PSPgo shitet më mirë sesa paraardhësit

[aurel]

Edhe pse disa dyqane kanë refuzuar të porosisin konzolën e re mobile të lojërave PSPgo, Sony pohon se shitje e saj është e shkëlqyeshme dhe shumë më e mirë sesa tek versionet e mëhershme të PSP-së.
Sipas të dhënave të Sony, konzola mobile PSPgo i ka realizuar pritjet dhe shitja e saj është 120 për qind më mirë sesa tek modelet e vjetra. Kësaj radhe Sony mund t’i falënderohet kohës kur i ka vendosur në shitje hitet si simulimi futbollistik i FIFA 10 dhe Gran Turismo PSP të cilat pas fillimit të shitjes janë ngjitur në maje të listës së video-lojërave.

Sa janë të sakta pohimet për kërkimin e lojërave të përmendura, është vështirë të thuhet dhe na duhet t’i besojmë kompanisë Sony, pasi që ato shiten vetëm nëpërmes shërbimit PSN të kësaj kompanie, prandaj kompanitë e pavarura të statistikave nuk mund të përcjellin shitjen e saktë të tyre.