Ukrainë, dhjetëra të vdekur në minierë

[carolina]

Ukrainë, dhjetëra të vdekur në minierë

Shpërthim 1 mijë metra nën tokë. 67 minatorë konsiderohen të zhdukur

Një shpërthim metani në një mini erë qymyri në Ukrainë i ka marrë jetën të paktën 33 minatorëve, ndërkohë që 67 të tjerë konsiderohen
ende të zhdukur, pasi kanë mbetur të bllokuar në galeritë e nëndheshme. Kryeministri Viktor Janukoviç paraqiti bilancin e aksidentit, pasi urgjentisht mbërriti në vendngjarje, në Donetsk që është edhe vendlindja e tij. Ai tha se zjarri vazhdonte të ishte jashtë kontrollit në thellësinë
1 mijë metra. "Deri më tani janë 33 minatorët e vdekur. Edhe 67 të tjerë mungojnë. Fati i tyre është i paditur", tha Janukoviç pas takimit me një komision hetimi të aksidentit. Nuk është e qartë ndërkohë se sa prej personave që konsiderohen të zhdukur kanë qenë në afërsi të zonës ku ndodhi shpërthimi. Autoritetet ndërkohë konfirmojnë se 27 minatorë gjenden në spital dhe një prej tyre është në gjendje të rëndë. Shifrat e rendisin aksidentin ndër më të rëndët qëkur Ukraina siguroi pavarësinë nga Bashkimi Sovjetik, në vitin 1991. Sindikalistët thonë në anën tjetër se shtatë prej viktimave janë identifikuar. "Ka tym të dendur dhe për momentin, ekipet e shpëtimit nuk mund të hyjnë në galeri", tha një zyrtar i sindikatës së minatorëve. Ndërkohë, të afërmit e minatorëve, në lot, presin të dëgjojnë ndonjë lajm, por autoritetet i kanë detyruar ata të qëndrojnë jashtë zyrave qendrore. Televizionet ndërkohë shfaqnin pamjet e të mbijetuarve nga shpërthimi që mjekoheshin në spital. "Temperatura u rrit ndjeshëm. Nuk mund të shikonim më asgjë", rrëfen një minator. "Unë menjëherë vendosa pajisjet e frymëmarrjes dhe gjeta rrugën për të dalë jashtë", vijon ai. Sipas deklaratave të drejtuesve të minierës, 457 minatorë gjendeshin në galeri në kohën e aksidentit. Skuadrat e shpëtimit ndërkohë kanë mundur të nxjerrin në sipërfaqe më shumë se 350 prej tyre. Aksidentet janë të zakonshme në minierat e qymyrit në Ukrainë, kryesisht për shkak se ato janë të vjetra, të ndërtuara që në mesin e shekullit të 19-të. Sipas statistikave
zyrtare, numri i viktimave në aksidente në miniera në Ukrainë, vetëm këtë *vit, është 80. Por, sindikatat thonë se shifra reale është akoma më e lartë. Vetëm vitin e shkuar, në Ukrainë janë numëruar 170 viktima të aksidenteve në miniera. Aksidenti më vdekjeprurës në Ukrainën e pas-Bashkimit Sovjetik, ka ndodhur në mars 2000, kur 80 minatorë humbën jetën në një minierë qymyri në qytetin Luhansk, për shkak të një shpërthimi.

Sipas statistikave vetëm gjatë këtij viti në Ukrainë, kanë humbur jetën në incidente të ngjashme, 80 minatorë