Sytë dhe veshët nga Tirana‑Elbasani, hyrja e tifozëve falas

[Kliton]

Kryendeshja e javës së 21-të të superligës do të jetë Tirana-Elbasani, që do të luhet në stadiumin “Selman Stermasi”, sot, në orën 14.30. Sfida në fjalë jo vetëm do të vendosë shumë për kreun e renditjes, të cilin e mban Tirana, por mbart në vetvete edhe duele ish-ësh e lojtarësh me ego. Kështu, në të dyja kampet, liderët e skuadrave janë Muka, për Tiranën dhe Dede për Elbasanin. Gjithmonë rivalë të denjë për njëri-tjetrin, edhe pse kjo ka bërë që bashkëjetesa e tyre te bardheblutë të jetë e vështirë. Ndryshe, këtë sfidë mund ta përkufizojmë ndryshe sulmi më i mirë përballë mbrojtjes me emra të spikatur. Nëse Dede, Karçev, Vrapi dhe Ardit Beqiri do të luanin përkrah njëri-tjetrit që në fillim të sezonit, sot Elbasani pa dyshim që nuk do të kishte atë pozicion që mban në tabelë. Gjatë 90 minutave të takimit të sotëm do të shikojmë një duel të gjatë mes sulmit bardheblu dhe mbrojtjes solide të Elbasanit. “Xhaxhi”, një mjeshtër i vërtetë i trajningut shqiptar, e ka të qartë forcën e Tiranës, ndaj duhet t’i ketë dhënë udhëzimet përkatëse që porta verdheblu të mbetet e paprekur. Nga ana tjetër, Memelli, Xhafaj dhe Devi Muka i kanë bërë llogaritë deri në detaj për ta çarë barrierën e përbërë nga katërshja Dede‑Vrapi‑Karçev‑Beqiri. Pra, kemi një përballje me armët më të forta të të dyja skuadrave. Drejtuesit e Tiranës i kanë bërë thirrje tifozerisë, për të qenë e shumtë në numër në këtë ndeshje, pasi konsiderohet si decizive. Për këtë, dyert e stadiumit do të jenë të hapura, ku tifozët mund të hyjnë falas, pa biletë. Një shërbim ky i drejtuesve bardheblu, që tenton të afrojë një numër të madh tifozësh në stadium, në përkrahje të Tiranës, së cilës i duhen patjetër 3 pikët, ndryshe Vllaznia po vigjëlon dhe mund t’ia marrë sërish vendin e parë në klasifikim.


Kampionati kombëtar, ndeshjet të shtunën dhe të dielën




Java e 21-të e Superligës do të startojë të shtunën, më 21 shkurt, por gjysma e ndeshjeve të saju do të luhen një ditë më pas, të dielën. Takimi Vllaznia-Lushnja është shtyrë për të dielën si rezultat i kushteve të vështira atmosferike në qytetin verior, ku stadiumi “Loro Borici” është mbuluar nga dëbora, që shkon në një trashësi deri në 30 cm. Duke qenë se kreu i renditjes, pas javës së shkuar, u mor nga Tirana, bardheblutë do të bëjnë cmos ta ruajnë këtë privilegj, ashtu sikurse Vllaznia do të besojë tek qëndresa e verdhebluve, për t’i ndalur 23 herë kampionët në “Selman Stermasi”. Kësisoji, kryendeshja e kësaj jave pritet të jetë Tirana-Elbasani, por nuk mbetet pas edhe Flamurtari-Dinamo, që do të luhet në Vlorë, ku blutë do të tentojnë 3 pikët, për të ruajtur pozitat e kryesuesit, ndërsa vendasit kërkojnë vetëm fitoren, ngaqë e ndiejnë zonën e ftohtë të rrezikut. Në “Qemal Stafa”, Partizani do të presë Besën e Kavajës, edhe kjo një ndeshje e ethshme për pikë nga të dyja palët, të kuqtë për mbijetesë dhe kavajasit për të qenë pranë zonën UEFA. Apolonia do të presë në Fier Shkumbinin, ndërsa Bylisi në Ballsh Teutën e Durrësit. Sikurse shihet, të gjitha ndeshjet e kësaj jave mbartin në vetvete emocione dhe luftë sportive, cka e shton interesin për t’i përcjellë ato në të gjitha format e mundëshme, ashtu sic do të bëjë, si gjithmonë, edhe sporti shqiptar online. Më poshtë janë ndeshjet e kategorisë superiore dhe asaj të parë (java e 18-të), qytetet ku do të luhen, gjyqtarët dhe dita e caktuar, bashkë me lojtarët e pezulluar.


Burimi:Sporti Shqiptare