Domain .al i lire per te gjithë Shqiptarët

**Kliton** · 13-04-2010, 08:24 AM

Prej sot e tutje çdo shtetas, me nënshtetësi dhe kombësi shqiptare mund të hap një adresë interneti personale duke përdorur prefiksin identifikues të domenit të shtetit të Shqipërisë në internet “.al”.
Ky shërbim deri më tani u është ofruar vetëm personave juridik apo fizik, por tani kjo gjë ka ndryshuar dhe ndërkohë edhe tarifa është bërë më e lirë, duke rënë në 2 mijë lekë të vjetra në dy vjet.

Organi përgjegjës që merret me regjistrimin e abonentëve të rinj në kuadër të domenit shqiptar “.al” është Autoriteti i Komunikimeve Elektronike dhe Postare.

Sipas AKEP, këto lehtësime për përdorimin e domenëve me prefiksin .al është bërë si përgjigje ndaj kërkesave të larta të kompanive dhe individëve shqiptarë për të pasur këtë shërbim, të cilët po kërkojnë që të identifikohen në tregun ndërkombëtar edhe përmes internetit.

Padyshim që kjo ofertë do të jetë edhe një plus i madh për banorët e Kosovës , të cilët në mungesë të domenit shtetëror (i cili pritet të jetë .ks, .rks apo .kv), do të shfrytëzojnë rastin që të regjistrojnë web faqen e tyre në kuadër të domenit të Shqipërisë, dhe të identifikojnë vetën me këtë prefiks.