Arrestohet në Uruguaj bosi i firmës piramidale “Populli”

[kuklla]

Arrestohet në Uruguaj bosi i firmës piramidale “Populli”

Wednesday, 24 September 2008

Themeluesi i firmës mashtruese piramidale “Populli”, Bashkim Driza, është vënë më në fund në pranga. Ai u arrestua në kontinentin e Amerikës së Jugut, në Uruguaj. TIRANE-Autoritetet policore e shtetit të Uruguajit bënë të mundur arrestimin e shtetasit Bashkim Driza, 50 vjec, pas kërkesës së Interpol Tirana. Sipas vendimit të gjykatës shqiptare, shtetasi Bashkim Driza, gjatë viteve 1996-1997, në bashkëpunim me persona të tjerë ka krijuar fondacionin “POPULLI”, dhe përmes kësaj veprimtarie ai ka mashtruar 304 mijë e 240 shtetas, me shumën 870 milionë Lekë.

Policia e Shtetit bëri të ditur se pas shpalljes në kërkim ndërkombëtar të këtij shtetasi, është mbajtur korrespondencë e vazhdueshme me Interpol Santiagon-Kili, Interpol Montevideon-Uruguaj dhe Interpol Santo Domingon - Republika Dominikane, pasi shtetasi Driza njihej nga ana e tyre. Nga informacionet që ata i kanë dërguar here pas here Interpol Tiranës, mësohet se Driza ishte i pajisur me pasaportë uruguajane dhe dominikane, si dhe kishte lëvizur nga Uruguaji dhe Kili për në Republikën Domenikane dhe anasjelltas. “Me mesazhin e datës 22.09.2008, jemi informuar nga Interpol Montevideo se shtetasi Bashkim DRIZA është arrestuar në Uruguaj, dhe se aktualisht është në “Arrest shtëpie”, si dhe është kërkuar dërgimi i dokumentave në rrugë diplomatike”, bëri të ditur në një komunikatë për shtyp, Policia e Shtetit. Nga ana e Interpol Tiranës ky mesazh i është dërguar Ministrisë së Drejtësisë, për të bërë të mundur dërgimin e dokumentacionit në rrugë diplomatike pranë autoriteteve uruguajane, për ndjekjen në vazhdimësi të procedurave për ekstradimin e shtetasit Bashkim Driza.

Në rast se procedurat përfundojnë në kohë, themeluesi i firmës piramidale “Populli” që mashtroi para 11 vjetësh mijëra shtetas shqiptarë do të vuajë dënimin në burgjet shqiptare.
Mbeten të zbardhen motivet pse Driza kishte zgjedhur të këtë pjesë të globit për t’i humbur nga sytë drejtësisë shqiptare. Amerika e Jugut ka qenë një fend strehimi i preferuar për nazistët që arratisën pasi u shpallën në kërkim për krime kunder njerëzimit pas Luftës së Dytë Botërore.