Një serb i Pasjanit e vret një 14-vjeçar shqiptar

**lovee** · 06-03-2011, 09:42 PM

Prishtinë, 6 mars - Lidhur me rastin e vrasjes së një fëmije 14 vjeçar nga fshati Uglar i Gjilanit, policia ka arrestuar një të dyshimtë. I arrestuari është nga fshati i banuar me serbë - Pasjan i Komunës së Parteshit. Ai është ndalë për 48 orë për hetime. I arrestuari Zh. S (44), dyshohet të jetë i përfshirë në rastin në fjalë.

Policia nuk ka bërë të njohur identitetin e viktimës, por nga familjarët mësohet se bëhet fjalë për Leutrim Musliun, i lindur më 1997, raportoi koha.net.

Ky rast, që ka tronditur Gjilanin, ka ndodhur pasditen e së shtunës, ku, sipas policisë, viktima, i shoqëruar nga babai dhe disa persona të tjerë, po ktheheshin nga mali, ku kishin shkuar për të marrë dru. Sipas prindit të fëmijës së vrarë, ata ishin gjuajtur me të gjitha llojet e armëve nga të dy krahët. Ai thotë të ketë qenë si luftë dhe se janë përdorur edhe bomba.

Sipas Rrahim Musliut, prindit të Leutrimit të vrarë, ata janë gjetur në mes të shtënave nga të dyja krahët. Ai ka thënë se ka pasur dy grupe dhe se prej njërës anë i është vrarë djali, ndërsa nga të shtënat e anës tjetër i është vrarë kali, me të cilin bartte drutë.

Sipas tij, të shtënat nga të dyja anët nuk kishin pushuar. Ndërkohë Leutrimi i plagosur është dërguar në Emergjencën e Spitalit Rajonal të Gjilanit, ku konstatohet vdekja e tij nga plagët e marra prej armës së zjarrit. Sipas Rrahimit, dyshohet se ishte shtënë nga automatiku.

Ndërkaq, Policia ka njoftuar të dielën se gjatë bastisjes në shtëpinë e serbit të dyshuar për vrasjen e fëmijës, është gjetur një pushkë gjuetie dhe disa fishekë.