Studimi, Italia diskriminon shqiptarët në spitale

[Altin111]

Bëjnë shumë pak analiza dhe pjesa më e madhe e nënave emigrante bëjnë lindje me operacion. “Viktima të diskriminimit”, ky ka qenë përfundimi në të cilin ka arritur “Ismas”, një institucion publik në Itali. Raporti evidenton se këto viktima janë kryesisht gratë emigrante, rezidente në këtë shtet. Ato janë të diskriminuara në fushën e shëndetësisë. Sipas këtij raporti, gratë shqiptare, në mënyrë indirekte apo jo, janë të poshtëruara në momentin që i nënshtrohen një shërbimi në spitalet publike të Italisë. Gratë emigrante jo vetëm që nuk kryejnë analiza, por lindjet e tyre janë bërë në pjesën më të madhe të tyre me operacion. Edhe në shtetin fqinj gratë shqiptare vazhdojnë të shkojnë nëpër dyert e spitaleve vetëm atëherë kur sëmurën apo kur u bie halli i madh, sipas raportit.

Ndërkohë edhe Organizata e Kombeve të Bashkuara ka lëshuar një alarm duke thënë se “shëndeti i emigrantëve përkeqësohet në vendet pritëse për shkak të kushteve e këqija në të cilat jetojnë”. Të kequshqyer, të shfrytëzuar, të detyruar të punojnë në kushte të vështira, në pamundësi (edhe për shkak të të qenit klandestin) për t’iu drejtuar strukturave publike për t’u kuruar: kjo është panorama e ekzistencës së shumë emigrantëve.

Volumi i të ardhurave që sillet në vendlindje nga emigrantët, qofshin ata të ligjshëm ose jo, është 230 miliardë dollarë, shifër kjo e përafërt me atë që investohet nga qeveritë e të gjithë botës për ndihmë ndaj vendeve të varfra. Nga njëra anë kemi thuajse të njëjtën sasi të ardhurash që hyjnë dhe dalin nga emigrantët. Ndërkohë që, fluksi i personave është i qëndrueshëm dhe pa ndryshim nga vendet e varfra për në vendet e pasura. Duket sikur diçka nuk shkon kur flitet për menaxhimin e burimeve njerëzore dhe ekonomike që lidhen me emigracionin.

“Pasoja e parë e këtij keqmenaxhimi të burimeve është që emigrantët shpesh përballen me një jetë të ndërtuar mbi vuajtje dhe kushte të këqija socio-sanitare në vendet pritëse. Dhe nuk ecën shumë më mirë për ata emigrantë që nuk janë të dëshpëruar dhe që bëjnë pjesë në shtresën e mesme shoqërore infermierë, mjekë, profesorë. Shpesh u duhet të përplasen me mosbesimin e njerëzve nga frika e të ndryshme, vështirësinë e integrimit me një kulturë të ndryshme e cila, në fakt, i lë pas dore”, sipas raportit.

Në 2003 u nënshkrua “Konventa Ndërkombëtare për Mbrojtjen e të Drejtave të të Gjithë Punëtorëve Migrues dhe Anëtarëve të familjeve të tyre” që ka përcaktuar standardet minimale të cilave duhet t’u përgjigjeshin shtetet që presin flukse emigrantësh me qëllim që të respektohen të drejtat shoqërore.

Deri më sot, sipas deklarimeve të OKB-së, kjo konventë shkelet përditë. Në optikën e përmirësimit të shëndetit të të gjithë banorëve të planetit, menaxhimi i flukseve të emigrantëve duhet të jetë një pikë nevralgjike.



40 për qind e fëmijëve talasemimbartës, me hepatit B dhe C



Fëmijët talasmikë përveç faktit që janë vuajtës të një sëmundjeje, rreth 40 për qind e tyre janë mbartës edhe të hepatit B dhe C, kjo si pasojë e transfuzionit të gjakut që duhet të kryejnë. Bazuar nga të dhënat e mbledhura në Qendrën Spitalore Universitare të Tiranës “Nënë Tereza”, rezulton se prania e këtyre hepatiteve është shkaktuar si pasojë e periudhës së fshehtë të evidentimit të viruseve në gjakun e dhuruesve. Ndonëse gjaku i dhuruar sipas analizave ka qenë brenda normativave të lejuara infektimi i fëmijëve talasemikë me virusin e hepatitit B dhe C, është shkaktuar nga fakti se në gjakun e dhuruesit sëmundja e hepatit B dhe C ka qenë e fshehur. “Periudha e shfaqjes së hepatiteve B ose C kërkon një kohë dymujore dhe është e vështirë për t'u evidentuar përmes analizës së gjakut. Gjaku i dhuruar duke u përdorur periodikisht 3 herë në javë nga fëmijët talasemikë, ka bërë që një pjesë e mirë e tyre të jenë bartës të Hepatit B dhe C”, - sqarojnë burime pranë QSUT-së. Kështu, përmes zhvillimit të fushatave sensibilizuese me specialistët e Zyrës së Promocionit dhe Shëndetit, ka rritur përkujdesjen e qytetarëve ndaj marrjes së vaksinës mbrojtëse të hepatit B, e cila është vendosur në Kalendarin Kombëtar të Vaksinave që në vitin 1995. Vaksina ndaj hepatitit B është mënyra më e mirë dhe më e lirë për t'u mbrojtur nga kjo sëmundje, pasi kurimi i saj kushton më shtrenjtë kur virusi kthehet kronik dhe rrezikon cerozën. Përgjysmimi i të sëmurëve me hepatit B në vend u realizua nëpërmjet fillimit të vaksinimit, ndërsa trajtimi i hepatitit C është më delikat, pasi nuk mund të parandalohet nëpërmjet vaksinimit. Ministria e Shëndetësisë ka shtuar shumën deri në 280 mijë dollarë amerikanë për të blerë interferon, i cili është një trajtim i shtrenjtë për kurimin e hepatit C, ku llogaritet 4800 dollarë për person. Hepatitet përfaqësojnë sëmundjet infektive më të përhapura në botë, ku të infektuar nga hepatiti B janë 2 bilionë njerëz në botë, aktualisht 350 milionë janë mbartës dhe 1 milion rezulton të infektohen në vit. Për hepatitin C ka 170 milionë të infektuar në të gjithë botën dhe 20 mijë të infektuar çdo vit.



Durrës



Masterplan në 2008-n



Qyteti i Durrësit do të zhvillohet në të ardhmen sipas një masterplani të përgatitur me financimin e Bankës Botërore.

Burime zyrtare nga bashkia e qytetit thanë dje se “masterplani i zhvillimit do të jetë gati brenda vitit 2008. Përgatitja e tij do të financohet nga BB, në kuadër të një projekti që parashikon hartimin e masterplaneve për tetë qytete të vendit tonë, me popullsi mbi 80 mijë banorë”.

Mësohet se specialistët e bashkisë kanë nisur konsultimet me ekspertët e Bankës Botërore, ndërsa pritet shpallja e kompanisë që do të punojë për hartimin e këtij masterplani.

Sipas burimeve, materialet e masterplanit të ardhshëm do të sqarojnë se cilat do të jenë hapësirat ku do të zhvillohet qyteti në të ardhmen. Ai do të përcaktojë gjithashtu dhe zhvillimin urbanistik të qytetit në zonat bregdetare kodrinore me destinacion turistik, si plazhi i Kallmit.

Pas hartimit një vit më parë të planit rregullues për qendrën historike të qytetit nga universiteti politeknik i Peskarës, masterplani që do të financohet nga BB vlerësohet si një dokument mjaft i rëndësishëm për zhvillimin e qytetit bregdetar.



KMR



Licencohen subjektet me aparate rrezatuese



Komisioni për Mbrojtjen nga Rrezatimet (KMR), autoriteti kompetent kombëtar që mbikëqyr dhe siguron zbatimin e dispozitave ligjore dhe akteve të tjera nënligjore në fushën e mbrojtjes nga rrezatimet, po licencon të gjitha subjekteve shtetërore dhe private, aktiviteti i të cilave ushtrohet përmes burimeve të rrezatimit jonizues.

“Aktualisht në proces licencimi janë institucionet shtetërore, por kemi edhe subjektet private që kanë nevojë të licencohen. Ministria e Shëndetësisë ka nxjerrë një urdhër për ndalimin e kabineteve në apartamentet e banimit. Nëse një subjekt privat kërkon të ngrejë një kabinet radiologjie, kjo duhet të kalojë në disa procedura që kanë të bëjnë me ndërrimin e destinacionit të aktivitetit, dhe më pas duhet të paraqitet për licencim”, - tha kryetari i Zyrës së Mbrojtjes nga Rrezatimi, Rustem Paci, sipas të cilit, në shkallë vendi ka rreth 150 subjekte me licencë, vlefshmëria e të cilës është për dy vjet.

“Edhe institucionet janë në proces licencimi. Ndër to deri tani është pjesërisht e licencuar Qendra Spitalore Universitare “Nënë Tereza”, Spitali Ushtarak, Spitali i Sëmundjeve të Mushkërive (Sanatoriumi), pjesërisht poliklinikat, ku një pjesë janë të palicencuara, sepse nuk plotësojnë kushtet. Gjithashtu jemi në fazën e plotësimit të dokumentacionit për rrethet, për të cilat një pjesë e subjekteve nuk do të licencohen”, - tregoi Paci.

Sipas tij, licenca jepet në përshtatje me tre kushtet që përcaktohen nga treguesi i justifikimit të ushtrimit të aktiviteti, masat që duhen të merren për të minimizuar në minimum riskun, dhe matja e nivelit të riskut. Ai theksoi se këto komponentë janë të mangëta në poliklinikat shtetërore, sepse nuk kane mbështetjen financiare, dhe mbajtja e aparaturave është kosto.

Lidhur me rrezikun e rrezatimeve jonizuese që shkaktojnë pajisje si grafia, skopia, skaneri, momografia apo koronarografia (që në total përbëjnë 192 pajisje në vend), Paci pohoi se stafi është i mbrojtur, pasi i ka njohuritë për mbrojtjen nga rrezatimet.

"Pika e dobët është pacienti, por përgjithësisht pacienti shqiptar ekspozohet vetëm një herë në vit në këto lloj pajisjesh, një tregues që ul riskun”, - tha ai, duke shtuar se doza për një ekzaminim të caktuar mund të jetë më e madhe se ato që konsiderohen doza të referencës.