Raporti, 32% e fëmijëve nga mosha 6-17-vjeç punojnë.

[Altin111]

Ministri i Punës, Barka, pohoi se KE-ja vlerëson që vendi ynë është vendburim për trafikimin dhe shfrytëzimin seksual të fëmijëve


Fëmijë që shfrytëzohen në maksimum për punë dhe ajo çka është më dramatike, fëmijët pësojnë edhe shfrytëzim seksual. Madje raporti i fëmijëve që punojnë tregojnë shifra alarmante, pasi plot 32 për qind e fëmijëve nga 6 deri në 17-vjeç punojnë. Këtë e deklaroi dje ministri i Punës dhe Çështjeve Sociale, Kosta Barka, i cili bëri analizën e Raportit të Progresit Evropian për Shqipërinë ku sipas tij, në raport vihen në dukje arritjet dhe mangësitë në fushën e problemeve sociale.

Puna e fëmijëve

Fenomen të përhapur dhe problem shqetësues për shoqërinë shqiptare konsiderohet puna e fëmijëve në raportin e KE-së, që u referua dje nga ministri Kosta Barka. "Puna e fëmijëve është një fenomen i përhapur, ku 32% e fëmijëve nga mosha 6-17-vjeç punojnë",- bëri të ditur Barka, duke shtuar se në raportin e KE-së rekomandohet që të merren hapa konkrete për të minimizuar sa më shumë këtë fenomen. Të ndodhur para kësaj situate shqetësuese Barka pohon se Strategjia Kombëtare për Fëmijët ka parashikuar një sërë masash për eliminimin e punës së fëmijëve. "Në këtë plan theksohet ngritja e strukturave të mbrojtjes së fëmijëve në nivel vendor. Një grup pune po punon për hartimin e protokolleve të punës së këtyre strukturave, si dhe të protokolleve të bashkëpunimit me institucione të tjera, të cilët përfshihen në punën për mbrojtjen e fëmijës",- pohon Barka, duke shtuar se ngritja e këtyre strukturave do të shoqërohet me trajnimin e të gjithë personave që do të punojnë me fëmijët.

Shfrytëzimi seksual

Raporti i KE-së për vendin është tepër pesimist edhe sa i takon shfrytëzimit seksual të fëmijëve. "Komisioni Europian shprehet se Shqipëria është vendburim për trafikimin e grave dhe fëmijëve për shfrytëzim seksual, vend tranziti për trafikimin e qenieve njerëzore dhe se problematike paraqitet situata në shfrytëzimin seksual të grave dhe fëmijëve brenda vendit",- pohon Barka. Kështu, sipas Raportit, format më të përhapura të trafikimit gjatë vitit 2006 kanë qenë trafikimi i fëmijëve dhe i femrave me qëllim shfrytëzimin e tyre në Perëndim, kryesisht Greqi, Itali. Gjithashtu bëhet e ditur se vërehet një tendence e re, që është shfrytëzimi brenda vendit i viktimave, kryesisht i fëmijëve për punë, duke përfshirë lypjen. "Komisioni Europian rekomandon forcimin e masave dhe bashkëpunimin institucional për luftën kundër trafikimit të qenieve njerëzore",- pohon Barka.