Sulmohet makina me lekë e "Raiffeisen Bank"

[Altin111]

Shkodër, po bënte transportimin e parave në drejtim të Pukës

Makina e blinduar, që transportonte paratë e "Raiffeisen Bank", dyshohet të jetë qëlluar për qëllim grabitjeje në hyrje të qytetit të Shkodrës, pranë kalasë së Rozafës. Policia ka ngritur dy pista hetimi, atë të një veprimi të sofistikuar mafioz me goditje snajperi, ose të një ngjarjeje aksidentale, ku xhami i një makine mund të jetë goditur nga ndonjë gur.

Makina e blinduar, me targë TR7476H, e cila po transportonte para nga Shkodra në drejtim të Pukës, e shoqëruar nga pas me një makinë sigurie, dyshohet të jetë qëlluar me armë zjarri për qëllim grabitjeje, në vendin e quajtur "Kthesa e kalasë", në hyrje të Shkodrës. Rreth orës 12:30 të ditës së djeshme, makina e blinduar është goditur në pjesën e përparme, ku ka një shenjë të ngjashme me atë të plumbit në xhamin e përparmë, në drejtim të shoferit. Pas kësaj goditjeje makina e blinduar është ndalur dhe të frikësuar nga ndonjë sulm i mundshëm grabitësish, personat që ndodheshin brenda makinës kanë lajmëruar menjëherë policinë. Ndërkohë që ndaj makinës ku ndodheshin paratë nuk është kryer asnjë sulm grabitjeje. Forca të shumta policie kanë mbërritur menjëherë në vendngjarje. Ekspertët e grupit hetimor, kanë konstatuar se në makinën e blinduar ka vetëm një shenjë të ngjashme me atë të plumbit, por hidhen dyshime se mund të jetë dhe goditje me gur, nga pakujdesia apo me dashje. Në vendngjarje nuk është gjetur asnjë gëzhojë arme zjarri, apo ndonjë provë materiale që lë të kuptosh se është qëlluar me armë zjarri. Por një pistë tjetër që po heton policia është mundësia e goditjes me armë të precizonit të lartë, snajper, nga kodra rrëzë kalasë, me qëllim goditjen e shoferit, pasi shenja në xham korrespondon pjesën e kokës së shoferit dhe qëllimi mund të ketë qenë ndalimi i makinës dhe sulmi i saj nga një distancë e afërt nga të tjerë persona, të cilët pasi kanë parë që shoferi nuk është goditur, nuk e kanë sulmuar makinën e parave. Grupi hetimor vazhdon punën për zbardhjen e plotë të kësaj ngjarjeje dhe janë dy pistat kryesore ku po përqendrohen hetimet e para. "Kemi të bëjmë me një veprim të sofistikuar mafioz dhe e dyta, më pak e mundshme, kemi të bëjmë me një ngjarje aksidentale, ku xhami i makinës mund të jetë goditur me gur. Ndërkohë, forca të shumta të komisariatit dhe ato të ndërhyrjes së shpejtë Shkodër, janë duke bërë kontrolle në zonën përreth kodrës së kalasë, nga mendohet se mund të jetë gjuajtur makina që transportonte paratë. Gjithashtu, postblloqe të shumta të lëvizshme janë ngritur në hyrjet dhe daljet e qytetit. Ende nuk ka asnjë të shoqëruar në lidhje me ngjarjen, ndërsa policia vazhdon hetimet për zbardhjen e plotë të saj. Makina e blinduar, së bashku me eskortën e saj, nuk kanë vazhduar më rrugën në drejtim të Pukës. Për arsye sigurie ato janë kthyer sërish në Shkodër.