Sekretet e një zonje 100% klasike

[Altin111]

Përtej kamerave dhe asaj që shfaq në publik, rrëfimi i Xhoana Nanos. Përtej suksesit të biznes, jeta e një familjeje normale. Gruaja e ish- kryeministrit tregon gjithë çikërrimat femërore, që nga veshja e “look”-u e deri tek pasioni për kuzhinën dhe arredimin. Por edhe dy dashuritë e saj të mëdha: Klajdin dhe Fatos Nanon

Fotografit të revistës sonë nuk i nevojitet sigurisht një shtrëngim dore dhe një prezantim i thjeshtë fare “Xhoana”, për ta njohur personazhin e kopertinës së radhës. Përkundrazi, ka ardhur i përgatitur shpirtërisht që do fotografojë pikërisht Xhoana Nanon dhe prandaj ka marrë me vete të gjitha pajisjet e ndriçimit, ka pyetur se me çfarë ngjyrash është e arreduar zyra e saj, të ç’natyre do të jenë veshjet…

Veçse ai shtrëngim dore, shoqëruar me prezantimin e thjeshtë “Xhoana”, e bën të ndihet menjëherë shumë më komod nga sa mendonte se mund të ndjehej përballë gruas së ish – kryeministrit apo kandidatit për president të Republikës dhe kështu mund të punojë fare i shpenguar: t’i sugjerojë një pozë të caktuar, të insistojë që ajo ta mbajë kokën pak më përpara, të buzëqeshë pak më shumë, të mos qeshë aq shumë… Gati gati po aq i shpenguar, sa ç’është edhe Lili, parukierja dhe grimierja prej vitesh e Xhoana Nanos, (e pranishme gjatë gjithë kohës në setin e imporovizuar fotografik) e që duket që ka me të një miqësi që shkon përtej marrëdhënies së thjeshtë me një kliente.

“Eshtë pikërisht kështu”, thotë Xhoana Nano, “Ka disa njerëz, si avokati apo parukierja për shembull, me të cilët ndihesh mirë kur i ke edhe miq”. Prandaj dhe që nga viti 2002 ajo ia beson look-un e vet vetëm duarve të Lilit, pikërisht atyre duarve që mund të bëjnë mrekullira, por pa ia ndryshuar kurrë thelbin: origjinalitetin klasik.

Xhoana Nano nuk është aspak tipi që i pëlqejnë ndryshimet dhe eksperimentet. Eshtë mjaftueshmërisht e bukur për të kërkuar që të bëhet edhe më. Dhe është e ndërgjegjshme se të qenit gruaja e Fatos Nanos, të qenit personazh publik dhe në qendër të vëmendjes është një përgjegjësi më shumë, nga ato që të bëjnë të peshosh mirë çdo hap që hedh, duke rrezatuar vetëm qëndrueshmëri. Prandaj dhe që nga ajo dita e parë kur u shfaq publikisht në krah të tij e deri sot e kësaj dite, duket sikur nuk ka rrjedhur asnjë gram kohë, ajo vijon të jetë po e njëjta: të njëjtët flokë të zinj të gjatë dhe veshjet rigorozisht klasike.

Sa u takon flokëve, nuk e mban mend veten përveçse kështu, përveç një rasti diku nga klasa e shtatë kur guxoi t’i bënte “të shkurtra” deri poshtë supeve, apo një rasti tjetër kur pothuajse njëzetvjeçare guxoi të bënte një permanent, që bëri çmos pastaj t’ia hiqte sa më shpejt efektet… Për sa u takon veshjeve, nëse nuk është në krah të të shoqit, atëherë mund edhe të dalë pa kostumet e saj të përhershme, të jetë edhe me ndonjë fustan sport chic mëndafshi (sapo mbaron fotografitë, vesh një të tillë), apo me një bluzë me ngjyra. Por edhe këto nuk mund të jenë përveçse brenda stilit të saj klasik. “Mendoj se është e gabuar të ndjekurit e çdo lloj mode.

Çdokush duhet të gjejë stilin e tij në bazë të personalitetit që ka. Prandaj dhe më pëlqen të ndjek gjithmonë stilin tim, atë që edhe më përshtatet”. Kjo nuk do të thotë aspak që Xhoana Nano nuk e përshtat gardërobën sipas tendencave të modës: mund të luajë me ngjyrat dhe dizajnin e copave, por duke ruajtur prerjet klasike. Ka ca rregulla, të cilat i zbaton gjithmonë, shkon drejt tyre qoftë edhe në mënyrë të pavetëdijshme. Si fundet për shembull, të cilat janë gjithmonë të gjatë poshtë gjurit (një kuriozitet: nuk ka veshur kurrë minifund, as në fillim të viteve ’90 kur fundet e shkurtër ishin një must i të gjithë gardërobave).

Gjithashtu mund të guxojë t’i rëndojë pak gërshërët mbi të hapurën e bluzës, ama gjithmonë për nga drejtimi i supeve, asnjëherë në mënyrë vertikale. Mos prisni ta shihni kurrë me ndonjë jakë “V” të theksuar. Dekolteja e saj tenton të hapet vetëm drejt shpatullave. Ashtu si bluza që ka zgjedhur për të pozuar në kopertinën e revistës. Apo si fustani i saj i dasmës, të cilin ajo e kërkoi të ishte i tillë. Ky është stili i saj lehtësisht i identifikueshëm. Aq sa nuk do ishte fare çudi që ndoshta pas disa vitesh, zonjat klasike, bashkë me palltot rozë stil Jacie O, të zgjidhnin edhe jakat tip Xhoana N.

Shijen e saj klasike Xhoana Nano, përveçse në zyrën dhe në “look”-un e saj, e ka stampuar edhe në zyrën e bashkëshortit dhe në shtëpinë e tyre. Dy “kryeveprat” e fundit të saj sapo kanë mbaruar: në shtëpi ka shembur disa mure, ka ndryshuar disa dekorime dhe u ka ndërruar vendet disa ambienteve, kurse me zyrën e të shoqit, një hapësirë te Kullat Binjake, është marrë nga fillimi në fund vetë. “Unë e njoh tashmë shumë mirë dhe e di se çfarë i pëlqen dhe e bën të ndihet mirë.

Dhe ai nuk ia besoi asnjë arkitekti tjetër”, tregon e kënaqur zgjedhjen dru panna, ngjyrë floriri dhe vishnje të zyrës, që sipas saj, tregon “harmoninë e shpirtit të dëlirë dhe zemrës së ngrohtë”, ku ish- kryeministri zhvillon gjithë aktivitetin e tij politik. Me të njëjtat ngjyra (vetëm se pa të florinjtën), por me mobilie pak më moderne, Xhoana ka arreduar dhe zyrat e kompanisë së saj “Joy Travel”. Tregon se pak a shumë këto ngjyra mbizotërojnë edhe tani me ndryshimet e reja që i janë bërë banesës së tyre pas Shallvareve... Vetëm se ndryshe nga biseda për zyrat, tek kjo e shtëpisë nuk i pëlqen të ndalet më gjatë.

Dhe zor se do të pranonte të fotografohej brenda atyre ambienteve. Janë sigurisht zonë e ndaluar për kureshtarët... “Gjithsesi aty mbizotëron rregulli, pastërtia, lulet dhe ngjyrat relaksuese”, tregon Xhoana, e kënaqur që ky rinovim i fundit i ka dalë ashtu siç e kishte imagjinuar. “Në fakt, nuk jam natyrë shpërdoruese, më pëlqen që gjërat t’i ndryshoj, por jo t’i zhbëj dhe të blej domosdoshmërisht të reja. Ndryshimi në shtëpi më kënaq, qoftë edhe kur ndërroj sistemin, ndër të tjera sepse ndihem shumë mirë kur merrem me punë”.
Në fakt, vetëm për punë që Xhoana Nano nuk ka pse të ankohet: është ndër ato pak femra që mund të krenohet e të thotë me gojën plot se gjithçka që ka e ka ngritur vetë.

“Është një gjë, për të cilën ndihem sigurisht mjaft krenare: isha vetëm 26 vjeç kur mendova se kishte ardhur momenti që gjithë përvoja që kisha grumbulluar në këtë biznes, mund të më shërbente për të krijuar diçka timen. Nuk ishte sigurisht gjëja më e thjeshtë në botë, por kur gjërat bëhen me vështirësi, janë edhe më të vlefshme”. Gjithçka nisi në vitin 1999: kishte momente që ajo mendonte se edhe mund të dështonte, tani, tetë vjet më pas, e gjitha i duket një iniciativë shumë e madhe: “Tani më vjen mirë që me gjithë moshën që kisha, besoja shumë tek vetja”, rrëfen pa e mohuar aspak faktin që të qenit Zonjë e Parë e ka bërë më të dukshëm biznesin e saj, duke shërbyer si publicitet i mirë. “Do ishte e panatyrshme ta mohoja këtë gjë. Sepse në biznes, edhe thashethemet dhe keqdashjet e shpifjet, mund të të shërbejnë si reklamë”, tregon ajo duke qeshur.

Por kjo nuk do të thotë aspak që i ka pritur gjithmonë kaq e qeshur thashethemet apo ato që janë shkruar për të. Sidomos në fillimet e lidhjes së saj me Fatos Nanon, atëherë kur historia e tyre ishte kryefjalë e të gjithë gazetave. “Në fillim më shqetësonin, sigurisht. Mesa duket, nuk më ishte trashur lëkura akoma”,- thotë, teksa kujton se ishte qetësia e Fatos Nanos, që i shihte të gjitha si shakatë e zakonshme, ajo që e kishte bërë t’i merrte me më shumë sportivitet ato që thuheshin dhe ato që shkruheshin.

Por kjo nuk do të thotë që edhe tani i është trashur lëkura aq sa të zbavitet me ato që mund të sajohen. Thjesht beson se është forcuar, ndonëse ka edhe raste që vazhdon të mërzitet. “Më shqetësojnë sigurisht kur kalojnë çdo kufi, kur rrëmojnë në familje. Sidomos mërzitesha në fillim kur brenda gjithë kësaj përfshinin edhe tim bir, Klajdin. Më shqetësonte mbi të gjitha si ndikonte kjo në botën shpirtërore të një vogëlushi në rritje”. Por tashmë ky nuk është më shqetësim: Klajdi është rritur dhe ka mendimin e tij për gjithçka.

Ka raste që Klajdi, Xhoanës i duket si i rritur para kohe: “Jep vlerësime apo gjykime të çuditshme, edhe për gjërat që unë mendoj se ai ende nuk i di. Për këtë më vjen edhe pak keq, më duket ende herët dhe mendoj se duhet që ai të vazhdojë të shijojë fëmijërinë e tij”. Por ja që Klajdi, tashmë një 14-vjeçar, gati një kokë më i gjatë se e ëma, është rritur dhe përveç daljeve të zakonshme të adoleshentëve pasditeve, ka edhe dëshirë të shkojë nga pak e të ndihmojë mamin në zyrë. Nga ana tjetër, sapo ka mbaruar klasën e tetë me të tëra dhjeta, duke bërë krenare mami Xhoanën dhe duke mbajtur fjalën që i kishte dhënë babi Fatosit (mami Xhoana, si të gjitha mamatë e botës, e thotë këtë me sy të rrëmbushur nga lumturia).

Ka dhënë edhe dy provimet e para, ku ka marrë gjithashtu dhjetë dhe i ka mbetur për t’u marrë dhjeta e fundit, ajo në lëndën më të lehtë për Klajdin, matematika: “Në matematikë i ka ngjarë sigurisht mamit”, - thotë Xhoana e lumtur që i biri ka trashëguar nga ajo pasionin për shkencat ekzakte. Dhe sigurisht që edhe aftësinë për biznes në të ardhmen. Kur vjen puna tek e ardhmja e Klajdit, Xhoana ndjen ta kapë njëfarë shqetësimi: “Kam një lloj keqardhjeje kur mendoj që do vijë koha e fakultetit dhe mund të ikë nga shtëpia.

Por përpiqem të mos e mendoj, thjesht e spostoj në kohë këtë mendim”. Ka në fakt shumë gjëra të tjera për të menduar e për të shijuar bashkë me të birin. Për shembull, teksa të dy pozojnë përpara aparatit dhe ai i kursen buzëqeshjet, ajo nis dhe e ngacmon për një shoqe... Kaq dhe asnjë fjalë më shumë në syrin tonë: ajo nuk mund të rrezikojë kurrsesi të rrëfejë intimitetet e të birit dhe të humbë pastaj atë fill sekretesh që i lidh bashkë...

E ndërsa ajo vijon ta trajtojë si fëmijë të vogël, ndonëse nga ai Klajdi i ca viteve më parë që buzëqesh në një fotografi në zyrën e saj (me ondet e verdha që i ka bërë zero vetëm një ditë më parë) fare pak ka mbetur, Fatos Nano ka kohë që sillet dhe bisedon me të si me një të rritur. “Tani jam plotësisht e bindur që fëmija është ekzaktësisht pasqyra e prindërve”,- thotë Xhoana, teksa tregon që në fund të fundit Klajdi i saj i ruan akoma ca zakone fëminore.

Siç është për shembull dëshira për të shijuar gatimet e mamit të vet. “Kjo është një kënaqësi, nga e cila edhe unë nuk dua të heq dorë: e shoh që edhe Fatosit edhe Klajdit u pëlqen kur unë gatuaj për ta”, -tregon Xhoana, e bindur se sipas të gjitha parametrave, me të cilat mund të matet një zonjë shtëpie, ajo quhet amvisë e mirë. Si vajzë e rritur në shtëpi nga gjyshja, ka pasur fatin e të mësuarit të të gatuarit e të gjitha specialiteteve shqiptare: “Vetëm se me petët e bakllavasë e kam problem, kurse të byrekut i bëj mjaft mirë”. “Trajnimit” të dikurshëm të gjyshes ajo i ka shtuar edhe specialitetet që ka mësuar vitet e fundit nëpër libra dhe revista të specializuara, blerja e të cilave është një zakon nga i cili ajo nuk mund të heqë kurrë dorë.

“Nga ana tjetër, jam nga ato natyra që më pëlqejnë delikatesat e shijshme”. Nuk do t’ia privonte kurrë vetes kënaqësinë e ushqimit, edhe nëse kjo do t’i garantonte ca kilogramë më pak, pra më shumë elegancë. “Ndoshta do të ishte mirë sikur të kisha qoftë edhe gjysmën e vullnetit të bashkëshortit tim për t’u marrë me sport: nëse ai nuk ka ditë që të mos bëjë ushtrime, unë pasionin për sportin e kam me periudha”.

Nëse nuk do të frekuentonin të dy palestrën e shtëpisë së tyre, por një palestër publike, ndoshta Xhoana do të kishte qenë më e rregullt në frekuentimin e një sporti me trajner tek koka. “E kemi provuar një herë, por nuk ishte dhe aq e thjeshtë: si mund të bësh stërvitje kur ngjall kureshtjen e të tjerëve që nuk t’i ndajnë sytë!?”. Një privim ky, me të cilin Xhoana Nano tashmë është mësuar. Jo vetëm sa i takon frekuentimit të palestrave apo ambienteve te tjera publike.

Të qenit në qendër të vëmendjes e ka bërë që të ridimensionojë shumë gjëra tek vetja: “Të duhet të ruash masën për çdo gjë, çdo veprim i yti, ka gjithmonë një tjetër përgjegjësi”. E nëse Fatos Nano do të rikthehej edhe njëherë në pozicion protagonisti në jetën politike, duke u zgjedhur President i Republikës dhe ajo të ishte sërish Zonjë e Parë? Xhoana Nano nuk ka pikën e dëshirës të merret me spekulime politike.

Pranon qetësisht të thotë atë që e ka thënë edhe herë tjetër: “Personalisht do ta doja ta kisha vetëm për vete, sepse kur ke të bësh me një politikan të këtij niveli, do të duhet që bashkëshortin ta ndash gjithmonë me të tjerët. Sidomos me simpatizantët, që në rastin e tij janë të panumërt. Por sigurisht nuk mund të jem unë ajo që mund ta ndryshoj rrugën e tij. Për mua është një fakt i pranuar”. Nëse do të ribëhej Zonjë e Parë sërish, për të nuk do të ishte aspak diçka e re. E ka gjithë eksperiencën e mjaftueshme, ka sjelljen e duhur për çdo rast, siç ka edhe thjeshtësinë edhe buzëqeshjen e ëmbël, me të cilën çarmatosi dhe relaksoi në të qindtën e sekondës edhe fotografin tonë, teksa i shtrëngoi dorën dhe iu prezantua ashtu thjesht: “Xhoana”