VIP-at me SIDA

[Altin111]

SIDA mund të quhet ndryshe edhe arma kosë e dukshme e vdekjes, sepse edhe pse vetëm në këto dy dekada kjo sëmundje ka qenë gllabëruesja e viktimave më e madhe e këtij shekulli. Një kërcënim drithërues si ky virus bëhet edhe më besueshmërish rrëqethës kur shihet edhe mbi njerëzit publikë, VIP-at, të cilët këtë herë ndoshta dhe për të vetmen herë “reklamojnë” në mënyrën më tragjike brejtjen e gjithanshme nga vdekja.

Listës së zezë së të njohurve publikë të infektuar me HIV i shtohen pothuajse përditë mbartës të sëmundjes më të keqe të shekullit, madje për disa prej tyre sot është tepër vonë për të thënë me shpresë se ndoshta do të shpiket kurimi i duhur për këtë sëmundje, sepse e vetmja gjë që tashmë ata kanë lënë, janë vetëm gjurmët e thella historike dhe artistike të lëna në rërën e jetës.

E përveç njerëzve të infektuar me numër gjithmonë e më në rritje, kategori të tjera si biznesmenë, politikanë, sportistë, modele, shkrimtarë, kriminelë apo dhe veç njerëz heronj të jetës normale, futen në bashkësinë vicioze të SIDA-s, mallkim ky më të cilin do të ndërronim ndoshta edhe me tërë sëmundjet e tjera të botës.

Merritt Butrick (1959-1989), aktor amerikan, i cili kulmin e karrierës së tij e pati me rolin e djalit të Kapiten Kirk në “Star Trek” II dhe III. U diagnostikua me kancer në tru dhe më pas me HIV dhe vdiq në marsin e 1989-s. Ai kurrë nuk e diskutoi jetën e tij private në publik dhe në media dhe se si u infektua me HIV mbetet akoma enigmë.



Freddie Mercury (1946–1991), lideri anglez i grupit “The Queen” u diagnostikua me HIV në pranverën e 1987-s, edhe pse gjatë gjithë asaj kohe në media ai është shprehur se doli negativ me analizat. Zërat filluan të forcoheshin në lidhje me dyshimet e sëmundjes së këngëtarit, kur pamja e tij fizike ndryshonte ekstremisht. Ai vdiq në spital më datë 24 nëntor 1991, në moshën 45-vjeçare, por duke mos vdekur kurrë si idhull i muzikës në mbarë botën.



Makgatho Mandela (1950–2005), i biri i Presidentit të Afrikës së Jugut, Nelson Mandela, vdiq në janar të 2005-s, duke lënë pas katër fëmijë. Nelson Mandela, i ati pas vdekjes së të birit anonçoi arsyen e vërtetë të vdekjes së tij, me mesazhin se SIDA, si sëmundje e rrezikshme që është, nuk duhet fshehur, pasi kjo deri tani është e vetmja mënyrë për ta trajtuar si sëmundje normale dhe për ta kuruar.



Magic Johnson (lindur në 1959), basketbollist amerikan i emëruar në NBA “Ylli i skuadrës”, plot dymbëdhjetë herë ka qenë dhe mbetet ndër ikonat e NBA-së për vite me radhë. Pasi mungoi tri ndeshje radhazi me justifikimin “djegie stomaku”, Johnson bëri publike disa ditë më pas se ishte i infektuar me HIV. E, megjithatë frika më e madhe e tij ishte se mos fëmija i tij dhe gruaja ishin po ashtu të infektuar, por testet rezultuan negative fatmirësisht. Lajmi se basketbollisti ishte me HIV tronditi jo vetëm botën sportive si dhe publikun amerikan, por dhe vetë Presidentin G. W. Bush, i cili është shprehur se Johnson është një hero i madh.



Gia Carangi (1960–1986), supermodele amerikane e fundvitit ‘70 dhe fillimeve të viteve ‘80, me prejardhje italiane dhe irlandeze ka qenë më e preferuara e modës së asaj dekade.

E megjithatë, fama e saj u këput në mes për shkak të varësisë së saj nga heroina dhe karriera e saj si modele ra me shpejtësi të madhe. Më vonë ajo u infektua me HIV dhe vdiq në Filadelfia. Arsyeja e vdekjes së saj nuk u përhap gjerësisht në media dhe shumë pak njerëz të industrisë së modës e dinin të vërtetën, që ajo vdiq nga SIDA. Gia Carangi mendohet se është e para grua me famë që vdiq nga SIDA.



Isaac Asimov (1920–1992), rus i lindur në Amerikë, shkrimtar dhe biokimist, si dhe mjaft i shquar me krijimtarinë e tij fantashkencore. U infektua me SIDA gjatë një transfuzioni të gjakut në 1983, pas një ndërhyrjeje kirurgjikale të trefishtë në zemër. E megjithatë, kjo e vërtetë doli në pah dhjetë vjet pas vdekjes së tij, me botimin e librit të tij të fundit “Ka qenë një jetë e bukur”, nga bashkëshortja. Familja e tij pohoi se vete Asimov donte ta bënte publike po e ndaluan mjekët, për të mos pasur probleme familjare nga grupet anti-AIDS të asaj kohe.



Michel Foucault (1926–1984), filozof francez dhe shkrimtar, i mirënjohur për studimet e tij kritikuese kundrejt institucioneve sociale. Foucault vdiq po nga SIDA në Paris më 25 korrik 1984, duke hyrë në histori përveçse si një filozof me influencë në filozofi, por dhe si i pari francez publik, i cili vdes nga HIV-i