Xhindi, 20 persona nën hetim

[aurel]

Të paktën 20 persona janë shoqëruar në komisiariatin e Fierit, për t’u pyetur për vrasjen e deputetit socialiste Fatmir Xhindi, mbrëmjen e 2 majit të këtij viti. Prokuroria ka urdhëruar shoqërimi e këtyre personave që kanë lëvizur atë natë në qytezën e Roskovecit, e midis tyre dyshohet se është edhe vrasësi.
Megjithatë, ende nuk është zbuluar autori i krimit, që vijon të mbetet misterioz. Prokuroria thotë se moslënia e gjurmëve në vendngjarje, si dhe lëvizjet e autorëve, kanë bërë të dyshohet se vrasja është mafioze. Kompanitë celulare nga ana tjetër i kanë ofruar Prokurorisë së Krimeve të Rënda informacionet për lëvizjen e personave gjatë asaj nate.

Gjithsesi, asnjë informacion nuk të çon tek autorët e krimit. Çdokush mund të jetë banor ose mysafir në këtë qytezë, por prokuroria thotë se mospasja e provave të tjera i ka detyruar që të verifikojnë çdo detaj të mundshëm. Deri në këtë moment, dosja është e tejmbushur me prova dhe dëshmi të familjareve dhe personave të tjerë që mund të ndihmojnë hetimin, por pa nxjerrë ndonje gjë në dritë.

Në tetë fashikujt e prokurorisë nuk ka as më të voglin dyshim për faktin se përse u ekzekutua deputeti socialist Fatmir Xhindi. Prokuroria thotë se janë verifikuar detajet më të vogla për vrasjen e deputetit. Tre janë pistat kryesore ku përqendrohen hetimet: Fatmir Xhindi, mund të jetë vrarë për shkak të detyrës; për një konflikt të vjetër në vitin 1997; dhe për shkak se ka influencuar në një vendim gjyqësor.