Taksistët pa leje, shumica janë policë !!

[labja]

Taksistët e licencuar priten nga Bashkia e Tiranës për të diskutuar çështjen e konkurencës së pandershme. Menjëherë pas botimit të ankesës së taksistëve në gazetën “Shekulli”, Bashkia e Tiranës i ka pritur në një takim të veçantë përfaqësuesit e Sindikatës së Taksistëve dhe taksistë të tjerë me leje. Pas një diskutimi të gjatë dhe prezamtimit të disahershëm të kërkesave të tyre, përfaqësuesit e bashkisë kanë rënë dakord për plotësimin e kërkesave brenda muajit prill.

Kryetari i Sindikatës së Taksistëve, Gëzim Bardhi shprehet se ky reagim i bashkisë erdhi menjëherë pas botimit të ankesës së tyre në gazetën “Shekulli”. Ndërsa taksistët që punojnë me leje bëjnë të ditur se punën po ua marrin policët. Sipas Bilbil Carës, policët punojnë paradite në polici dhe pasdite punojnë si taksistë. Ai shprehet se vendet dhe klientela po u merren nga policët, sidomos gjatë natës apo fundjavave. Gjatë takimit në bashki për këto ankesa, ata janë pritur nga Taulant Zeneli, drejtor i përgjithshëm; Nereda Hoxha drejtoreshë e Transportit; Florenc Hoxha shef i Policisë Bashkiake.

“Ne duam që Bashkia e Tiranës të marrë parasysh edhe rritjen e çmimit të udhëtimit, të përcaktuar nga taksimetrat. Çmimi i karburantit është rritur disa herë dhe ne kemi mbetur me çmime të njëjta, të disa viteve më parë. Për ne është e papërballueshme financiarisht që të punojmë me çmimet e mëparshme, pasi nuk kemi fitim. Të gjithë që kanë varësi nga karburantet i kanë rritur çmimet, ndërsa ne nuk kemi bërë asnjë lëvizje për këtë gjë, pasi presim miratimin e Bashkisë së Tiranës për të punuar brenda rregullave”,- shprehet Gëzim Bardhi.

Ndërkohë që Bashkia e Tiranës u ka premtuar që të nënshkruhet akt-marrëveshja sindikatë-bashki, në mënyrë që taksistët të jenë palë në vendime të ndryshme që mund të merren nga bashkia në lidhje me ta. Këto kanë qenë edhe pikat kryesore të diskutimit,që bashkia ka dhënë fjalën se brenda muajit prill do të realizohen të gjitha kërkesat. Ndërkohë që, plotësimi nqë kohë i këtyre kërkesave është parë me skepticizëm nga taksistët e kryeqytëetit. Kjo, pasi këta të fundit janë përfshirë në protesta të herëpashershme, sidomos gjatë dy viteve të fundit. Taksistët e pyetur, nëse kanë besim se çështja e tyre do të rregullohet, shprehen skeptikë dhe kërkojnë që të paktën të zhduken taksitë që punojnë në të zezë.