Kapen grabitësit e një banke në Durrës

[gjendar]

Durrës, 19 shkurt - Nuk kanë kaluar as 24 orë nga grabitja e filialit të bankës në “Rrugën Tregtare” të Durrësit, kur policia ka vënë në pranga dy nga autorët e saj, ndërsa është shpallur në kërkim personi i tretë.
Operacioni i policisë së qytetit bregdetar në bashkëpunim me policinë e Tiranës ka vënë në pranga Romeo Dopellin, 24 vjeç, dhe Daso Jaupllarin, 41 vjeç, banues në Tiranë. Personi i tretë i shpallur në kërkim është 37 vjeçari me inicialet A. E., me banim në Durrës. Policia informon se nga kontrolli në banesa është gjetur edhe sasi e parave të vjedhura, si dhe janë sekuestruar dy pistoleta dhe një veturë Ford Fiesta, njoftoi BW.
Grabitja e filialit të bankës në Durrës ndodhi dje rreth orës 09:10. Dy meshkuj kanë hyrë në filialin e banke si klientë dhe, në momentin kur kanë mbërritur pranë arkës, kanë kërcënuar me armë punonjësen e bankës. Si provë materiale policia sekuestroi edhe videot e kamerave të sigurisë, që kishin arritur të regjistronin pamjet e vjedhjes.