Berisha: Qeveria në dietë jep rezultat

[aurel]

Kryeministri i Shqipërisë, Sali Berisha mori pjesë në konferencën “Bota në Vitin 2025” mbajtur në Vjenë. Në fjalën e tij, drejtuar politikanëve të lartë evropianë, pjesëmarrës në këtë konferencë, ai paraqiti një tablo të zhvillimeve të Shqipërisë gjatë viteve të fundit, në përpjekje për të realizuar standardet për liberalizimin e vizave dhe përshpejtimin e procesit të integrimit në Bashkimin Evropian.
Në fjalën e tij, kryeministri Berisha u shpreh se integrimi i Shqipërisë në BE, mbetet projekti më madhor i tij dhe udhërrëfyes i vërtetë në procesin e reformave. “Procesi i integrimit në Bashkimin Evropian është shumë i rëndësishëm për mua dhe qeverinë time. Ky është në të vërtetë udhërrëfyesi i vërtetë për procesin e reformave. Fatmirësisht mbështetja për integrimin në BE në vendin tim është 95%. Ky mbetet akoma projekti ëndërr i Shqipërisë”.

Integrimi në BE dhe integrimi në NATO – sipas Berishës – është për të gjithë rajonin forca drejtuese që do ta ndryshojë rrymën në drejtim tjetër nga konfliktet apo luftërat civile dhe drejt bashkëpunimit, miqësisë dhe një të ardhmeje të përbashkët.

Berisha po ashtu ka shprehur përkushtimin e tij në luftën kundër korrupsionit, ndërsa ka shtuar se privatizimi në Shqipëri është një rrugë e mirë për të luftuar korrupsionin. “Gjithashtu administrata ime është zvogëluar dhe sot mund të them se Shqipëria ka gjysmën e administratës së Maqedonisë. Qeveria e vogël funksionon, qeveria në dietë jep rezultat. Lufta kundër korrupsionit është vendimtare, por penalizmi i atyre që bëjnë korrupsionin është thelbësor. Për këtë arsye, qindra zyrtarë në Shqipëri janë dënuar për korrupsion. Dhe ky progres është pasqyruar edhe në shkallën e renditjes së vendeve me korrupsion”, ka thënë ai.

Aktualisht, ka thënë Berisha, Shqipëria është bërë një vend shumë i mirë për investime dhe shifrat janë inkurajuese. “Në 2008 ne kishim një rritje ekonomike prej 8%. Në 2009 kjo shifër ka një rënie, por është akoma mbi 5%. Kujtoj fjalët e Sharl Dë Golit mbi Evropën të shtrirë nga Vladivostoku deri në Vankuver, Evropë e cila sot po ecën drejt zgjerimit të saj. Evropa nuk do të ishte e plotë nëse të gjitha territoret saj, të cilat po ndërtojnë dhe forcojnë të njëjtat vlera evropiane, nuk përfshihen në të, si në rastin e Turqisë. Është e vërtetë se Turqia është një vend me mendje evropiane dhe zemër aziatike por Kostandinopoja ishte djepi i qytetërimit tonë”, ka thënë Berisha.