Fier, shtëpi publike pranë policisë.

[Altin111]

Zbulohet bordello vetëm 100 metra larg komisariatit. Agjentët u infiltruan si klientë për të kapur prostitutat

Pas më shumë se 3 muaj hetimesh dhe infiltrim të një efektivi, policia gjen një tjetër bazë prostitucioni në Fier. Policia lokale ka organizuar dje një aksion me emrin e koduar "Village park" dhe ka arrestuar tre persona, si dhe ka shpallur në kërkim një të katërt. Sipas informacioneve zyrtare të policisë, mësohet se dy prostituta dhe personi që u gjente klientët janë ndaluar në orët e vona të mbrëmjes së të shtunës. Rustem Hasanaj, lindur në Ballsh dhe banues në Tiranë, është i ndaluari, ndaj të cilit rëndon akuza e shfrytëzimit të prostitucionit. Anisa Silollari, 21 vjeçe, është arrestuar me akuzën e ushtrimit të prostitucionit. Kjo e fundit banonte në Pogradec, por kishte disa muaj që shfrytëzohej si prostitutë në qytetin e Fierit. Ndërkohë që Albina Lika, sipas burimeve të policisë Fier, jo vetëm që ushtronte prostitucion, por siguronte edhe ambientet e ushtrimit të prostitucionit për vajzën tjetër. Ndërkohë që kreu i dyshuar i këtij grupi, Astrit Koroveshaj, lindur dhe banues në Fier, 32 vjeç, është shpallur në kërkim prej policisë me akuzën e "shfrytëzimit të prostitucioni në rrethana rënduese". Burimet zyrtare të policisë tregojnë se Anisa Silollari shfrytëzohej për prostitucion, ndërkohë që femra tjetër e arrestuar, Albina Lika, punonte me vullnetin e saj në këtë profesion. Madje, për të ndërtuar mjaft mirë strukturën e këtij aktiviteti, Likaj kishte vënë në dispozicion jo vetëm banesën dhe lokalin e saj, në afërsi të komisariatit të policisë, por kishte arritur të lidhte marrëveshje edhe me disa drejtues hotelesh e motelesh në qendër dhe periferi të qytetit të Fierit. Është dashur një hetim afro tremujor nga ana e policisë së Fierit, që të zbardhet e gjithë skema që përdornin të arrestuarit. Mbrëmjen e së premtes, tre të prangosurit kanë qenë në një hotel, në Qafën e Koshovicës, midis Fierit dhe Vlorës, ku janë kapur në flagrancë duke ushtruar aktivitetin e paligjshëm. Policia ka ndaluar gjithashtu edhe dy klientët, që ishin me dy të ndaluarat, ndërsa i ka lënë të lirë ata rreth orës 10.00 të paradites së djeshme. Për ambientin ku janë gjetur duke ushtruar prostitucion, si dhe ambienti që vihej në dispozicion nga Albina Likaj, policia e Fierit ka marrë masën e sekuestros konservative. Gjithashtu, në cilësinë e provës materiale është sekuestruar një automjet tip "Mercedez Benz", me targa FR5609C dhe shuma prej 30 mijë lekësh të reja, që kishin paguar klientët natën e arrestimit. Por, ndërsa krerët e policisë theksojnë se për fajësinë e të arrestuarve ka prova bindëse, familjarët e Rustem Hasanit pretendojnë se ky i fundit është arrestuar gabimisht. "Kemi qenë të ftuar në një dasmë, e cila zhvillohej në atë hotel. Im bir mund të ketë qenë klient i atyre prostitutave, por kurrsesi tutor, sepse ai vjen shumë rrallë në Fier", ka thënë dje babai i Rustem Hasanajt, Enveri. Babai i të arrestuarit ka takuar dje edhe disa nga krerët e policisë së Fierit, të cilëve u ka ngritur të njëjtat pretendime, duke thënë madje se djali nuk mund të mbahet i arrestuar pa prova, vetëm sepse është me ngjyrë. *

[carolina]

shi shi shi....