A është stresi justifikim për të mos e lënë duhanin ?

[vaaldr1n]

Edhe pse me siguri nuk keni filluar të pini duhan për ta lehtësuar stresin, tani me siguri që e konsumoni akoma duhanin sepse mendoni që kjo ju liron nga stresi.

Është e vërtetë që pirja e duhanit mund t’ju ofrojë ndjenjë të përkohshme të lehtësimit nga stresi. Nikotina arrin deri tek truri për vetëm 7 sekonda, dyfish më shpejt se heroina e cila injektohet në venë. Rezultati i reagimit kimik krijon ndryshime të përkohshme në kiminë e trurit, ndërsa duhanpirësit këtë shpesh e përjetojnë si kënaqësi, zvogëlim të ankthit dhe rritje të vigjilencës. Secili tym fuqizon këtë varësi. Kur ju mungon nikotina, shfaqen ankthi dhe stresi. Duhet të konsumoni cigare të tjera. Stresi ndalet gati menjëherë dhe përsëri forcon varësinë.

Pra, derisa pirja e duhanit në të vërtetë nuk ndihmon të zvogëlohet stresi, pjesërisht vjen deri tek tërheqja e ndjenjës që jeni nën stres, gjë të cilën joduhanpirësit nuk mund ta përjetojnë kurrë. Ky është rrethi vicioz.

Po ashtu duhet theksuar atë që shumë e harrojnë, që pirja e duhanit është stres për trupin. Në momentin kur filloni të pini cigare frymëmarrja shpejtohet gjë që shkakton që mushkëritë të punojnë më rëndë se që është e nevojshme. Rrahjet e zemrës shtohen sapo të thithni tymin.

Pirja e duhanit ngushton enët e gjakut në organin më të madh të trupit tuaj, në lëkurë. Rezultati është niveli i zvogëluar i oksigjenit i cili u liferohet organeve të tjera dhe mundësia më e madhe e rrudhjes së lëkurës.

E dini edhe vetë që pirja e duhanit është e dëmshme. Por si mund ta zvogëloni stresin në jetën dhe trupin tuaj, pa duhan?

Gjëja e parë që duhet të kuptoni është që joduhanpirësit përballen me stresin çdo ditë. Ata nuk ngarendin pas cigareve dhe as që kanë kurrfarë dëshire për të thithur duhan. A jeni xheloz? Edhe ju mund të arrini deri te kjo nëse keni dëshirë!

Përkujdesuni që ta kuptoni stresin tuaj. Nëse e dini se çka e shkakton stresin (thirrjet telefonike, trafiku, shefi kërkues, etj.) mund të mësoni mënyrat për ta shmangur ose të paktën të përballeni me të. Duheni të jeni të vetëdijshëm për reagimet tuaja kur jeni me stres. Disa persona nuk e kuptojnë që janë nën stres derisa nuk shpërthejnë. Treguesit e përbashkët të stresit përfshijnë ndjenjën e të përzierave në stomak, kokëdhimbjen, djersitjen e tepruar, nervozizmin, ngrënien e tepërt, dhe sigurisht pirjen e duhanit. Keni kujdes me këto shenja dhe kështu mund të ndikoni në zvogëlimin e stresit pasi që ta njihni.

Pjesë e teknikave të lehtësimit të stresit janë edhe pauzat e rregullta për pirjen e cigareve. Dalja jashtë për të ndezur një cigare është lehtësim i madh nga stresi. Përsëri mund të dilni jashtë, vetëm që këtë bëjeni pa cigare dhe mos dilni në pauzë me duhanpirësit tjerë! Shëtisni disa minuta. Ka një milionë imtësi që mund t’u ofrojnë lehtësim më të mirë nga stresi sesa duhani.

Ka disa mënyra të thjeshta për ta reduktuar stresin. Ushtroni. Përparësitë e ushtrimeve janë me të vërtetë të shumëfishta. Reduktojnë stresin, përmirësojnë shëndetin, vetëbesimin, forcën mendore dhe pamjen fizike, por edhe përmirësojnë shanset për të hequr dorë nga pirja e duhanit.



Planifikoni kohën për vete. Çdo ditë ndani pak kohë për vete dhe bëni diçka që dëshironi. Çdo javë ndani një mbrëmje për veten që të mund të relaksoheni dhe të pushoni plotësisht nga puna stresuese dhe përgjegjësitë.

Merrni frymë thellë. Trupat tonë janë të etshëm për oksigjen. Rrini të qetë pesë deri dhjetë minuta në një karrige të rehatshme. Merrni frymë thellë dhe ngadalë, përmes hundës. Ndieni se si oksigjeni mbush mushkëritë dhe trupin tuaj. Vetëdijesohuni për ndjenjën e ngrohtësisë e cila përshkon trupin tuaj. Tani ngadalë merrni frymë përmes gojës. Tentoni të fokusoheni në frymëmarrjen me sy të mbyllur. Kjo është shumë relaksuese dhe qetësuese.

Kaloni kohë me njerëzit me të cilët do të kënaqeni. Gjeni kohë për miqtë dhe familjen tuaj, por shmanguni duhanpirësit tjerë sa herë që keni mundësi.

Gjeni aktivitete që ju çlirojnë nga stresi ose të paktën ndihmojnë që të përballeni me të. E dini se çka mund t’u relaksojë dhe t’u mbajë larg nga cigaret.

Stresi ndikon në çdo person, çdo ditë. Se si përballemi me stresin përcakton efikasitetin në punë dhe në shtëpi, shëndetin fizik dhe mental. Merrni kontrollin ndaj stresit në jetën tuaj dhe do të shihni që heqja dorë nga duhani mund të jetë shumë më e lehtë!