CIA e FBI në panik: iPhone është radar për talibanë

[vaaldr1n]

Nëse nuk keni punë më të mençura për të bërë që të kaloni kohën, pse nuk do të shkonit në gjueti të aeroplanëve me aplikacionin Plane Finder AR, është slogani reklamues i cili fundjavën e kaluar ka shqetësuar ekspertët britanikë të sigurisë dhe politikanët.

Në fakt, kompania britanike Pinkfroot ka lansuar aplikacionin e quajtur Plane Finder AR i cili përdoruesve të iPhone dhe Google Android u mundëson që në ajër të përcjellin saktë pozicionin e aeroplanit.

Plane Finder AR, i cili shitet nëpërmes të dyqanit online për aplikacione të Apple me çmim prej dy eurosh, është lansuar para dy javësh, e tani për tani ai përdoret nga mbi 2.000 njerëz. Por, ekspertët britanikë të sigurisë vlerësojnë se aplikacioni duhet ndaluar urgjentisht, sepse ai paraqet një armë të rrezikshme në duart e terroristëve. Menjëherë kanë reaguar edhe disa politikanë britanikë të cilët gjatë ditëve të fundit janë shqetësuar edhe më shumë nga rreziku potencial prej sulmeve terroriste të Al-Kaidas.

“Janë krejtësisht të marra ato që armiqve u ndihmojnë në gjetjen më të lehtë të caqeve për sulm. Qeveria duhet që menjëherë të gjej mënyrë për të shpallur pajisje të tilla të jashtëligjshme”, ka deklaruar për gazetën “Daily Mail” Patrick Marcer, deputet i parlamentit nga radhët e konservativëve i cili ka qenë në ballë të komisionit për luftë kundër terrorizmit në parlamentin britanik.

Aplikacioni kontestues bazohet në ndeshjen e sinjalit e ashtuquajtur ADS-B (Automatic Dependent Survelliance - Broadcasts), një teknologji e cila mundëson emetimin e pozicionit të aeroplanit. Kontrollet ajrore në Britani të Madhe dhe Evropë ende nuk kanë miratuar këtë teknologji, por ajo është e integruar në aeroplanë të ri të cilët vazhdimisht emetojnë pozicionin e tyre. Pas sulmit terrorist në SHBA më 11 shtator 2001, ekspertët amerikanë të sigurisë e kanë shpallur këtë teknologji të rrezikshme, sepse ajo hap mundësi për sulme të reja terroriste me aeroplanë.

Kompania Pinkfroot është vetëm një nga shumë kompanitë në Evropë, Amerikë e Australi të cilat shfrytëzojnë teknologjinë ADS-B për të ofruar shërbimet e përcjelljes së pozicionit të aeroplanit në ajër “në kohë pothuajse reale”.

“Ne vetëm kemi shfrytëzuar informatat të cilat emetohen lirshëm, e aplikacioni ynë nuk është tërësisht në kohë reale, por vonohet 30 sekonda. Nëse dikush dëshiron që me të vërtetë të rrëzojë aeroplanin, aplikacioni ynë nuk është i nevojshëm, por mund të blejë radar apo pranues ADS-B”, ka deklaruar Lee Armstrong, drejtor i kompanisë Pinkfroot.