Xhaxhi që sjell në mur filmat e animuar

[EMAUS]

Xhaxhi që sjell në mur filmat e animuar.

Nga piktura monumentale tek pikturat murale për fëmijë, nga përmbytjet biblike tek 7 xhuxhat e përrallës.

Tendenca e momentit është që familjet e reja ti pikturojnë dhomat e fëmijëve me personazhet e dashur për ta.





Nga Bardha Nergjoni

Dikur, Blerimi ishte i prirur për nga piktura monumentale. Tani, pasioni i tij janë monumentet e Disney-t. “Prirja dhe pëlqimi im ishin drejt pikturës monumentale, të përmasave të mëdha, për shkak të lirshmërisë e kënaqësisë që më ofron realizimi i tyre.
Një tjetër motiv për mua është dëshira për të sfiduar hapësirën duke u përballur me kompozimin e figurave të përmasave të mëdha. Format e thjeshtuara, linjat dhe ngjyrat e plota, të rrafshëta, me karakter dekorativ të pikturave te mija më orientuan në përqasje të artit monumental. Si një art me profil publik, madje nganjëherë edhe me karakter të theksuar urban, për shkak të funksionit utilitar, si pjese e pandashme, bashkë ndërthurur arkitekturës, është dhe do mbetet për mua preferenca ime e veçantë”.

Piktura murale për fëmijë që janë kryesisht pikturat e animuara dhe ato dekorative janë vetëm një pjesë e shumëllojshmërisë së profileve të artit monumental tregon ai ndërsa e përcakton këtë lloj arti si utilitar në shërbim të fëmijëve. “Pikturat murale për fëmijë i shoh si një pjesë e veçantë e artit figurativ, përveç të tjerash edhe për faktin e eksperiencës së punës si mësues i artit figurativ me fëmijët. Piktura ndikon drejtpërdrejt në aspektin shpirtëror te fëmijët që është një pjesë shumë e rëndësishme e shëndetit të tyre. Për këtë arsye, kam prekur tendencën bashkëkohore të ndërthurjes së dijeve të marra nga fëmijët me artin pamor.

Qëllimi i pikturave në ambientet ku rrinë dhe mësojnë fëmijë është përfshirja e tyre në proçesin e të soditurit dhe të shpjeguarit të asaj që shikojnë dhe që i tërheq më tepër vëmendjen, qoftë format, ngjyrat, personazhet apo përshkrimi i fabulës së pikturës. Përveç anës pedagogjike të këtij proçesi, pikturat stimulojnë tek fëmijët reagimet psiko-sociale të përfshirjes në biseda në grup, të të shprehurit hapur të emocioneve dhe të ndjesisë të kënaqësisë në shprehjen cilësore të gjendjes së tyre shpirtërore”.

Blerim Minka është i njohur për pikturat e kartonëve dhe të fabulave më të njohura të botës së filmave për fëmijë. Ai veç kopshteve pikturon edhe dhomat e fëmijëve, një tendencë e re kjo e familjeve të reja. “Kam pikturuar disa murale për fëmijë qoftë në ambiente shtëpie, kryesisht dhoma gjumi por edhe ambiente të brendshme dhe të jashtme kopshtesh privatë. Në fakt kërkesa për këtë lloj pikture është në rritje edhe nga persona që duan të zbukurojnë shtëpitë e tyre.



Jeta ime

Mosha: 33

Vendlindja: Elbasan

Arsimi: Ka kryer shkollën e mesme artistike “Onufri” Elbasan dhe më pas Fakultetin e Artit Figrativ pranë Akademisë së Arteve në Tiranë. Aktualisht është edhe lektor i jashtëm i modelimit vizual të hapsirës pranë Universtetit Aleksandër Xhuvani.

Jeta: Blerimi ka një eksperiencë të gjatë me fëmijët duke qënë gjithashtu mësues i edukimit figurativ pranë Qendrës Kulturore të Fëmijëve. Ka marrë pjesë në shumë ekspozita me punimet e tij ndër të cilat, ne Sallonin e 38-te te konkursit te arteve pamore qe u organizua nga Akademia Evropiane e Arteve ne Belgjike, me dy punime të tij dhe u vlerësua me çmim inkurajues. Përsa i përket fëmijëve ai ka realizuar 7 piktura murale në kopshtin “Emaus” në Elbasan, ka realizuar gjithashtu piktura murale për kopshtin e qendrës “Një ëndërr më shumë” dhe skenografinë e koncertit “Të aftë ndryshe, të barabartë me të gjithë”.



“Arti është gjuhë universale komunikimi dhe nevojë e pazëvendësueshme shpirtërore. Rrëfimi i sinqertë, artistik i ngjarjes dhe ngarkesa emocionale që përcjell stilizimi përmes formës së thjeshtuar dhe tonet e ngjyrave me ndjesi të butë e harmonike janë veçoria e veprave të mia”.



“Pikturat për dhomat e gjumit të fëmijëve janë të preferuara për arsyen e thjeshtë se prindërit kërkojnë të plotësojnë dëshirat e fëmijëve të tyre e ti bëjnë që të ndihen sa më mirë”.

[ReniX]

Ta marri vesh Disney e bllokon kete inisiative, por si ide eshte shume e bukur!

[MAJDI]

I |Reni i ben reklam ti thua e bllokon