiri
“Vorio-Epirin nuk e shesim, nuk e lëshojmë”. Me këtë pankartë gjigande në duar, qindra protestues ultranacionalistë grekë në qendër të Athinës kanë kërkuar pak ditë më parë autonominë e Jugut të Shqipërisë, të cilësuar prej tyre si “Kosova” e Greqisë. Protestuesit në parullat e hedhura gjatë këtij mitingu që zgjati për rreth një orë e 30 minuta, kanë kërkuar prej autoriteteve ndërkombëtare dhënien për minoritetin grek në Shqipëri të së njëjtës të drejtë për vetëvendosje, sikundër shqiptarëve të Kosovës. Ata kanë paralajmëruar qeverinë Karamanlis se, në rast të njohjes së pavarësisë së Kosovës para se i ashtuquajturi “Epiri i Veriut” të fitojë autonominë, atëherë e gjithë Greqia sipas tyre, do të përfshihet në protesta tepër të ashpra.