Veset e liga dhe epshet

[Sefedini]

Në përgjithësi në tërë botën ditët e sotme janë përhapur shumë vese të liga ndër njerëz pa marrë parasysh gjininë, moshën, kombësinë, racën apo bindjet fetare. Këto për shkak të mungesës së edukatës familjare, shoqërore apo fetare dhe të largimit të njerëzve nga leximi i librave të dobishëm shkencorë apo fetarë dhe dhënies pas epsheve të dëmshme për veten, familjen dhe shoqërinë. Do të filloj me përshkrimin disa prej këtyre veseve apo epsheve një nga një:

Zilia

Zilia është përhapur jashtë mase sot tek njerëzit. Secili e shikon interesin personal dhe nuk mundohet ta ndihmojë vëllaun musliman kur ka nevojë por nga zilia ai e bën të kundërtën, pra mundohet ta fundosë edhe më shumë.
Allahu xh.sh. secilit njeri ja ka dhënë nga një talent me të cilin ai veçohet. Dhe kur dikush tregohet i suksesshëm me atë talent shokët e tij në vend që ta urojnë ata e urrejnë dhe e ofendojnë.
Ose nëse dikush ka arritur të krijojë pasuri me mundin dhe djersën e tij askush nuk thotë “hallall i qoftë” por përkundrazi gjejnë lloj lloj fjalë dhe bëjnë shpifje duke thënë se nuk e ka fituar atë pasuri në mënyrë të ndershme.
Kjo është një dukuri shumë e keqe dhe për këtë na lajmëron edhe Kur’ani:

4:54. A u kanë zili atyre njerëzve për atë që All-llahu u dha nga mirësitë e Tij?

Ne muslimanët do të japim llogari më së shumti nga të gjithë para Zotit sepse na është dhënë libri me udhëzim shumë të qartë dhe nuk mund të arsyetohemi për fjalët dhe veprat tona duke thënë se nuk kemi qenë të njoftuar apo të informuar për këto dukuri negative.
Këtë më së miri e dëshmon Kur’ani në ajetin e mëposhtëm:

42:14. Po ata, vetëm pasi që u erdhi e vërteta, nuk u përçanë për tjetër, por nga zilia mes tyre.


Duhani

Për duhanin është folur shumë herë nga shumë organizata apo institucione me qëllim të vetëdijësimit të njerëzve prandaj nuk do t’i qasem kësaj teme në aspektin mjekësor por në atë shoqëror.
Duhani është përhapur aq shumë dhe tymi i tij të shoqëron kudo që shkon bile edhe duke ecur rrugës njerëzit pijnë duhan pasi që nuk po zbatohen ligjet apo gjobat për pirjen e duhanit në publik.
Duhanpirësi e thith tymin e cigares me aq shumë epsh dhe e tymos vendin dhe njerëzit përreth tij dhe asnjëherë nuk mendon se a po i pengon dikujt tjetër me këtë gjest.
Biles nëse i dikush i ankohet se po e pengon ai i thotë se ai po e dëmton veten e nuk po brengoset e pse të brengosej për shëndetin e të tjerëve.
Të rinjtë fillojnë me pirjen e duhanit duke i imituar të rriturit dhe duke menduar se në këtë mënyrë ata duken më të pjekur. Kurse të rriturit mendojnë se në këtë mënyrë duken më të rëndësishëm. Shumë prej të rinjëve fillojnë duhanin për të mos u ndarë nga shokët e tyre dhe për të qenë “pjesë e gupit” duke mos menduar fare për dëmet që duhani i shkakton.
Gjithashtu në trojet tona është bërë si një lloj tradite ti ofrohet mysafirit duhan dhe nganjëherë mikpritësi habitet kur mysafiri përgjigjet se nuk e pi duhanin pasiqë shumica e pijnë.
Shumica e duhanpirësve arsyetohen se me pirjen e duhanit ata relaksohen apo qetësohen kurse në fakt duhani shkakton efektin e kundërt, varjen dhe vetëm me ndezjen e cigares shuhet ky epsh. Ka shumë mënyra dhe metoda tjera që njeriu të relaksohet siç është leximi.


Alkoholi

Të gjithë e dijmë se alkoholi është një nga shkaktarët kryesor të çrregullimeve, konflikteve dhe dhunës në familje dhe në shoqëri.
Alkoholi sidomos birra është përhapur shumë dhe është prezent kudo, në shtëpi, në vende pune, në lokale, etj. Tani ka marrë rolin apo i zëvendëson lëngjet joalkoholike pa ndonjë pengesë apo sanksionim nga ligji sidomos në trojet tona. Kompanitë e prodhimit të alkoholit në reklamat e tyre televizive gjithmonë pretendojnë ta shfaqin alkoholin ose më saktësisht birrën si një lëng natyral nga uji më i mirë i maleve apo bjeshkëve tona të njohura, kështuqë nëse e sheh atë reklamë një i mitur ëndërron që të arrijë një ditë të pijë këtë lëng të shijshëm natyre.
Rol të madh në përhapjen e alkoholit luan edhe media sidomos filmat apo serialet e ndryshme televizive që tek ne përcillen me shumë endje.
Duke i imituar popujt evropianë apo perëndimorë tani edhe te ne vera kur të servohet në një darkë konsiderohet si diçka romantike.
Edhe alkoholi te ne është shndërruar në një traditë dhe mikpritësi “me nder” ia ofron mysafirit.
Sidomos nëpër ahengje si p.sh. në dasma bëhen aq shumë shpenzime në alkohol saqë çiftit që martohet i shpenzohet një pagë e tërë mujore apo edhe më tepër.
Por për shkak të mungesës së edukimit familjar, shoqëror apo fetar të prindërve tanë këto tradita vazhdojnë te ne sepse lënia e tyre do të ishte turp apo nënçim për ta nga miqtë, të afërmit dhe nga shoqëria të cilët gjithashtu kanë të njejtën mungesë edukimi.
Në përgjithësi njerëzit brengosen për kritikat apo fjalët e njerëzve të tjerë dhe nuk mendojnë fare nëse me këto gjeste e hidhërojnë Krijuesin e tyre.
Kur’ani na lajmëron qartë se alkoholi është i dëmshëm:

5:91. Shejtani nuk dëshiron tjetër, përveç se nëpërmjet verës dhe bixhozit të hedhë armiqësi mes jush, t'ju pengojë nga të përmendurit Zotin dhe t'ju largojë nga namazi. Pra, a po i jepni fund (alkoolit e bixhozit)?

Dashuria ndaj jetës

Njerëzit janë dhënë aq shumë pas jetës në këtë dunja saqë e kanë harruar dhe e mohojnë tërësisht ahiretin. Kjo mund të vërehet kudo. Secili mundohet të ketë gjërat më të bukura duke filluar nga garderoba, telefonat, veturat, etj. Njerëzit i kanë lënë pas dore urdhërat e Zotit dhe e kanë harruar egzistencën e tij dhe kjo ju bie ndër mend vetëm kur iu vdes ndonjë i afërm i tyre dhe pastaj vijnë në xhami e bijnë në sexhde. Dhe këtë e bëjnë vetëm disa prej tyre jo të gjithë, të tjerët presin jashtë xhamisë dhe vetëm ecin me kolonën dhe e përcjellin xhenazen. Kjo është një nga dëshmitë më të qarta që ata janë dhënë pas jetës në këtë dunja.
Kurse kjo është një dukuri shumë e keqe dhe përmendet edhe në Kur’an:

7:51. Ata që fenë e tyre e morën tallje e lojë dhe të cilët i mashtroi jeta e Dunjasë. Sot, pra, Ne i harrojmë ata sikurse e patën harruar takimin e kësaj dite të tyre dhe, sikurse i refuzonin argumentet Tona!"
9:82. Le të qeshin pak (në Dunja) e le të qajnë shumë (në botën tjetër). Ai është shpërblim i asaj që fituan.
14:44. Dhe ti tërhiqju vërejtjen njerëzve për ditën kur atyre do t'u vijë dënimi, e ata që ishin mizorë thonë: "Zoti ynë! Na jep afat për një kohë të shkurtër t'i përgjigjemi thirrjes Tënde (për besim) dhe t'i pasojmë të dërguarit!" A nuk u betuat ju më parë se për ju nuk ka lëkundje (prej Dunjasë në botën tjetër)?
3:15. Thuaj: "A t'ju kumtoj për diç shumë më të mirë se ato (kënaqësitë e Dunjasë)? Për ata që janë ruajtur, ata kanë tek Zoti i tyre xhennete nëpër të cilat rrjedhin lumenj dhe aty do të jenë përgjithmonë, kanë bashkëshorte të pastra e gëzojnë edhe kënaqësinë e All-llahut. All-llahu është i kujdesshëm për robtë.

Përfundim

Të gjitha këto vese të lartëpërmendura mund të quhen ndjekje apo kënaqje e epsheve.
Zoti na ruajtë prej tyre dhe i udhëzoftë ata që janë të zhytur në këto vese të liga.
Përveç paralajmërimit nga feja islame është dëshmuar edhe gjatë historisë që pasimi i epsheve e ka quar njeriun dhe shoqërinë në devijim dhe konflikte.
E kemi obligim moral dhe fetar si muslimanë dhe duhet të mundohemi sa më shumë të ruhemi apo ti frenojmë epshet tona dhe ti këshillojmë edhe të tjerët dhe ti largojmë nga devijimi apo nga rruga e gabuar.
Sa të jemi gjallë duhet ta përhapim të vërtetën dhe ta luftojmë të keqen duke filluar nga fëmijët tanë, familja jonë dhe shoqëria nëse dëshirojmë që të jemi të sukseshëm në këtë jetë dhe të arrijmë shpërblimet në jetën tjetër. Sot kemi mundësi të mëdha informimi dhe komunikimi dhe është mëkat nëse nuk i shfrytëzojmë këto mundësi.
Duhet ta kemi parasysh gjithmonë vdekjen dhe ditën kur të gjithë do të tubohemi para Zotit të botërave dhe të gjykohemi për fjalët dhe veprat tona dhe duhet tia rikujtojmë çdoherë vëllezërve tanë shqipëtarë dënimin dhe shpërblimin e Zotit duke mos pasur frikë apo turp dhe duke mos u ndjerë të poshtëruar kur ata na i refuzojnë argumentet apo na përqeshin.
Dhe në fund disa porosi nga Kur’ani në lidhje me epshet:

4:27. All-llahu dëshiron t'ju pranojë pendimin, e ata që ndjekin dëshirat e epsheve, dëshirojnë që ju të shmangeni në tërësi (nga rruga e drejtë).
47:14. A është i njëjtë ai, që është i mbështetur në argument të qartë prej Zotit të vet, si ai që veprat e tij të këqija i janë hijeshuar dhe ndjekin epshet e veta?
79:40. E kush iu frikësua paraqitjes para Zotit të vet dhe ndaloi veten prej epsheve,
79:41. xhenneti është vendi i tij.

Falënderimi i takon Allah-ut, Zotit të botërave, paqeja dhe mëshira e Tij qoftë mbi të dërguarin e Tij Muhammedin dhe të gjithë ata që e pasojnë atë deri në Ditën e Gjykimit!

Autor: Sefedin Muqaj, Prizren, Kosovë.

[Kliton]

Shume interesant ky artikull flm.

[qween]

te verteta kto qe the po te ishin te marra disa fragmente nga bibla per keto probleme mendoj qe do lexohej me shume!(mendimi im mos u fyej)

[Sefedini]

Qween, aspak nuk fyhem sepse edhe ne Bibel ka shume keshilla te mira.

Mirepo kjo eshte rubrika e komunitetit musliman dhe prandaj kam cituar vargje nga Kur'ani, dhe une e kam me lehte te marr vargje nga Kur'ani sepse e kam programin adekuat.

Por ja edhe disa keshilla shume te mira nga Bibla per ty:

Eksodi: Kapitulli 20

1 Atëherë Perëndia shqiptoi tërë këto fjalë, duke thënë:


2 "Unë jam Zoti, Perëndia yt, që të nxori nga vendi i Egjiptit, nga shtëpia e skllavërisë.


3 Nuk do të kesh perëndi të tjerë para meje.


4 Nuk do të bësh skulpturë ose shëmbëlltyrë të asnjë gjëje që ndodhet aty në qiejt ose këtu poshtë në tokë ose në ujërat nën tokë.

7 Nuk do ta përdorësh emrin e Zotit, të Perëndisë tënd, kot, sepse Zoti nuk do të lërë të pandëshkuar atë që përdor kot emrin e tij.


12 Do të nderosh atin tënd dhe nënën tënde, me qëllim që ditët e tua të jenë të gjata mbi tokën që Zoti, Perëndia yt, po të jep.


13 Nuk do të vrasësh.


14 Nuk do të shkelësh besnikërinë bashkëshortore.


15 Nuk do të vjedhësh.


16 Nuk do të bësh dëshmi të rreme kundër të afërmit tënd.


17 Nuk do të dëshirosh shtëpinë e të afërmit tënd; nuk do të dëshirosh gruan e të afërmit tënd, as shërbëtorin e tij, as shërbëtoren e tij, as lopën e tij, as gomarin e tij, as asgjë tjetër që është e të afërmit tënd".

Nese te krishteret apo katoliket u permbahen ketyre urdherave do te kene jete shume te mire!

[qween]

shume flm sefendin ke shume te drejte ti qenke nje njeri shume i mire.sinqerisht!